ព័ត៌មានអន្ដរជាតិ

មេណាតូ សរសើរ ត្រាំ ថាអាចបំបែកភាពជាប់គាំងនៅអ៊ុយក្រែន

បានផុស

១ year មុន

នៅ

ថ្ងៃសុក្រ ១៤ មីនា ២០២៥

ដោយ

Chheang

ក្នុងកិច្ចប្រជុំនៅការិយាល័យរាងពងក្រពើកាលពីថ្ងៃទី១៣ខែមីនា អគ្គលេខាធិការអង្គការណាតូ លោក Mark Rutte បានសរសើរប្រធានាធិបតីអាមេរិក លោក ដូណាល៉ ត្រាំ សម្រាប់តួនាទីសំខាន់របស់គាត់ក្នុងការជំរុញកិច្ចចរចាសន្តិភាពរវាងរុស្ស៊ី និងអ៊ុយក្រែន។

លោក Mark Rutte និងលោក ដូណាល់ ត្រាំ (រូបថត៖ Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Rutte បាននិយាយទៅកាន់លោក ត្រាំ ថា៖ «អ្នកបានចាប់ផ្ដើមការសន្ទនាជាមួយរុស្ស៊ី និងកិច្ចចរចាដ៏ជោគជ័យនៅប្រទេសអារ៉ាប៊ីសាអូឌីត ហើយឥឡូវជាមួយអ៊ុយក្រែនថែមទៀត។ ខ្ញុំពិតជាចង់សរសើរអ្នកណាស់សម្រាប់រឿងទាំងនេះ»។

កិច្ចប្រជុំក៏បានលើកឡើងពីសារៈសំខាន់នៃការរក្សាភាពរឹងមាំ និងឯកភាពរបស់អង្គការណាតូផងដែរ។ លោក Rutte ថែមទាំងសរសើរលោក ត្រាំ ចំពោះការលើកទឹកចិត្តសមាជិកសម្ព័ន្ធមិត្តដើម្បីបង្កើនការចំណាយលើវិស័យការពារជាតិ ដោយបង្ហាញពីការប្តេជ្ញាចិត្តនាពេលថ្មីៗនេះរបស់ចក្រភពអង់គ្លេស និងអាល្លឺម៉ង់ ក្នុងការជំរុញថវិកាសន្តិសុខរបស់ពួកគេ។

លោក ត្រាំ បានសង្កត់ធ្ងន់លើភាពចាំបាច់របស់អង្គការណាតូ ដោយនិយាយថា៖ «អ្នកត្រូវតែរក្សាណាតូឲ្យរឹងមាំ»។ ទន្ទឹមនោះ លោកក៏បានលើកឡើងពីកិច្ចខិតខំប្រឹងប្រែងរបស់រដ្ឋបាលអាមេរិកក្នុងអាណត្តិរបស់លោក សម្រាប់ការជំរុញឲ្យបណ្តាប្រទេសអ៊ឺរ៉ុបសម្រេចបាន និងលើសពីការប្តេជ្ញាចិត្តលើការចំណាយលើវិស័យការពារជាតិរបស់ពួកគេ ដែលដំបូងឡើយកំណត់នៅត្រឹម ២%នៃផលិតផលក្នុងស្រុកសរុប ហើយឥឡូវនេះបានស្នើឡើងដល់ ៥%ឯណោះ។

សូមបញ្ជាក់ថា ជំនួបរវាងប្រមុខណាតូ និងមេដឹកនាំអាមេរិក ធ្វើឡើងចំពេលដែលមានការពិភាក្សាកំពុងបន្តសម្រាប់បទឈប់បាញ់រយៈពេល ៣០ថ្ងៃសម្រាប់សង្គ្រាមនៅអ៊ុយក្រែន។ លោក ត្រាំ បានសម្តែងសុទិដ្ឋិនិយមចំពោះឆន្ទៈរបស់ប្រធានាធិបតីរុស្ស៊ី លោក វ៉្លាឌីមៀរ ពូទីន ក្នុងការយល់ព្រមលើបទឈប់បាញ់ក្រោមលក្ខខណ្ឌមួយចំនួន ដែលជាជំហានដ៏សំខាន់មួយឆ្ពោះទៅរកដំណោះស្រាយជម្លោះដោយសន្តិវិធី៕

ដោយ៖ ឈាង

ចុចអាន៖ ពូទីន ទាមទារឲ្យមានការធានា ៣យ៉ាងដាច់ខាត ក្នុងអំឡុងពេលបទឈប់បាញ់