សេដ្ឋកិច្ច

កម្ពុជារកចំណូលបានជិត $៤២ លាន ពីការលក់សំបុត្រចូលទស្សនាអង្គរ

បានផុស

១ year មុន

នៅ

ថ្ងៃចន្ទ ២ ធ្នូ ២០២៤

ដោយ

គិតត្រឹមរយៈពេល ១១ ខែ ឆ្នាំ ២០២៤ មានភ្ញៀវទេសចរបរទេសជិត ៩០ ម៉ឺននាក់ បានទិញសំបុត្រចូលទស្សនា រមណីយដ្ឋានអង្គរ ដែលធ្វើឱ្យកម្ពុជារកចំណូលបានប្រមាណជិត ៤២ លានដុល្លារ មានការកើនឡើង ២៨,៧៦ ភាគរយ ប្រៀបធៀបរយៈពេលដូចគ្នានៅឆ្នាំ ២០២៣។

យោងតាមរបាយការណ៍របស់គ្រឹះស្ថានអង្គរចេញផ្សាយនៅថ្ងៃទី ០២ ខែធ្នូ ឆ្នាំ ២០២៤ បង្ហាញថា គិតចាប់ពីខែមករា-វិច្ឆិកា មានភ្ញៀវទេសចរបរទេសចំនួន ៨៩៨ ៣៣៩ នាក់បានទិញសំបុត្រចូលទស្សនារមណីយដ្ឋានអង្គរកើនឡើង ២៨,៣៣% ខណៈប្រាក់ចំណូលទទួលបានពីការលក់សំបុត្រចំនួន ៤១ ៩០៨ ៨៣៣ ដុល្លារ កើនឡើង ២៨,៧៦% ប្រៀបធៀបរយៈពេលដូចគ្នានៅឆ្នាំ ២០២៣។

លោក ខៀវ ធី ប្រធានសមាគមន៍មគ្គុទ្ទេសក៍ទេសចរអង្គរបានឱ្យដឹងថា កំណើនភ្ញៀវទេសចរណ៍ក្នុងខែវិច្ឆិកា បានកើនឡើងច្រើនបានធ្វើឱ្យចំណូលកើនឡើងផងដែរ ខណៈវិស័យទេសចរណ៍ជាមាសបៃតង បើមានភ្ញៀវទេសចរកាន់តែច្រើន គឺអាចបង្កើតការងារឱ្យមនុស្សទូទៅ មិនចំពោះតែប្រតិបត្តិករទេសចរណ៍ទេ អ្នកប្រកបរបរកសិកម្មក៏ទទួលផលដែរ។

លោក ធួន ស៊ីណាន ប្រធានសមាគមទេសចរណ៍អាស៊ី ប៉ាស៊ីហ្វិក (PATA) បានផ្ដល់យោបល់ឱ្យរដ្ឋាភិបាល និងវិស័យឯកជនត្រូវខិតខំប្រឹងប្រែងទាក់ទាញភ្ញៀវទេសចរណ៍បន្ថែមទៀត នៅចំពេលដែលពិភពលោកកាន់តែរួមតូចនៅក្នុងទីផ្សារ ដែលមានការប្រកួតប្រជែង៕

អត្ថបទ ៖ ឡេង ដេត