ក្រុមហ៊ុនតៃវ៉ាន់ បញ្ជាទិញគ្រាប់ស្វាយចន្ទីជាង ២ តោនពីកម្ពុជា និងមានផែនការចាប់យកចំណែកទីផ្សារ ៣០%

ក្រុមហ៊ុនតៃវ៉ាន់ JU HUA CHANG INTERNATIONAL CO., LTD បានបញ្ជាទិញគ្រាប់​ស្វាយចន្ទី​កែ​ច្នៃ​ពី​សហគ្រាសពីរនៅក្នុងខេត្តកំពង់ធំ និងខេត្តបន្ទាយមានជ័យចំនួន ២ ៣១៣គីឡូក្រាម។

លោក អួន ស៊ីឡុត ប្រធានសមាគមស្វាយចន្ទីកម្ពុជា ប្រាប់កម្ពុជាថ្មីនៅថ្ងៃទី ២៥ ខែមីនា ឆ្នាំ ២០២៥ នេះថា ការបញ្ជារទិញនេះពាណិជ្ជករតៃវ៉ាន់ ហ៊ានឲ្យតម្លៃខ្ពស់ជាងបណ្តារ​ពាណិជ្ជករ​បរទេសដទៃ ហើយ​ហ៊ានចុះកិច្ចសន្យាផ្តល់ជាទុនបង្វិល៥០% មុន ដើម្បីសហគ្រាសអាច​ទិញ​គ្រាប់​​ឆៅ​​ស្តុកទុក​សម្រាប់កែច្នៃតាមការបញ្ជារទិញរបស់ខ្លួន។

គួរបញ្ជាក់ផងដែរថា តៃវ៉ាន់ត្រូវការគ្រាប់កែច្នៃ ១ម៉ឺនតោនក្នុងមួយឆ្នាំ ដែលភាគច្រើនទិញ​ពីវៀត​ណាម និងឥណ្ឌា។

លោក អួន ស៊ីឡុត បញ្ជាក់ថា៖ «ក្រុមហ៊ុននេះគ្រោងទាញចំណែកទីផ្សារចន្ទីកម្ពុជា៣០% នា៣ឆ្នាំ​ខាងមុខ ក្នុងការនាំចូលតៃវ៉ាន់ អីចឹងហើយត្រូវសុំកិច្ចសហការពីសមាគមស្វាយចន្ទីកម្ពុជា ដើម្បី​ស្វែង​រកសហគ្រាសមាំ​ទាំ​និង​មាន​ការ​តាំងចិត្តខ្ពស់ដើម្បីធ្វើការជាមួយគ្នា»។

ក្រុមហ៊ុន JU HUA CHANG INTERNATIONAL ត្រូវការចន្ទីចចំនួន ១ ៧៦០គីឡូក្រាមក្នុងមួយខែ។

នៅឆ្នាំ ២០២៤ កម្ពុជា​សម្រេច​​បានការ​ប្រមូលទិន្នផលគ្រាប់​ស្វាយចន្ទីចំនួន ៨៥ ម៉ឺនតោន ក្នុង​នោះ​នាំចេញ​គ្រាប់ឆៅ​បាន​ចំនួន ៨១ ម៉ឺន ៥ ពាន់តោន កើន​ឡើង ២១% គិត​ជា​ទឹក​ប្រាក់​​ ១,១៥០ ពាន់លាន​ដុល្លារ កើន ២៦,១៥%។ ក្នុងនោះនាំចេញទៅវៀតណាមចំនួន ៧៩ ម៉ឺន ៥ ពាន់​តោន។ នេះបើយោងតាមសមាគមស្វាយចន្ទីកម្ពុជា៕

អត្ថបទ៖ ឡេង ដេត