ក្រសួងសុខាភិបាល ចុះអនុស្សរណៈយោគយល់គ្នា ជាមួយ SingHealth សិង្ហបុរី លើ ៣ ចំណុចសំខាន់

វេជ្ជបណ្ឌិត ងូវ កាង រដ្ឋលេខាធិការ ក្រសួងសុខាភិបាល បានចូលរួមជាអធិបតីក្នុង ពិធី ចុះហត្ថលេខាអនុស្សរណៈយោគយល់គ្នា (MOU) រវាងក្រសួងសុខាភិបាល និង SingHealth នៃប្រទេសសិង្ហបុរី នៅថ្ងៃទី១៩ ខែកញ្ញា ឆ្នាំ២០២៤ នៅទីស្តីការក្រសួងសុខាភិបាល។ ការចុះហត្ថលេខាលើអនុស្សរណៈយោគយល់នេះ ធ្វើឡើងរវាង សាស្ត្រាចារ្យ សុខ ជួរ អគ្គនាយករងបច្ចេកទេសសុខាភិបាល តំណាង វេជ្ជបណ្ឌិត ហុក គឹមចេង អគ្គនាយកបច្ចេកទេសសុខាភិបាល និង សាស្ត្រាចារ្យ Tan Hiang Khoon ប្រធាន Sing Health វិទ្យាស្ថានសុខភាពពិភពលោក។

អនុស្សរណៈយោគយល់គ្នានេះ រៀបចំឡើងមានគោលបំណងសំខាន់ៗ មួយចំនួនដូចជា៖ ១. រៀបចំមគ្គុទេសក៍ និងគោលការណ៍ណែនាំ ស្តីពី វិធីសង្គ្រោះជំងឺគាំងបេះដូង ២. ពង្រឹងសមត្ថភាពធនធានមនុស្សផ្នែកសង្គ្រោះបឋម និងសង្គ្រោះបន្ទាន់ និង ៣. ការបណ្តុះបណ្តាលសហគមន៍ ស្តីពី ការសង្គ្រោះករណីគាំងបេះដូង។

នៅក្នុងពិធីនោះ រដ្ឋលេខាធិការបានថ្លែងអំណរគុណទៅដល់ SingHealth នៃប្រទេសសិង្ហបុរី ដែលតែងតែបានជួយឧបត្ថម្ភគាំទ្រវិស័យសុខាភិបាល នៃព្រះរាជាណាចក្រកម្ពុជា និងជំរុញលើកទឹកចិត្តឱ្យភាគីទាំងពីរខិតខំអនុវត្តឱ្យសម្រេចនៅគោលបំណងដែលបានកំណត់ក្នុងការចុះអនុស្សរណៈយោគយល់គ្នានេះ៕