តើកម្រិតហានិភ័យនៃវិស័យអចលទ្រព្យជះឥទ្ធិពលដល់វិស័យហិរញ្ញវត្ថុឬទេ?

​​វិស័យអចលនទ្រព្យកម្ពុជា ចាប់ផ្តើមមានសន្ទុះងើបឡើងពីឆ្នាំ ២០១១ រហូតដល់ខ្ពស់បំផុតនៅចុងឆ្នាំ ២០១៨។ រហូតដល់ចុងឆ្នាំ ២០១៩ វិស័យនេះ បានធ្លាក់ចុះបន្តិចម្តងៗ ដោយសារវិបត្តិកូវីដ-១៩។ បន្ថែមលើវិបត្តិនេះ សង្រ្គាមរុស្ស៊ី និងអ៊ុយក្រែន បានជះឥទ្ធិពលបន្ថែមទៀត កាន់តែធ្ងន់ធ្ងរ ធ្វើឱ្យវិស័យអចលនទ្រព្យធ្លាក់ចុះខ្លាំងនៅឆ្នាំ ២០២៣នេះ។

តើកម្រិតហានិភ័យនៃវិស័យអចលទ្រព្យជះឥទ្ធិពលដល់វិស័យហិរញ្ញវត្ថុឬទេ?

ទិន្នន័យកម្ចីលើវិស័យអចលនទ្រព្យ និងសំណង់ រួមបញ្ចូលគ្នាស្មើនឹង ២០ភាគរយ នៃប្រាក់ចម្ចីទាំងមូល។ ដូច្នេះ ៨០ភាគរយនៃប្រាក់កម្ចីត្រូវបានប្រើប្រាស់ទៅលើវិស័យផ្សេងៗទៀត ដូចជា Trading, Manufacturing និងកសិកម្មជាដើម។ នេះបើយោងតាមធនាគារជាតិនៃកម្ពុជា។ បើមើលទៅលើប្រាក់កម្ចីលើវិស័យអចលនទ្រព្យ និងសំណង់ នៅមានកម្រិត ដែលចំនួននេះ អាចគ្រប់គ្រងបាន។ ដូចនេះ ការជាប់គាំងនៃវិស័យអចលនទ្រព្យ មិនជះឥទ្ធិពលធ្ងន់ធ្ងរដល់វិស័យហិរញ្ញវត្ថុនោះឡើយ។ នេះបើតាមការបញ្ជាក់របស់លោកស្រី គឹម គីនកេសា នាយិកាប្រតិបត្តិរង ក្រុមហ៊ុន CBRE Cambodia។

លោកស្រី បានលើកឡើងថា វិស័យធនាគារ ត្រូវបានគ្រប់គ្រងដោយហ្មត់ចត់ ដូច្នេះហានិភ័យនៃវិស័យនេះ ស្ថិតនៅ​ក្នុងកម្រិតមួយអាចគ្រប់គ្រងបាន។ ផ្ទុយទៅវិញ ផ្នែកដែលគួរឱ្យបារម្ភជាងវិស័យធនាគារទៅទៀតនោះ គឺប្រភេទប្រាក់កម្ចី ឬការបង់រំលស់ជាមួយម្ចាស់គម្រោងផ្ទាល់។ លោកស្រី បានគូសបញ្ជាក់ថា ការបង់រំលស់ជាមួយម្ចាស់គម្រោង មានលក្ខ​ខណ្ឌនៃការរឹបអូសទ្រព្យអតិថិជន ខុសពីប្រើកម្ចីធនាគារ។​ មានន័យថា នៅក្នុងវិស័យធនាគារ ប្រសិនបើអតិថជន មិនមាន​លទ្ធភាពបង់បន្តទៀត ត្រូវឆ្លងកាត់តុលាការ ការលក់ដេញថ្លៃ ហើយបើសិនទ្រព្យនេះ មានទំហំលើសពីបំណុល ក្រោយពីលក់ដេញថ្លៃហើយ ម្ចាស់ទ្រព្យអាចទទួលបានផលពីសំណងដែលនៅសល់ខ្លះផងដែរ។

អ្នកឧកញ៉ា លាង ម៉េង អនុប្រធានសមាគមឧកញ៉ាកម្ពុជា និងជាអគ្គនាយកក្រុមហ៊ុន Chip Mong Group បានវាយតម្លៃថា ដើមឆ្នាំ ២០២៤ខាងមុខ ស្ថានភាពវិស័យ​អចលនទ្រព្យ នៅតែមិនទាន់ល្អប្រសើរនោះទេ ប៉ុន្តែវិស័យនេះ នឹងចាប់ផ្តើមល្អឡើងវិញនៅអំឡុងខែ តុលា ឆ្នាំដដែលនេះ។ ទន្ទឹមនឹងនេះ អ្នកឧកញ៉ា សង្ឃឹមថា រាជរដ្ឋាភិបាលថ្មី ដែលយល់ច្បាស់អំពីស្ថានភាពនេះ អាចនឹងមានយុទ្ធសាស្រ្ត​គន្លឹះធ្វើឱ្យវិស័យអចលនទ្រព្យ​កម្រើកឡើងវិញ ដូចកាលឆ្នាំ ២០១៨កន្លងទៅ ដែលកាលនោះ កម្ពុជា មានសេដ្ឋកិច្ចខ្លាំង។ ការលើកឡើង​របស់អ្នកឧកញ៉ា លាង ម៉េង ធ្វើឡើងក្នុងវេទិកាធុរកិច្ចឆ្នាំ២០២៣ រៀបចំដោយសមាគមឧកញ៉ាកម្ពុជា (ស.ឧ.ក) កាលពីខែ សីហា កន្លងនេះ៕