កីឡា

អបអរសាទរ! U17 អាល្លឺម៉ង់ឈ្នះជើងឯកពិភពលោក U17 World Cup លើកដំបូង

បានផុស

២ years មុន

នៅ

ថ្ងៃសៅរ៍ ២ ធ្នូ ២០២៣

ដោយ

ក្រុមបាល់ទាត់ជម្រើសជាតិអាល្លឺម៉ង់អាយុក្រោម១៧ឆ្នាំ បានក្លាយជាម្ចាស់ជើងឯកបាល់ទាត់ពិភពលោកអាយុក្រោម១៧ឆ្នាំ (World Cup U17) បន្ទាប់ពីបានយកឈ្នះលើក្រុមយុវជនជម្រើសជាតិបារាំងតាមរយៈលទ្ធផលប៉េណាល់ទីកាត់សេចក្តី ៤-៣ ក្រោយពេលស្មើគ្នា ២-២ នៅវគ្គផ្តាច់ព្រ័ត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតវគ្គផ្តាច់ព្រ័ត្រនៅយប់ថ្ងៃសៅរ៍ ទី២ ខែធ្នូនេះ ក្រុមយុវជនអាល្លឺម៉ង់បាននាំមុខ ២-០ មុនទៅហើយ ប៉ុន្តែបារាំងបានវាយបកតាមស្មើ ២-២ នៅចុងវគ្គទី២រហូតចប់៩០នាទី។ ការស៊ុតប៉េណាល់ទីកាត់សេចក្តីរហូតដល់ម្ខាង៦គ្រាប់គឺអាល្លឺម៉ង់ស៊ុតបានសម្រេច៤គ្រាប់ និងបរាជ័យ២គ្រាប់ ខណៈបារាំងស៊ុតចូល៣គ្រាប់ និងបរាជ័យ៣គ្រាប់។

តាមរយៈជ័យជម្នះនេះ ក្រុមយុវជនអាល្លឺម៉ង់បានក្លាយជាម្ចាស់ជើងឯកយុវជនពិភពលោកជាលើកដំបូងក្រោយរង់ចាំអស់រយៈពេល៣៨ឆ្នាំ។ តាមពិតទៅពានរង្វាន់នេះមានអាយុកាល៣៨ឆ្នាំដែលអាល្លឺម៉ង់ក៏ធ្លាប់បានឡើងដល់វគ្គផ្តាច់ព្រ័ត្រកាលពីឆ្នាំដំបូង១៩៨៥ ប៉ុន្តែទទួលបានត្រឹមចំណាត់ថ្នាក់លេខ២។

សម្រាប់ឆ្នាំ២០២៣នេះ នៅវគ្គសន្សំពិន្ទុ ក្រុមអាល្លឺម៉ង់ឈរលេខ១ ក្នុងពូល F ដោយប្រកួត៣លើកឈ្នះទាំង៣ មាន៩ពិន្ទុ។ វគ្គ១៦ក្រុមចុងក្រោយ ពួកគេបានយកឈ្នះសហរដ្ឋអាមេរិកដោយលទ្ធផល ៣-២ និងវគ្គ៨ក្រុមចុងក្រោយបន្តយកឈ្នះអេស្ប៉ាញ ១-០។ វគ្គពាក់កណ្តាលផ្តាច់ព្រ័ត្រ អាល្លឺម៉ង់បានឈ្នះអាហ្សង់ទីន ដោយការទាត់ប៉េណាល់ទីកាត់សេចក្តី ៤-២ ស្មើគ្នា ៣-៣ និងវគ្គផ្តាច់ព្រ័ត្របានយកឈ្នះដៃគូដោយការទាត់ប៉េណាល់ទីកាត់សេចក្តីទៀត៕

អត្ថបទ៖ វីរបុត្រ