ព័ត៌មានអន្ដរជាតិ

មន្ត្រីកំពូលវៀតណាមម្នាក់ទៀតលាលែងពីតំណែង

បានផុស

៩ ខែ មុន

នៅ

ថ្ងៃព្រហស្បតិ៍ ២០ មិថុនា ២០២៤

ដោយ

មន្ត្រីជាន់ខ្ពស់វៀតណាមម្នាក់ទៀត គឺប្រធានគណបក្សនៃរដ្ឋធានីហាណូយ លោក Dinh Tien Dung បានលាលែងពីតំណែង ខណៈបក្សកុម្មុយនិស្តកាន់អំណាច កំពុងធ្វើការរុះរើរដ្ឋាភិបាល។ នេះបើយោងតាមការចេញផ្សាយរបស់ទីភ្នាក់ងារពត៌មាន Reuters កាលពីថ្ងៃ ទី ១៩ ខែ មិថុនាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរដ្ឋាភិបាលវៀតណាមបានឲ្យដឹងថា អតីតរដ្ឋមន្ត្រីហិរញ្ញវត្ថុវ័យ៦៣ឆ្នាំរូបនេះ ត្រូវបានរកឃើញថា គ្មានទំនួលខុសត្រូវក្នុងការដឹកនាំ ជាហេតុបង្កឲ្យមានការរំលោភបំពាននៅក្រសួងហិរញ្ញវត្ថុអំឡុងពេល ២០២៦ ដល់២០២១ ខណៈលោក Dung ក៏ជាសមាជិកនៃការិយាល័យនយោបាយ ដែលជាស្ថាប័នធ្វើការសម្រេចចិត្តដ៏មានឥទ្ធិពលបំផុតនៅក្នុងប្រទេសអាស៊ីអាគ្នេយ៍នេះផងដែរ។

បន្ទាប់ពីពិចារណាលើសំណើរបស់គណៈកម្មាធិការអធិការកិច្ចមជ្ឈិម, ការិយាល័យនយោបាយ និងលេខាធិការដ្ឋានបានរកឃើញថា គណៈកម្មាធិការប្រតិបត្តិបក្សនៃក្រសួងហិរញ្ញវត្ថុសម្រាប់អាណត្តិ ២០១៦-២០២១ ក្រោមការដឹកនាំរបស់លោកDinh Tien Dung បានរំលោភលើគោលការណ៍លទ្ធិប្រជាធិបតេយ្យមជ្ឈិម បទប្បញ្ញត្តិបក្ស និងបទប្បញ្ញត្តិការងារ និងមិនបានអនុវត្តទាំងស្រុងនូវការណែនាំពីអាជ្ញាធរមានសមត្ថកិច្ច។

ការរំលោភបំពាន និងកង្វះខាតរបស់គណៈកម្មាធិការបក្សនៃក្រសួងហិរញ្ញវត្ថុសម្រាប់អាណត្តិឆ្នាំ ២០១៦សល់២០២១ នេះបាននាំឱ្យមានផលវិបាកធ្ងន់ធ្ងរ រួមទាំងការខាតបង់ និងខ្ជះខ្ជាយថវិការដ្ឋ ព្រមទាំងបង្កគ្រោះថ្នាក់ដល់អ្នកវិនិយោគមូលបត្របំណុលទៀតផង។ លើសពីនេះ បញ្ហាទាំងប៉ុន្មានខាងលើ បានប៉ះពាល់យ៉ាងធ្ងន់ធ្ងរដល់ការវិនិយោគ និងធុរកិច្ច និងសណ្តាប់ធ្នាប់សង្គម បង្កការខឹងសម្បាជាសាធារណៈ និងបំផ្លាញកេរ្តិ៍ឈ្មោះរបស់បក្ស និងស្ថាប័នគ្រប់គ្រងរដ្ឋផងដែរ។

ដោយពិចារណាលើផលវិបាក និងមូលហេតុនៃការរំលោភបំពាន និងអនុលោមតាមបទប្បញ្ញត្តិរបស់បក្ស ស្តីពីវិធានការវិន័យចំពោះបក្ស និងសមាជិកណាដែលបំពានបទប្បញ្ញត្តិ ការិយាល័យនយោបាយបានយល់ព្រមអនុញ្ញាតឱ្យលោក Dinh Tien Dung ឈប់ចូលរួមក្នុងគណៈកម្មាធិការប្រតិបត្តិ និងគណៈកម្មាធិការអចិន្ត្រៃយ៍នៃគណៈកម្មាធិការបក្សទីក្រុងហាណូយ និងឈប់កាន់តំណែងលេខាគណៈកម្មាធិការបក្សទីក្រុងហាណូយអាណត្តិ ២០២០-២០២៥ ព្រមទាំងជាប្រធានគណៈប្រតិភូរដ្ឋសភាវៀតណាមនីតិកាលទី ១៥ ផងដែរ។

គួរបញ្ជាក់ងថា មួយរយៈចុងក្រោយនេះមន្ត្រីកំពូលវៀតណាមជាបន្តបន្ទាប់ត្រូវបានដកចេញឬលាលែងពីដំណែង បន្ទាប់ពីរដ្ឋាភិបាលបានចាប់ផ្ដើមរុះរើនិងប្រមាញ់អំពើពុករលួយដែលកើតចេញពីមន្ត្រីទាំងនេះ ស្របពេលប្រទេសប្ដូរនាយករដ្ឋមន្ត្រីរហូតដល់ទៅ២នាក់ក្នុងរយៈពេលត្រឹមតែមួយឆ្នាំជាងប៉ុណ្ណោះ៕