នាវាមុជទឹក អាមេរិក ទៅដល់ឈូងសមុទ្រពែក្សដើម្បីបង្ហាញសាច់ដុំរារាំង​សកម្មភាពរបស់ អ៊ីរ៉ង់

យោងតាមការរាយការណ៍របស់សារព័ត៌មាន Bloomberg ដោយដកស្រង់សម្ដីមន្ត្រីការពារជាតិអាមេរិកបានឲ្យដឹងថា នាវាមុជទឹកដើរដោយថាមពលនុយក្លេអ៊ែរថ្នាក់រដ្ឋ Florida បានចូលទៅដល់ឈូងសមុទ្រពែក្សហើយដើម្បីបង្ហាញសាច់ដុំ ក៏ដូចជាធ្វើសកម្មភាពរារាំងប្រទេសអ៊ីរ៉ង់ ។

Bloomberg បានចុះផ្សាយទៀតថា ទោះបីជានាវាមុជទឹកថ្នាក់រដ្ឋ Florida ដើរដោយថាមនុយក្លេអ៊ែរក៏ពិតមែន ប៉ុន្តែវាមិនមានផ្ទុកអាវុធនុយក្លេអែរនោះទេ ។ ទោះយ៉ាងណា នាវាមុជទឹកមួយគ្រឿងនេះអាចមានសមត្ថភាពផ្ទុកកាំជ្រួចមីស៊ីល Tomahawk រហូតដល់ ១៥៤ គ្រាប់ ឬគ្រាប់មីស៊ីលរបស់កងទ័ពជើងទឹកដល់ទៅ ៦៦ គ្រាប់ ។

ទន្ទឹមនោះ ការបញ្ជូននាវាមុជទឹក Florida ទៅកាន់ឈូងសមុទ្រពែក្សនេះកើតមានឡើងតែប៉ុន្មានថ្ងៃប៉ុណ្ណោះ បន្ទាប់ពីទីបញ្ជាការកណ្ដាលរបស់សហរដ្ឋអាមេរិក (CENTCOM) ក៏ទើបតែបញ្ជូននាវាមុជទឹកដើរដោយថាមពលនុយក្លេអ៊ែរថ្នាក់រដ្ឋ Ohio ទៅកាន់មជ្ឈិមបូព៌ា ។

អ្នកសម្របសម្រួលក្រុមប្រឹក្សាសន្តិសុខជាតិអាមេរិកលោក John Kirby បាននិយាយកាលពីថ្ងៃចន្ទថា ការបញ្ជូននាវាមុជទឹក Ohio របស់សហរដ្ឋអាមេរិកទៅកាន់មជ្ឈិមបូព៌ា គឺដើម្បីធានាសុវត្ថិភារបស់កងកម្លាំងអាមេរិកនៅតំបន់ដ៏រសើបមួយនេះ ស្របពេលដែលជម្លោះរវាងអ៊ីស្រាអែល និងប៉ាឡេស្ទីនក៏កំពុងបែកផ្កាភ្លើងខ្លាំងផងដែរ ។

ពាក់ព័ន្ធនឹងបញ្ហានេះដែរ អ្នក​នាំពាក្យ​មន្ទីរ​បញ្ចកោណ​លោក Pat Ryder ធ្លាប់បាន​លើកឡើងកាលពីចុងខែតុលាថា សហរដ្ឋអាមេរិកក៏នឹងបញ្ជូនកម្លាំងទ័ពប្រមាណ ៣០០ នាក់ទៅកាន់មជ្ឈិមបូព៌ាផងដែរ ប៉ុន្តែលោកមិនបានបញ្ជាក់ឲ្យច្បាស់ថា កងទ័ពទាំងនោះនឹងត្រូវដាក់ពង្រាយនៅទីកន្លែងណាឡើយ ដោយគ្រាន់តែបង្ហើបថា គឺមិនមែននៅក្នុងប្រទេសអ៊ីស្រាអែលនោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ តើសង្គ្រាមរវាង អ៊ីស្រាអែល-ប៉ាឡេស្ទីន និងរុស្ស៊ី-អ៊ុយក្រែន មួយណាសម្លាប់​ជនស៊ីវិលច្រើនជាង?