ព័ត៌មានអន្ដរជាតិ

មន្ត្រីអាមេរិកមួយចំនួន ចាប់ផ្តើមស្តាយក្រោយ ដែលបោះឆ្នោតឲ្យលោក ត្រាំ

បានផុស

១ year មុន

នៅ

ថ្ងៃអង្គារ ១១ មីនា ២០២៥

ដោយ

មន្រ្តីរដ្ឋការអាមេរិកមួយចំនួន ដែលបោះឆ្នោតឲ្យលោក ដូណាល់ ត្រាំ ចាប់ផ្តើមស្តាយក្រោយហើយ ដោយសារតែគោលនយោបាយរបស់ប្រធានាធិបតីរូបនេះ ធ្វើឲ្យប៉ះពាល់ដល់ការងារ និងសហគមន៍របស់ពួកគេ។

ជាក់ស្តែង បើយោងតាមការចុះផ្សាយរបស់ ABC News កាលពីសប្តាហ៍មុន, លោក Gabriel D’Alatri ដែលជាអតីតទាហានម៉ារីនអាមេរិក គឺស្ថិតក្នុងចំណោមទាហានជើងចាស់ជាង ៦ ០០០នាក់ដែលត្រូវបានបណ្តេញចេញពីការងារ ក្រោមគម្រោង DOGE ដែលដឹកនាំដោយលោក ត្រាំ និង Elon Musk ដើម្បីកាត់បន្ថយការចំណាយរបស់រដ្ឋ។ លោក D’Alatri បានបោះឆ្នោតឲ្យលោក ត្រាំ ប៉ុន្តែឥឡូវគាត់ប្រាប់ថា គាត់ស្តាយក្រោយណាស់ ដោយសារតែគោលនយោបាយថ្មីនេះ។

នៅឯរដ្ឋ West Virginia, មន្រ្តីអាជ្ញាធររដ្ឋបាលហិរញ្ញវត្ថុ១២៥នាក់ ក៏ត្រូវបានបណ្តេញចេញផងដែរ។ ម្នាក់ក្នុងចំណោមនោះ គឺអ្នកនាង Jennifer Piggott ដែលធ្លាប់ជាអ្នកគាំទ្រដ៏ស្មោះស្ម័គ្ររបស់លោក ត្រាំ។ ពេលនេះ អ្នកនាងស្តាយក្រោយនិងខកចិត្តជាខ្លាំង ហើយបារម្ភថា គោលនយោបាយនេះ នឹងប៉ះពាល់ដល់ជីវភាពរស់នៅរបស់ពលរដ្ឋផ្សេងទៀត។

អ្នកនាង Jennifer Piggott (រូបថត៖ Reuters)

ម្នាក់ទៀតឈ្មោះ Nathan Hooven គឺជាអតីតទ័ពអាកាសដែលមានពិការភាព ខណៈគាត់ក៏ត្រូវបណ្តេញចេញពីការងារដែរ ហើយឥឡូវស្ទើរតែបាត់បង់ក្តីសង្ឃឹមអស់ទៅហើយ។

មិនមែនត្រឹមប៉ុណ្ណឹងឡើយ នៅមានអ្នកគាំទ្រលោក ត្រាំ ជាច្រើននាក់ទៀតដែលចាប់ផ្តើមស្តាយក្រោយចំពោះការបោះឆ្នោតឲ្យគាត់ ហើយមានអារម្មណ៍ថា ពួកគេត្រូវគេក្បត់ ខណៈឥឡូវកំពុងប្រឈមនឹងផលលំបាក ក្នុងការរកការងារធ្វើ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សូមបញ្ជាក់ថា ចាប់តាំងពីស្បថចូលកាន់អំណាចសម្រាប់អាណត្តិទីពីរជាប្រធានាធិបតីទី៤៧របស់សហរដ្ឋអាមេរិកមក លោក ត្រាំ បាននាំទៅដល់ការផ្លាស់ប្តូរយ៉ាងខ្លាំងទាំងការកែទម្រង់នយោបាយក្នុងប្រទេសនិងបង្កភាពវឹកវរលើឆាកនយោបាយអន្តរជាតិ។

ក្នុងនោះ ការកាត់បន្ថយបុគ្គលិករដ្ឋគឺជាប្រធានបទដ៏ចម្រូងចម្រាសមួយក្នុងរដ្ឋបាលអាណត្តិនេះ។ យោងតាម Reuters, បុគ្គលិករដ្ឋប្រមាណ ៧៥ ០០០នាក់បានទទួលយកការលាលែងដោយស្ម័គ្រចិត្ត ហើយការបញ្ឈប់បុគ្គលិករដ្ឋគឺមានលើស ៨៤ ០០០នាក់គិតត្រឹមពាក់កណ្តាលខែកុម្ភៈ។

ការបញ្ឈប់បុគ្គលិករដ្ឋរបស់រដ្ឋបាលត្រាំ ក៏បង្កឲ្យមានការចេញតវ៉ានៅមុខសេតវិមានដ៏កម្រផងដែរ។ លើសពីនេះទៅទៀត ព្រឹទ្ធសមាជិកនៃគណបក្សប្រជាធិបតេយ្យជាច្រើនរូបក៏បានចាប់ផ្តើមធ្វើយុទ្ធនាការប្រឆាំងលោកត្រាំ រួចហើយដែរ៕

អត្ថបទ៖ សុខ សុវណ្ណ

ចុចអាន៖ ត្រាំ ប្រកាសជួយទិញ Tesla មួយគ្រឿង ដើម្បីគាំទ្រលោក Musk ខណៈការលក់កំពុងធ្លាក់ចុះ