កីឡា

McGregor ដាក់គោលដៅផ្តួល Jordan ក្នុងបញ្ជីអត្តពលិកមានទ្រព្យច្រើនបំផុត

បានផុស

១ year មុន

នៅ

ថ្ងៃព្រហស្បតិ៍ ១១ មករា ២០២៤

ដោយ

កីឡាករគុនចម្រុះ Conor McGregor ដែលបានវិលត្រឡប់ចូលសង្វៀនវិញ ក្រោយសម្រាកអស់រយៈពេលយ៉ាងយូរពីបញ្ហារបួសបានដាក់គោលដៅប្រជែងជាមួយអតីតកីឡាករបាល់បោះ Michael Jordan ដែលជាអត្តពលិកមានទ្រព្យសម្បត្តិច្រើនបំផុតក្នុងបញ្ជីទស្សនាវដ្ដី Forbes។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្នាំ២០១៧ ជាពេលវេលា ដែលកីឡាករ Conor McGregor រកប្រាក់ចំណូលបានច្រើនបំផុត។ ពេលនោះលោករកបានប្រាក់ចំនួន ១០លានដុល្លារ ពីការប្រកួតប្រភេទ Crossover ជាមួយកីឡាករប្រដាល់សកល Floyd Mayweather។ ទោះបីជាយ៉ាងនេះក្តីក្នុងរយៈពេលជាង២ឆ្នាំហើយដែលរូបនេះមិនបានប្រកួតដើម្បីរកប្រាក់ចំណូលប្រជែងក្នុងបញ្ជីជាអត្តពលិកមានទ្រព្យសម្បត្តិច្រើនបំផុតនៅលើពិភពលោក។ មុនការវិលត្រឡប់ចូលសង្វៀនសាជាថ្មី ទ្រព្យសម្បត្តិសរុបរបស់ McGregor ត្រូវបានគេប៉ាន់ស្មានថាមានប្រហែល២០០លានផោន។

ឆ្នាំ២០២១ McGregor បានជាប់ចំណាត់ថ្នាក់កំពូលក្នុងបញ្ជីអត្តពលិកអ្នកមានទ្រព្យច្រើនបំផុតរបស់ទស្សនាវដ្ដី Forbes។ ប្រភពចំណូលសំខាន់គឺអាជីវកម្មស្រាវីស្គីដ៏ជោគជ័យរបស់ខ្លួនទៅឱ្យ Proximo Spirits ក្នុងតម្លៃ៦០០លានដុល្លារ។ ទោះបីជាយ៉ាងណា ការរបួសពេលប្រកួត UFC 264 ក្នុងខែកក្កដា ឆ្នាំ២០២១ កីឡាករវ័យ៣៥ឆ្នាំរូបនេះមិនអាចរកចំណូលពីការឡើងសង្វៀនទេ ហើយបានធ្លាក់មកលេខ៣៣ក្នុងបញ្ជីទស្សនាវដ្ដី Forbes។

ការវិលត្រឡប់វិលចូលសង្វៀនវិញ McGregor ប្តេជ្ញាថា នឹងប្រជែងជាមួយអត្តពលិកមានទ្រព្យសម្បត្តិច្រើនបំផុតគឺលោក Michael Jordan។ លោក Jordan ត្រូវបានគេចាត់ទុកជាអ្នកលេងបាល់បោះដ៏អស្ចារ្យបំផុតរកចំណូលបានប្រមាណ១០០លានដុល្លារ ក្នុងអាជីពរយៈពេល១៩ឆ្នាំ។ បុរសវ័យ៦០ឆ្នាំរូបនេះបានរកចំណូលច្រើនបំផុតតាមរយៈការសហការជាមួយក្រុមហ៊ុន Air Jordan របស់លោកជាមួយក្រុមហ៊ុន Nike ហើយត្រូវបានគេជឿថា មានទ្រព្យសម្បត្តិសរុប២ពាន់លានដុល្លារ។

កីឡាករ Conor McGregor បាននិយាយក្នុងបទសម្ភាសមួយថា ៖«វាជាការជំរុញទឹកចិត្តមួយដោយមើលឃើញ លោក Michael Jordan ស្ថិតនៅលំដាប់កំពូលក្នុងតារាងអត្តពលិកជាទ្រព្យសម្បត្តិច្រើន។ គាត់មានស្បែកជើងម៉ាក Jordan ដែលមានតម្លៃរាប់ពាន់លានដុល្លារ។ ខ្ញុំគិតថា វាមានប្រហែលជា ៣.៣ពាន់លានដុល្លារដែលគាត់រកបាន»។

កីឡាករគុនចម្រុះបន្តរៀបរាប់ថា ៖«ខ្ញុំកំពុងខិតជិតទៅរកទឹកប្រាក់១ពាន់លានដុល្លារ។ ខ្ញុំគិតថា ខ្ញុំមានប្រហែល៦៥០លានដុល្លារតាមអ្វីដែលខ្ញុំអាចធ្វើបាន។ ខ្ញុំគិតថា ពួកគេក៏កំពុងគិតរឿងនេះ។ ខ្ញុំប្រហែលជាត្រូវធ្វើការត្រួតពិនិត្យផ្ទាល់ខ្លួនអំពីរឿងនោះដែរ។ ខ្ញុំក៏រំពឹងថា ខ្ញុំនឹងមានឱកាសរំកិលខ្លួនក្នុងតារាងបញ្ជីនោះ។ វាពិតជារឿងដែលរីករាយដែលមើលឃើញគោលដៅខ្លនឯងក្នុងទស្សនាវដ្ដី Forbes ជាអត្តពលិកមានទ្រព្យសម្បត្តិច្រើនជាងគេបំផុតប្រចាំឆ្នាំ»៕

ប្រែសម្រួល៖ ផា រតនា
ប្រភព៖ Talksport

Related Topics:UFC