ក្រុមហាម៉ាស់ ថា ខ្លួនចង់ដោះលែងចំណាប់ខ្មាំង តែអ៊ីស្រាអែលបដិសេធ

អ្នកនាំពាក្យកងពលតូច al-Qassam របស់ក្រុម ហាម៉ាស់ លោក Abu Obeida និយាយថា លោកបានជូនដំណឹងដល់ប្រទេសកាតាថា ខ្លួននឹងដោះលែងចំណាប់ខ្មាំងជនជាតិអ៊ីស្រាអែលពីរនាក់ ប៉ុន្តែអាជ្ញាធរអ៊ីស្រាអែលបានបដិសេធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបង្ហោះលើឆានែល Telegram ថា “យើងបានជូនដំណឹងដល់បងប្អូនកាតារបស់យើងកាលពីល្ងាចថ្ងៃសៅរ៍ទី២១ខែតុលាថា យើងនឹងដោះលែងចំណាប់ខ្មាំងឈ្មោះ Nourit Yitshaq និង Yokhefed Lifshitz សម្រាប់ហេតុផលមនុស្សធម៌ ដោយមិនមានការដោះដូរអ្វីឡើយ។ ទោះបីជាយ៉ាងណាក៏ដោយ រដ្ឋាភិបាលអ៊ីស្រាអែល បានបដិសេធសំណើនេះ។

ស្របពេលជាមួយគ្នានោះ សារព័ត៌មាន Al Jazeera បានទាក់ទងទៅយោធាអ៊ីស្រាអែល និងការិយាល័យនាយករដ្ឋមន្ត្រី ប៉ុន្តែមិនបានទទួលការឆ្លើយតបភ្លាមៗទេ។

គួរបញ្ជាក់ថា កាលពីថ្ងៃសុក្រ ក្រុមហាម៉ាស់ ក៏បានដោះលែងចំណាប់ខ្មាំងជនជាតិអាមេរិកពីរនាក់ផងដែរមានឈ្មោះ Judith Raanan និងកូនស្រីរបស់នាង Natalie Raanan។

ពួកគេគឺជាឈ្លើយសឹកក្នុងចំណោមមនុស្សប្រហែល២០០នាក់ ដែលត្រូវបានចាប់យកទៅ តាំងពីក្រុមយុទ្ធជនមកពី ប៉ាឡេស្ទីន បើកធ្វើការវាយប្រហារកាលពីថ្ងៃទី៧ខែតុលា ដោយបានសម្លាប់មនុស្សយ៉ាងតិច១៤០០នាក់៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ ការចរចាដោះដូរចំណាប់ខ្មាំងរវាងអាមេរិក-អ៊ីស្រាអែល ជាមួយក្រុមហាម៉ាស់ ត្រូវបរាជ័យ