យន្តហោះដឹករដ្ឋមន្ត្រីការបរទេសអាមេរិក ទៅអាល្លឺម៉ង់ ជួបបញ្ហាលើអាកាស

យន្តហោះទ័ពអាកាសអាមេរិកដឹករដ្ឋមន្ត្រីការបរទេស Marco Rubio ទៅចូលរួមជំនួបកំពូលនៅប្រទេសអាល្លឺម៉ង់ បានជួបបញ្ហាបច្ចេកទេសលើអាកាស ហើយត្រូវហោះបកមកអាកាសយានដ្ឋាន Joint Base Andrews វិញ ជាបន្ទាន់។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Reuters នៅថ្ងៃសុក្រទី១៤ខែកុម្ភៈឆ្នាំ២០២៥, យន្តហោះដែលមានបញ្ហាគឺជាប្រភេទ Boeing C-32 ដោយគេឃើញមានស្នាមប្រេះនៅត្រង់កញ្ចក់កាប៊ីន ខណៈអ្នកនាំពាក្យក្រសួងការបរទេសលោកស្រី Tammy Bruce ប្រាប់អ្នកសារព័ត៌មានថា យន្តហោះនេះជួបបញ្ហាក្រោយហោះបាន៩០នាទី រួចក៏ហោះបកមកវិញ ហើយចុះចតដោយសុវត្ថិភាពនៅមុនម៉ោង១០យប់ (ម៉ោងនៅអាមេរិក)។

ក្រោយជួបបញ្ហានេះ គេមិនដឹងថាតើ លោក Rubio នឹងទៅទាន់សម្រាប់កិច្ចប្រជុំតាមការគ្រោងទុកជាមួយអនុប្រធានាធិបតីអាមេរិក JD Vance និងប្រធានាធិបតីអ៊ុយក្រែន Volodymyr Zelenskiy នៅខាងក្រៅសន្និសីទសន្តិសុខទីក្រុង Munich ដើម្បីពិភាក្សាគ្នាអំពីវិបត្តិសង្គ្រាមរុស្ស៊ី ដែរឬអត់។

សូមបញ្ជាក់ជាថ្មី សន្និសីទសន្តិសុខទីក្រុង Munich (MSC) ឆ្នាំ២០២៥ បានចាប់ផ្តើមក្នុងប្រទេសអាល្លឺម៉ង់ នៅថ្ងៃទី១៤ខែកុម្ភៈឆ្នាំ២០២៥ ដោយទីកន្លែងរៀបចំគឺសណ្ឋាគារ Bayerischer Hof។ 

សន្និសីទឆ្នាំនេះ កើតឡើងស្របពេល ពិភពលោកកំពុងញាំញីដោយព្រឹត្តិការណ៍នយោបាយសំខាន់ៗ ដូចជាការចាប់ផ្តើមនៃរដ្ឋបាលថ្មីរបស់សហរដ្ឋអាមេរិក និងការបោះឆ្នោតសភាអាល្លឺម៉ង់ក្នុងខែកុម្ភៈនេះឯង។

មេដឹកនាំជាន់ខ្ពស់ជាង៥០០នាក់មកពីជាង៧០ប្រទេស នឹងចូលរួមក្នុងសន្និសីទឆ្នាំនេះ ហើយបុគ្គលដែលគេចាប់អារម្មណ៍បំផុតគឺ ប្រធានាធិបតីអ៊ុយក្រែនលោក Volodymyr Zelenskyy, អនុប្រធានាធិបតីអាមេរិក JD Vance និងមេដឹកនាំគណបក្សប្រឆាំងអាល្លឺម៉ង់ និងជាបេក្ខជនអធិការបតីដ៏មានសក្តានុពលគឺលោក Friedrich Merz។

គ្មានអ្វីត្រូវសង្ស័យឡើយ ប្រធានបទសំខាន់ឆ្នាំនេះ នឹងនៅតែជាសង្គ្រាមរុស្ស៊ី-អ៊ុយក្រែនដដែល ខណៈប្រធានបទធំផ្សេងទៀតមានដូចជា ទំនាក់ទំនងអាមេរិក-ចិន, ការគំរាមកំហែងសន្តិសុខទាក់ទងនឹងអាកាសធាតុ, តួនាទីរបស់អង្គការណាតូ និងសម្ព័ន្ធមិត្តផ្សេងទៀតនៅក្នុងពិភពលោកដែលកំពុងស្ថិតក្នុងភាពមិនប្រាកដប្រជា៕

អត្ថបទ៖ សុខ សុវណ្ណ

ចុចអាន៖ ​រដ្ឋមន្ត្រី​ការពារជាតិ​អាមេរិក​ច្រានចោលការរិះគន់​ដែល​ថា​ រដ្ឋបាល​ត្រាំ​​ក្បត់​សម្ព័ន្ធ​មិត្ត​​​​