តើ ishowspeed ជាអ្នកណា? ម៉េចក៏គេស្វាគមន៍ខ្លាំងម្ល៉េះ?

ជាការពិតណាស់​ ប្រិយមិត្តដែលពេញនិយមលេងបណ្ដាញសង្គម ធ្លាប់បានឮឈ្មោះ Speed ដែលជាបុរសជនជាតិស្បែកខ្មៅម្នាក់ មានកេរ្តិ៍ឈ្មោះល្បីល្បាញ មនុស្សជុំវិញពិភពលោកស្គាល់ស្ទើរតែគ្រប់គ្នា។ ហើយក៏លេចឮដំណឹងដែរថា រូបគេ នឹងមកលេងប្រទេសកម្ពុជាយើងនៅថ្ងៃទី១៥ ខាងមុខនេះ ហើយនឹងចូលរួមកម្មវិធី Gumball 3000 នៅឯខេត្តសៀមរាប។

ក្រឡេកមកមើលអំពីប្រជាប្រិយភាព Speed ដែលបណ្ដាលឲ្យលោកមានអ្នកគាំទ្រយ៉ាងច្រើនលើសលុបបែបនេះ គឺលោកជា Infuencer ដ៏ល្បីល្បាញនៅប៉ែកអឺរ៉ុប។ ជាមួយគ្នានេះ ishowspeed មានអ្នកតាមដានដល់ទៅ ២៩លាននាក់ ក្នុងគណនីតិកតុ ហើយក៏មានអ្នកតាមដាននៅក្នុងគណនីយូធូប ២៩លាននាក់ផងដែរ។

បុរសជនជាតិស្បែកខ្មៅរូបនេះ បង្កើតវីដេអូបែបលក្ខណៈកម្សាន្ត ហើយរាល់ការបង្ហោះវីដេអូម្ដងៗមានអ្នកទស្សនាមិនក្រោមលាននាក់នោះទេ។ មិនតែប៉ុណ្នោះ លោកក៏ចូលចិត្ត ធ្វើការឡាយបន្ដផ្ទាល់ និយាយលេងជាមួយប្រិយមិត្តផងដែរ ដោយហេតុថា ខ្លួនជាមនុស្សពូកែនិយាយ ពូកែលេងសើច ទើបពេលឡាយម្ដងៗ មានអ្នកទស្សនារាប់សែន រាប់ម៉ឺននាក់។

អ្វីដែលធ្វើឲ្យអ្នកទស្សនាចូលចិត្ត Speed ទៀតនោះ គឺលោក មានភាពក្រមិកក្រមើម ហើយជាពិសេស គឺពូកែកំប្លែង តែងតែធ្វើឲ្យអ្នកទស្សនាផ្ទុះសំណើចគ្រប់វីដេអូ។ បច្ចុប្បន្ននេះ Speed កំពុងតែកម្សាន្តនៅប្រទេសថៃ ដែលលោកកំពុងតែទាក់ទាញចំណាប់អារម្មណ៍យ៉ាងខ្លាំងនៅក្នុងបណ្ដាញសង្គម។

បន្ថែមពីនេះ តារាប្រុស ស្បែកខ្មៅរូបនេះ នឹងមកដល់កម្ពុជានៅប៉ុន្មានថ្ងៃខាងមុខនេះហើយ គេរំពឹងដែរថា Speed នឹងធ្វើឲ្យប្រទេសខ្មែរយើង កាន់តែមានបរទេសស្គាល់កាន់តែច្រើន ទាក់ទាញពួកទេសចរឲ្យចាប់អារម្មណ៍មកកាន់យើងបន្ថែមទៀត៕