G-Devith ៖ បុគ្គលដែលអាចហែកមេឃចេញបាន មានន័យថា អ្នកនោះអាចរួចពីសំណាញ់ច្បាប់ហើយ

តារាចម្រៀងរ៉េបលោក ងួន ចាន់ដាវិត ហៅ G-Devith បានចេញមកបញ្ជាក់ជាថ្មីថា បុគ្គលគ្រប់រូបដែលនៅក្រោមមេឃសុទ្ធសឹងតែស្ថិតនៅក្រោមច្បាប់ជាតិ និងអន្តរជាតិ។ ចំណែកឯបុគ្គលណាដែលអាចហែកមេឃចេញបាន មានន័យថាអ្នកនោះអាចរួចពីសំណាញ់ច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចេញមកលើកឡើងរបស់តារាចម្រៀងរ៉េប G-Devith ខាងលើកនេះ គឺស្របពេលដែលនៅលើផេកផ្លូវការបស់ UNICEF Cambodia កាលពីរសៀលថ្ងៃទី១២ ខែកុម្ភ: ឆ្នាំ២០២៥ បានចេញសេចក្ដីថ្លែងការណ៍របស់លោកបណ្ឌិត Will Parks នាយកយូនីសេហ្វប្រចាំកម្ពុជាទាក់ទងនឹងករណីរបស់កូនប្រុសរបស់ខ្លួន ពាក់ព័ន្ធសិទ្ធិកុមារ។

លោក G-Devith បានសរសេរខ្លឹមសារបង្ហោះភ្ជាប់ជាមួយចេញសេចក្ដីថ្លែងការណ៍នោះថា “បុគ្គលគ្រប់រូបដែលនៅក្រោមមេឃសុទ្ធសឹងតែស្ថិតនៅក្រោមច្បាប់ជាតិនិងអន្តរជាតិ ប្រសិនបើបុគ្គលណាដែលអាចហែកមេឃចេញបាន នោះមានន័យថា អ្នកនោះអាចរួចពីសំណាញ់ច្បាប់ហើយ“។ តារាចម្រៀងរ៉េបរូបនេះ បានបន្ថែមអត្ថន័យដោយខ្លីទៀតថា “ផែនដីមានច្បាប់ គ្រួសារមានវិន័យ”។

នៅក្នុងសេចក្ដីថ្លែងការណ៍របស់លោកបណ្ឌិត Will Parks នាយកយូនីសេហ្វប្រចាំកម្ពុជាបានឱ្យដឹងថា នាពេលថ្មីៗនេះ បណ្តាញសារព័ត៌មាននិងអ្នកប្រើប្រាស់បណ្តាញទំនាក់ទំនងសង្គម កំពុងចែករំលែកព័ត៌មានជាច្រើនរបស់លោក ងួន ចាន់ដាវិត (G-Devith) ដែលពាក់ព័ន្ធនឹងការចោទប្រកាន់អំពីការប្រមាថតាមអនឡាញមកលើកូនរបស់លោក។

នៅក្នុងសេចក្ដីថ្លែងការណ៍របស់យូនីសេហ្វ ក៏បានលើកទឹកចិត្តឱ្យរាយការណ៍អំពីករណីនេះជូនដល់អាជ្ញាធរពាក់ព័ន្ធផងដែរ។

គួរបញ្ជាក់ថានារយ:ពេលប៉ុន្មានថ្ងៃមកនេះ នៅលើបណ្តាញសង្គមហ្វេសប៊ុកបានផ្ទុះនូវរឿងរ៉ាវក្តៅគគុកមួយសម្រាប់ក្រុមគ្រួសាររបស់តារាចម្រៀងរ៉េប G-Devith និងអ្នកនាង ទេព បូព្រឹក្ស ក្រោយផេកឈ្មោះអាក្លូបានបង្ហោះវីដេអូប្រើពាក្យសម្តីប៉ះពាល់ដល់កូនរបស់ពួកគេ។

ក្នុងនាមជាឪពុក-ម្តាយតារាចម្រៀងរ៉េបលោក G-Devith និងតារាចម្រៀងស្រី ទេព បូព្រឹក្ស ក៏ប្រកាសដំណឹងភ្លាមៗថាពួកគេធ្វើតាមនិតិវិធីច្បាប់ទៅចំពោះផេក «អាក្លូ» ក្រោយបញ្ជូលសំឡេង Troll ប៉ះពាល់ដល់កូនប្រុសរបស់អ្នកទាំងពីរ៕ អត្ថបទ៖​ ចាន់រ៉ា

អត្ថបទពាក់ព័ន្ធ៖
UNICEF ចេញសេចក្តីថ្លែងការណ៍ទាក់ទងនឹងករណីកូនប្រុស G-Devith ដោយគូសបញ្ជាក់ ២ចំណុចធំ