ព័ត៌មានអន្ដរជាតិ

មេទ័ពប៉ូឡូញ ប្រកាសត្រៀមខ្លួនធ្វើសង្គ្រាមជាមួយ រុស្ស៊ី

បានផុស

១ year មុន

នៅ

ថ្ងៃពុធ ១៣ វិច្ឆិកា ២០២៤

ដោយ

តាមការចុះផ្សាយរបស់ RT កាលពីថ្ងៃអង្គារទី១២ខែវិច្ឆិកាឆ្នាំ២០២៤ មេទ័ពប៉ូឡូញលោក Wieslaw Kukula បានប្រកូកប្រកាសឲ្យកងទ័ពនិងជនស៊ីវិលទាំងអស់ ត្រូវត្រៀមលក្ខណៈទប់ទល់ជាមួយនឹងការគំរាមកាន់តែខ្លាំងពីសំណាក់ប្រទេសរុស្ស៊ី ឬអាចឈានដល់ការផ្ទុះសង្គ្រាមទៀតផង។

មេទ័ពប៉ូឡូញលោក Wieslaw Kukula (រូបថត៖ AP)

លោកនិយាយថា ទីក្រុងវ៉ាសូវី ត្រូវតែត្រៀមខ្លួនការពារជាតិ ជាមួយនឹងសមត្ថភាពយោធាដ៏អស្ចារ្យ និងសង្គមមួយដែលរឹងមាំ ព្រោះកាលណាប្រទេសមួយខ្លាំង សត្រូវមិនអាចបង្កហានិភ័យបានឡើយ។ យើងមិនអាចមើលស្រាលលទ្ធភាពនៃការកើតសង្គ្រាមបានទេ។ យើងត្រូវតែត្រៀមខ្លួនធ្វើសង្គ្រាមជានិច្ច។

ស្របពេលជាមួយគ្នានោះ មេទ័ពរូបនេះព្រមានថា ចាប់តាំងពីចុងឆ្នាំ២០២១មក ចេតនារបស់ទីក្រុងមូស្គូមិនដែលផ្លាស់ប្តូរឡើយ ហើយលោកប្រធានាធិបតីរុស្ស៊ី Vladimir Putin និងរដ្ឋមន្ត្រីការបរទេស Sergey Lavrov តែងបង្ហាញចេតនានេះច្បាស់ៗ។ លោកអះអាងថា រុស្ស៊ីអាចកេងចំណេញសេណារីយ៉ូដែលអង្គការណាតូកំពុងបែកបាក់គ្នាឬការជាប់ដៃរបស់អាមេរិកក្នុងជម្លោះប៉ាស៊ីហ្វិក ដើម្បីបង្កើនសកម្មភាពយោធារបស់ខ្លួន។

រឿងនេះធ្វើឲ្យគេនឹកឃើញដល់កាលពីចុងឆ្នាំមុន ដែលប្រធានសន្តិសុខជាតិប៉ូឡូញ ព្រមានថា អង្គការណាតូ សល់ពេលត្រឹម៣ឆ្នាំទៀតប៉ុណ្ណោះ ដើម្បីត្រៀមខ្លួនសម្រាប់ការវាយប្រហាររបស់រុស្ស៊ី។

ដើមឡើយនៅក្នុងរបាយការណ៍ដ៏គួរឲ្យព្រួយបារម្ភមួយ ពីសំណាក់ក្រុមអ្នកជំនាញអាល្លឺម៉ង់បានអះអាងថា សម្ព័ន្ធភាពណាតូ ត្រូវតែត្រៀមខ្លួនឲ្យរួចរាល់ ដើម្បីទប់ទល់នឹងការវាយប្រហាររបស់រុស្ស៊ីក្នុងរយៈពេលពី ៦ ទៅ ១០ ឆ្នាំទៀត ប៉ុន្តែបើតាមលោក Jacek Siewiera ប្រធានការិយាល័យសន្តិសុខជាតិរបស់ប៉ូឡូញ បានសង្កត់ធ្ងន់ថា របាយការណ៍នេះ ហាក់ដូចជាមើលស្រាលពេលវេលាពេកហើយ ។

លោកប្រាប់កាសែត Nasz Dziennik នាពេលនោះថា «តាមគំនិតខ្ញុំ ពេលវេលាដែលបង្ហាញដោយអ្នកវិភាគអាល្លឺម៉ង់ គឺមានសុទិដ្ឋិនិយមខ្លាំងពេក។ ប្រសិនបើយើងចង់ចៀសវាងសង្គ្រាម, ប្រទេសណាតូនៅប៉ែកខាងកើត គួរតែប្រកាន់យករយៈពេលខ្លីជាង ៣ ឆ្នាំ ដើម្បីត្រៀមខ្លួនសម្រាប់ការប្រឈមមុខដាក់គ្នា។ នេះគឺជាពេលវេលាសក្តានុពលមួយ ដែលត្រូវតែបង្កើតឡើងនៅចំហៀងខាងកើត ហើយនឹងក្លាយជាសញ្ញាច្បាស់លាស់ក្នុងការទប់ស្កាត់ការលុកលុយណាមួយ»។

ពាក់ព័ន្ធបញ្ហានេះ ទីក្រុងមូស្គូតែងបដិសេធម្តងហើយម្តងទៀត នូវចេតនាណាវាយប្រហាររដ្ឋជាសមាជិកណាតូ ដោយថ្មីៗនេះ លោកពូទីន បានចោទប្រកាន់ថា ការព្រមានអំពីសកម្មភាពរបស់រុស្ស៊ីពីសំណាក់លោកខាងលិច គឺគ្រាន់តែមានគោលបំណងធ្វើឲ្យពលរដ្ឋព្រួយបារម្ភ និងជាលេសដើម្បីបង្កើនកញ្ចប់ថវិកាការពារជាតិនៅក្នុងប្រទេសពួកគេប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ ប៉ូឡូញព្រមានថា ណាតូ សល់ពេល៣ឆ្នាំទៀតប៉ុណ្ណោះ ដើម្បីត្រៀមខ្លួនសម្រាប់ការវាយប្រហាររបស់រុស្ស៊ី