លោក សេដ្ឋា ស្នើឲ្យកងកម្លាំងថៃ ផ្អាកទិញអាវុធសិន ដើម្បីយកលុយទៅជួយប្រជាជនវិញ

នាយករដ្ឋមន្ត្រីថៃ លោក សេដ្ឋា ថាវីស៊ីន បានស្នើឲ្យកងកម្លាំងប្រដាប់អាវុធ ពន្យារពេលផែនការលទ្ធកម្មអាវុធសម្រាប់ឆ្នាំសារពើពន្ធ២០២៤សិន ដើម្បីរដ្ឋាភិបាល​ អាចយកថវិកាទៅជួយអ្នកដែលកំពុងខ្វះខាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់កាសែតបាងកកប៉ុស្តិ៍ កាលពីថ្ងៃចន្ទទី២ខែតុលា, លោក សេដ្ឋា បានណែនាំរដ្ឋមន្ត្រីក្រសួងការពារជាតិ Sutin Klunsang និងអគ្គលេខាធិកានាយករដ្ឋមន្ត្រី Prommin Lertsuridej ឲ្យជួបពិភាក្សាជាមួយថ្នាក់ដឹកនាំកងកម្លាំងប្រដាប់អាវុធ ដើម្បីសុំឲ្យមានការពន្យារពេលលទ្ធកម្មអាវុធសម្រាប់ឆ្នាំសារពើពន្ធ២០២៤។

ប្រភពខាងលើបន្តថា “លោកនាយករដ្ឋមន្ត្រី ចង់ឲ្យថវិកាទាំងនេះ​ ទៅចំណាយលើកិច្ចខិតខំប្រឹងប្រែងជាបន្ទាន់ដើម្បីជួយប្រជាជន។ ទោះបីជាយ៉ាងណាក៏ដោយ ថវិកាដែលបានអនុម័តរួចហើយ នឹងមិនមានការផ្លាស់ប្តូរឡើយ”។

ស្របពេលជាមួយគ្នានោះ មេបញ្ជាការកងទ័ពអាកាសថៃ (RTAF) ដែលទើបតែងតាំងថ្មី លោក Phanphakdee Phatthanakul បានបញ្ជាក់ថា រដ្ឋាភិបាលបានស្នើឲ្យកងកម្លាំងប្រដាប់អាវុធ ផ្តល់អាទិភាពដល់កិច្ចខិតខំប្រឹងប្រែង ដើម្បីដោះស្រាយគ្រោះមហន្តរាយធម្មជាតិ ដូចជាទឹកជំនន់ ភ្លើងឆេះព្រៃ និងបញ្ហាអ័ព្ទជាដើម។

លោក Phanphakdee បញ្ជាក់ថា កងទ័ពអាកាស នឹងមិនស្វែងរកការទិញយន្តហោះចម្បាំងក្នុងឆ្នាំសារពើពន្ធ២០២៤ទេ ដោយសារតែស្ថានភាពសេដ្ឋកិច្ចរបស់ប្រទេស។ យ៉ាងណា កងទ័ពអាកាស នឹងពិចារណាលើការទិញយន្តហោះចម្បាំងថ្មី ក្នុងឆ្នាំសារពើពន្ធ ២០២៥ ហើយក្រុមការងារ នឹងត្រូវបង្កើតឡើងដើម្បីពិចារណាលើបញ្ហានេះ។

មេបញ្ជាការកងទ័ពអាកាស អះអាងថា ទ័ពអាកាស នឹងបង្ហាញផែនការលទ្ធកម្មក្នុងឆ្នាំសារពើពន្ធ២០២៥ហើយនឹងធានាថា ប្រាក់របស់អ្នកជាប់ពន្ធ នឹងត្រូវបានចំណាយក្នុងផលប្រយោជន៍ល្អបំផុតរបស់ប្រទេស និងសម្រាប់ជាប្រយោជន៍ដល់វិស័យការពារជាតិ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ លោក សេដ្ឋា រីករាយ ចំពោះការស្វាគមន៍យ៉ាងកក់ក្តៅរបស់កម្ពុជា ហើយអញ្ជើញសម្តេចធិបតី ហ៊ុន ម៉ាណែត ធ្វើទស្សនកិច្ចប្រទេស ថៃ វិញ