ព័ត៌មានជាតិ

លោក យក់ ប៊ុនណា ៖ អ្នកភូមិរកាធំ ត្រេកអរពេលទទួលបាន «ស្លាកលេខផ្ទះ-ផ្លូវ ក្រោមម្លប់សន្តិភាព»

បានផុស

២ years មុន

នៅ

ថ្ងៃចន្ទ ៦ មករា ២០២៥

ដោយ

លោក យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ និងជានាយកសាលាភូមិន្ទរដ្ឋបាល បានលើកឡើងថា អ្នកភូមិរកាធំ ត្រេកអរ ពេលទទួលបាន «ស្លាកលេខផ្ទះ-ផ្លូវ ក្រោមម្លប់សន្តិភាព»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងនេះ ក្នុងឱកាស លោក យក់ ប៊ុនណា អញ្ជើញចូលរួមក្នុងពិធីសម្ពោធសមិទ្ធផលការងារសង្គមលើគម្រោងភូមិគំរូ«ស្លាកលេខផ្ទះ-ផ្លូវ ក្រោមម្លប់សន្តិភាព» ស្ថិតនៅភូមិរកាធំ សង្កាត់រកាធំ ក្រុងច្បារមន ខេត្តកំពង់ស្ពឺ កាលពីរសៀលថ្ងៃទី ០៥ ខែមករា ឆ្នាំ ២០២៥ ម្សិលមិញ។

នាឱកាសនោះ លោក យក់ ប៊ុនណា រដ្ឋលេខាធិការប្រចាំការ បានកោតសរសើរវាយតម្លៃខ្ពស់លើគម្រោងភូមិគំរូ «ស្លាកលេខផ្ទះ-ផ្លូវក្រោមម្លប់សន្តិភាព» នេះ ដោយលើកឡើងបន្តថា មិនត្រឹមតែបម្រើជាប្រយោជន៍ដល់ប្រជាពលរដ្ឋ និងអាជ្ញាធរ នោះទេ ប៉ុន្តែបានរួមចំណែកធ្វើឲ្យសម្រេចនូវគោលនយោបាយភូមិ-ឃុំ-សង្កាត់ មានសុវត្ថិភាព ដែលប្រមុខរាជរដ្ឋាភិបាលបានដាក់ចេញឲ្យអនុវត្ត។

ទន្ទឹមនោះ លោក យក់ ប៊ុនណា បានអំណរគុណយ៉ាងជ្រាលជ្រៅដល់កិច្ចខិតខំរបស់កម្មសិក្សាការីវគ្គវិក្រឹតការមន្ត្រីមធ្យម ថ្នាក់នវានុវត្តន៍ និងអាជ្ញាធរមូលដ្ឋាន ដែលសហការគាំទ្រយ៉ាងពេញទំហឹងក្នុងការអនុវត្តគម្រោងការងារសង្គមនេះរហូតសម្រេចបានជោគជ័យ ទទួលបានការសាទរត្រេកអរពីអ្នកភូមិរកាធំទាំងមូល។

ដោយឡែក លោកស្រី ឡា បុប្ផា តំណាងកម្មសិក្សាការីវគ្គវិក្រឹតការមន្ត្រីមធ្យមថ្នាក់នវានុវត្តន៍ទាំងអស់ ក៏បានថ្លែងអំណរគុណដល់ថ្នាក់ដឹកនាំគ្រប់ថ្នាក់ដែលផ្ដល់ឱកាសឲ្យកម្មសិក្សាការីទទួលបានចំណេះដឹងថ្មីៗ ពីកិច្ចការងារសង្គមផ្ទាល់ ដែលបានបង្ហាញឲ្យឃើញពីឆន្ទៈរួម ស្មារតីសាមគ្គីភាព និងភាតរភាព តាមរយៈការចំណាយទាំងថវិកាផ្ទាល់ខ្លួន កម្លាំងកាយ បញ្ញាស្មារតី ផលិត និងបំពាក់ស្លាកលេខផ្ទះប្រជាពលរដ្ឋចំនួន ២៦១ ខ្នងផ្ទះ ដាំបង្គោលលេខផ្លូវចំនួន ០៥ បង្គោល (១០ សន្លឹក)។

ជាមួយនេះ កម្មសិក្សាការីថ្នាក់នវានុវត្តន៍ ក៏បានចូលរួមឧបត្ថម្ភបន្ថែមនូវកុំព្យូទ័រយួរដៃចំនួន ០១ គ្រឿង និងម៉ាស៊ីនព្រីនធ័រ(ពណ៌) ជូនដល់រដ្ឋបាលសាលាសង្កាត់រកាធំ ដើម្បីប្រើប្រាស់សម្រាប់បម្រើសេវាជូនប្រជាពលរដ្ឋឲ្យកាន់តែល្អប្រសើរ ប្រកបដោយប្រសិទ្ធភាព និងស័ក្ដិសិទ្ធិភាពផងដែរ។

សូមជម្រាបថា ពិធីសម្ពោធសមិទ្ធផលការងារសង្គមលើគម្រោងភូមិគំរូ«ស្លាកលេខផ្ទះ-ផ្លូវ ក្រោមម្លប់សន្តិភាព» នេះ ក៏មានការអញ្ជើញចូលរួមពីសំណាក់ លោក ស សាម៉ឺឌី គណៈគ្រប់គ្រង និងមន្ត្រីរាជការ នៃសាលាភូមិន្ទរដ្ឋបាល អភិបាលក្រុងច្បារមន ព្រមទាំងសហការី ចៅសង្កាត់ កម្មសិក្សាការី និងប្រជាពលរដ្ឋ នៅភូមិរកាធំ សង្កាត់រកាធំ ផងដែរ៕