ទៅ​​ដល់​ខេត្តក្រចេះរដូវនេះ! កុំភ្លេចសាក​រសជាតិសម្លត្រីឆ្កោក រដូវ​ទឹកស្រក​​សំបូរ​ត្រី​​ចុះ​តាមព្រែក​បឹង

ត្រីឆ្កោកមូល គឺជាត្រីមួយប្រភេទ ដែលមានសាច់ល្អជាងគេ ក្នុងចំណោមត្រីឆ្កោកផ្សេងៗទៀត។ ខេត្តក្រចេះ​ដែល​ជា​ខេត្ត​ជាប់​ដង​ទន្លេ ត្រី​ជា​អាហារ​ដ៏ពេញនិយម ហើយ​ភ្ញៀវទេសចរដែលចូលចិត្តបរិភោគសាច់ត្រី ឲ្យតែមកដល់ខេត្តក្រចេះ គឺនឹក​ឃើញសម្លសាច់ត្រីមុនគេ។

លោក ម៉ុក ពន្លក នាយខណ្ឌជលផលនៃមន្ទីរកសិកម្ម រុក្ខាប្រមាញ់ និងនេសាទ ខេត្តក្រចេះ បានឲ្យកម្ពុជាថ្មី​ដឹងថា ភ្ញៀវទេសចរ​ភាគច្រើនដែលមកលេង​ខេត្តក្រចេះ ជាពិសេសគឺអ្នកដែលចូលចិត្តបរិភោគសាច់ត្រីឲ្យតែមកដល់ខេត្តក្រចេះ គឺនឹក​ឃើញសម្លសាច់ត្រីមុនគេ។

រដូវនេះ​ទៀតសោត​ លោក ម៉ុក ពន្លក បាន​អះអាង​ថា ត្រីដែលពេញនិយមជាងគេគឺត្រីឆ្កោក ដែលអាចយកមកធ្វើម្ហូប ស្ងោរជ្រក់ ឬចំហុយជាដើម។ ប្រសិនបើត្រីឆ្កោក ខ្សត់មិនសូវសំបូរ គឺនៅមានត្រីក្អែក ហើយត្រីក្អែកដែល​ធំៗចាប់ពី ៣ គីឡូឡើងទៅ គឺសាច់ត្រីស្វិត ហើយផ្អែម។ ក្រៅពីនេះ ក៏​នៅមានត្រីកេះដែលអាចយកទៅប្រឡាក់ អាំង ចៀន ពោលគឺមានរសជាតិឆ្ងាញ់ពិសារ​។

នៅក្នុងរដូវទឹកស្រក ត្រីចេញមកតាមព្រែក បឹង គឺសំបូរប្រភេទត្រីឆ្កោក កូនត្រីកេះ ត្រីក្លាំងហាយ ត្រីក្រឡង់ ត្រីរៀល ត្រីរ៉ស់ ត្រីឆ្លាំង និងត្រីកញ្ជនជៃជាដើម។

លោកបន្តថា នៅឆ្នាំនេះទឹកទន្លេមេគង្គបានហក់ឡើង​កម្ពស់​ ២១,៧៤ម៉ែត្រ ដែល​ធ្វើឲ្យទឹកទន្លេមេគង្គហូរតាម​ព្រែក បឹង និង​អាង​ស្តុកទឹកពេញល្អ ធ្វើឲ្យមច្ឆាជាតិចូលទៅពងកូន ហើយរក​ចាប់ចំណីនៅតាមតំបន់ព្រៃលិចទឹក។ ប៉ុន្តែដល់ពេលទឹកស្រក រដូវធ្លាក់ខ្យល់ ខែកត្តិកនេះ ត្រីចាប់ផ្ដើមត្រឡប់ចុះមកវិញ តាមខ្សែទឹកហូរចូលមកទន្លេមេគង្គ៕

អត្ថបទ ប្រុញ វិធិន