គម្រោងពង្រីកកំណាត់ផ្លូវជាតិលេខ ៧ ចំណាយថវិកាជាង ១០០ លានដុល្លារ សម្រេចបានការសាងសង់ជិត ៣០ ភាគរយ

គិតត្រឹមដំណាច់ ខែតុលា ឆ្នាំ ២០២៤ គម្រោងពង្រីកកំណាត់ផ្លូវជាតិលេខ៧ ចាប់ពីរង្វង់មូល​ស្គន់​ទៅទីរួមខេត្តកំពង់ចាម​ សម្រេចបានការសាងសង់ប្រមាណ ២៧,៤៥ ភាគរយ ដែលផ្លូវជាតិនេះដើរតួនាទីដ៏សំខាន់មិនត្រឹមតែជួយសម្រួលដល់ការដឹកជញ្ជូនប៉ុណ្ណោះទេ ប៉ុន្តែវាក៏នឹងចូលរួមចំណែកដល់ការជំរុញសកម្មភាពសេដ្ឋកិច្ចទាំងថ្នាក់ខេត្ត និងជាតិផងដែរ។

លោក ផន រឹម អ្នកនាំពាក្យក្រសួងសាធារណការ និងដឹកជញ្ជូនបានឱ្យដឹងនៅថ្ងៃទី ០៣ ខែធ្នូ ឆ្នាំ ២០២៤នេះថា​ គិតត្រឹមដំណាច់​ខែតុលា ឆ្នាំ២០២៤ ការអនុវត្តគម្រោងសាងសង់ផ្លូវជាតិលេខ៧ (ស្គន់-កំពង់ចាម) សម្រេចបានលទ្ធផលជារួម ២៧,៤៥% ជាមួយនឹងការ​ដោះស្រាយផលប៉ះពាល់សឹងតែសម្រេចទាំង​ស្រុង​។

គម្រោងពង្រីកកំណាត់ផ្លូវជាតិលេខ៧ មានប្រវែង ៤៥ គីឡូម៉ែត្រ នឹងត្រូវពង្រីកពី២ គន្លងទៅ ៤ គន្លង បានបើកការដ្ឋាន​សាង​សង់កាល​ពី​ថ្ងៃទី ០៩ ខែមករា ឆ្នាំ ២០២៣ ក្រោមកម្ចីសម្បទានជាង ១០០ លានដុល្លារ​របស់​រដ្ឋាភិបាលចិន។

គម្រោងពង្រីក និងលើកកម្រិតគុណភាពផ្លូវជាតិលេខ ៧ នេះ សាងសង់ដោយក្រុមហ៊ុន​សាជីវកម្មស្ពាន និងថ្នល់​ចិន (CRBC) ដោយប្រើរយៈពេលសាងសង់ ៤០ ខែ ហើយគ្រោង​នឹង​បញ្ចប់​នៅឆ្នាំ ២០២៦ ចំណាយថវិកាសរុប ១១៧ លានដុល្លារ​ ដែលជាឥណ​ទាន​សម្បទាន​ពីរដ្ឋាភិបាលនៃ​សាធារណរដ្ឋប្រជា​មានិត​ចិន និង​ថវិកា​បដិភាគរបស់រាជរដ្ឋាភិ​បាលកម្ពុជា ដើម្បី​ដោះស្រាយ​ផលប៉ះ​ពាល់ ការបោស​សម្អាត​គ្រាប់មីន យុទ្ធភ័ណ្ឌមិនទាន់ផ្ទុះ និងពន្ធអា​ករ​ផ្សេងៗ៕

អត្ថបទ៖ ឡេង ដេត