តើលោក Joe Biden អញ្ជើញជួបថ្នាក់ដឹកនាំកំពូលៗរូបណាខ្លះ ពេលបំពេញ​ទស្សនកិច្ចនៅ វៀតណាម?

ប្រធានាធិបតីសហរដ្ឋអាមេរិកលោក Joe Biden បានអញ្ជើញត្រលប់ទៅកាន់មាតុប្រទេសវិញហើយ បន្ទាប់ពីចំណាយពេលបំពេញទស្សនកិច្ចផ្លូវរដ្ឋរយៈពេល ២ ថ្ងៃកាលពីថ្ងៃទី១០ ដល់ថ្ងៃទី១១ ខែកញ្ញានៅប្រទេសវៀតណាម ។

ក្នុងដំណើរទស្សនកិច្ចនោះដែរ លោកប្រធានាធិបតីសហរដ្ឋអាមេរិករូបនេះទទួលការស្វាគមន៍យ៉ាងកក់ក្ដៅពីសំណាក់រដ្ឋាភិបាលទីក្រុងហាណូយ ហើយលោកក៏បានអញ្ជើញជួបថ្នាក់ដឹកនាំកំពូលៗរបស់វៀតណាមមួយចំនួនផងដែរ ។

មកដល់ភ្លាមលោក Joe Biden បានអញ្ជើញជួបពិភាក្សាការងារជាមួយអគ្គលេខាបក្សកុម្មុយនិស្តវៀតណាមលោក Nguyen Phu Trong ខណៈបន្ទាប់មកប្រធានាធិបតីរូបនេះបានអញ្ជើញជួបលោកនាយករដ្ឋមន្ត្រី Pham Minh Chinh និងបន្ត​ចូល​រួម​កិច្ច​ប្រជុំ​កំពូល​ វៀត​ណាម-អាមេរិក ​ស្តី​ពី​នវានុវត្តន៍ និង​ការ​វិនិយោគ ។

ទន្ទឹមនោះ មុនអញ្ជើញចេញមកសហរដ្ឋអាមេរិកវិញ លោក Joe Biden ក៏ត្រូវបានទទួលស្វាគមន៍ដោយលោកប្រធានាធិបតីវៀតណាម Vo Van Thuong ក្នុងពិធីជប់លៀងថ្នាក់រដ្ឋផងដែរ ដើម្បីបញ្ចប់ដំណើរទស្សនកិច្ចរយៈពេល ២៤ ម៉ោងរបស់លោកទៅកាន់ប្រទេសវៀតណាម ។

គួរបញ្ជាក់ថា ជាមួយនឹងដំណើរទស្សនកិច្ចលើកនេះ លោក Joe Biden បានក្លាយជាប្រធានាធិបតីសហរដ្ឋអាមេរិកទី ៥ ហើយដែលបានអញ្ជើញមកប្រទេសវៀតណាម ចាប់តាំងពីប្រទេសទាំងពីរស្ដារទំនាក់ទំនងឲ្យធម្មតាឡើងវិញក្នុងឆ្នាំ ១៩៩៥ ៕

ប្រែសម្រួលដោយ ៖ ជីវ័ន្ត

ប្រភព ៖ VN Express

ចុចអាន ៖ វៀតណាម និងអាមេរិក ចេញសេចក្ដីថ្លែងការណ៍រួមចំនួន ១១ ចំណុច