វៀតណាម នឹងដំឡើងពន្ធលើភេសជ្ជៈមានជាតិស្ករ ដើម្បីកាត់បន្ថយជំងឺទឹកនោមផ្អែម 

ក្រសួងហិរញ្ញវត្ថុវៀតណាម បានអំពាវនាវឲ្យដំឡើងពន្ធ១០% លើភេសជ្ជៈផ្អែមៗ ក្នុងគោលបំណងឲ្យមនុស្សកាត់បន្ថយការផឹកភេសជ្ជៈដែលមានជាតិស្ករខ្លាំង ហើយវានឹងជួយកាត់បន្ថយភាពធាត់ ជំងឺទឹកនោមផ្អែម និងជំងឺផ្សេងៗទៀត ជាពិសេសក្នុងចំណោមយុវវ័យជំនាន់ក្រោយតែម្តង លើសពីនេះ វាក៏នឹងជួយសម្រាលសម្ពាធលើប្រព័ន្ធថែទាំសុខភាពផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ VN Express កាលពីថ្ងៃសៅរ៍ទី១៥ខែមិថុនា, ប្រសិនបើតម្លៃភេសជ្ជៈផ្អែមៗ ត្រូវបានដំឡើង១០%មែននោះ អ្នកពិសានឹងងាកទៅរកផលិតផលណា ដែលមានជាតិស្ករតិច ឬគ្មានជាតិស្ករតែម្តង។

ម្យ៉ាងវិញទៀត ពន្ធនេះនឹងនាំប្រាក់ ២.៤ទ្រីលានដុង (៩៤លានដុល្លារអាមេរិក) ចូលរដ្ឋក្នុងឆ្នាំដំបូង ហើយការយកពន្ធលើភេសជ្ជៈផ្អែមនេះ គឺជានិន្នាការសកលទៅហើយ ខណៈបច្ចុប្បន្នមានប្រទេសចំនួន ៨៥បានអនុវត្តវិធានការនេះ។

តាមទិន្នន័យពីវិទ្យាស្ថានជាតិអាហារូបត្ថម្ភវៀតណាម បានបង្ហាញថា ក្នុងរយៈពេល៧ឆ្នាំចុងក្រោយគិតត្រឹមឆ្នាំ២០២០ ការទទួលទានភេសជ្ជៈផ្អែមប្រចាំឆ្នាំសម្រាប់មនុស្សម្នាក់ៗ បានកើនឡើងជិត១.៥ដង ពោលគឺកើន ៧០.៥៦លីត្រ។

ដោយឡែក ក្នុងរយៈពេលមួយទសវត្សរ៍ចុងក្រោយគិតត្រឹមឆ្នាំ២០២០ អត្រាកុមារនិងក្មេងជំទង់វៀតណាមដែលលើសទម្ងន់និងធាត់ បានកើនឡើងដល់ទៅទ្វេដងឯណោះ៕

អត្ថបទ៖ សុខ សុវណ្ណ

ចុចអាន៖ សាលាបឋមសិក្សារោងដំរី ក្រុងព្រៃវែង រៀបចំលក់នំខ្មែរ បញ្ឈប់លក់ភេសជ្ជៈ នំកញ្ចប់ទាំងស្រុង