អ្នកនាំពាក្យ៖ ពីរថ្ងៃនៃការអនុវត្តច្បាប់ចរាចរណ៍នៅផ្លូវ៦០ម៉ែត្រមានពលរដ្ឋចូលរួមសហការច្រើន និងបានពិន័យអ្នកបើកបរល្មើសល្បឿនមួយចំនួន

លោកវរសេនីយ៍ឯក សំ វិច្ឆិកា អ្នកពាក្យនៃស្នងការដ្ឋាននគរបាលរាជធានីភ្នំពេញ បានឲ្យដឹងនៅល្ងាចថ្ងៃទី២៣ ខែមករា ថា​ រយៈពេលពីរថ្ងៃនៃការអនុវត្តច្បាប់ចរាចរណ៍នៅលើកំណាត់ផ្លូវ៦០ម៉ែត្រ ក្នុងមូលដ្ឋានខណ្ឌមានជ័យ និងខណ្ឌដង្កោ មានពលរដ្ឋចូលរួមសហការច្រើន ដោយមិនមានបាតុភាពអ្វីកើតឡើងនោះទេ ហើយក៏បានផាកពិន័យយានយន្ដល្មើសល្បឿនកំណត់មួយចំនួន និងអប់រំមួយចំនួនផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវរសេនីយ៍ឯក សំ វិច្ឆិកា បន្ថែមថា ការអនុវត្តរឹតបណ្ដឹងច្បាប់ចរាចរណ៍នៅលើផ្លូវ៦០ម៉ែត្រនៅថ្ងៃទី២១ និងថ្ងៃទី២២ មករា គឺអនុវត្តលើអ្នកបើកបររថយន្ដល្មើសល្បឿនចាប់ពី ៧០គីឡូម៉ែត្រក្នុងមួយម៉ោងឡើងទៅ ក្នុងនោះអ្នកបើកបរល្មើសល្បឿនពី ៧០ ទៅ៧៩ គីឡូម៉ែត្រក្នុងមួយម៉ោង មានចំនួន ៣៧គ្រឿង ល្មើសល្មឿនពី ៨០ ទៅ៨៩ ក្នុងមួយម៉ោងមានចំនួន ៥គ្រឿង​ និងល្មើសល្បឿនពី ៩០ ទៅ ៩៩គីឡូម៉ែត្រក្នុងមួយម៉ោងមានចំនួន១គ្រឿង។ លោក សំ វិច្ឆិកា បន្ថែមថា ចំពោះយានយន្ដដែលបើកបរក្នុងល្បឿនចាប់ពី ៦៩គីឡូម៉ែត្រក្នុងមួយម៉ោងចុះក្រោម គឺកម្លាំងនគរបាលជំនាញបានអនុវត្តវិធានការអប់រំ មានចំនួន២៦គ្រឿង។

បើតាមអ្នកនាំពាក្យស្នងការដ្ឋាននគរបាលរាជធានីភ្នំពេញ រយៈពេលពីរថ្ងៃនៃការអនុវត្តរឹតបណ្ដឹងច្បាប់ចរាចរណ៍នៅលើផ្លូវ៦០ម៉ែត្រ តាមការសង្កេតមានប្រជាពលរដ្ឋ ជាពិសេសអ្នកបើកបរយានយន្ដបានចូលរួមសហការជាមួយកម្លាំងសមត្ថកិច្ចច្រើន បើកបរមានសុវត្ថិភាព ហើយចំពោះអ្នកបើកបរល្មើសល្បឿន និងត្រូវបានផាកពិន័យនោះ ក៏មិនមានការតវ៉ាអ្វីនោះដែរ។

អ្នកនាំពាក្យរូបនេះបន្ថែមថា ការអនុវត្តរឹតបណ្ដឹងច្បាប់ចរាចរណ៍ផ្លូវគោកនៅលើកំណាត់ផ្លូវ៦០ម៉ែត្រនេះ កម្លាំងជំនាញនៅតែអនុវត្តជាបន្តបន្ទាប់តាមការណែនាំរបស់ថ្នាក់ដឹកនាំ៕