ព័ត៌មានអន្ដរជាតិ

ប្អូនស្រីលោក គីម ផ្ដាំអាមេរិកកុំឲ្យដេកស្រមៃទាំងថ្ងៃថា កូរ៉េខាងជើងបញ្ឈប់កម្មវិធីនុយក្លេអ៊ែរ

បានផុស

១ year មុន

នៅ

ថ្ងៃពុធ ៩ មេសា ២០២៥

ដោយ

Chheang

លោកស្រី គីម យ៉ូជុង ដែលជាប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង គីម ជុងអ៊ុន បានច្រានចោលការអំពាវនាវអន្តរជាតិសម្រាប់ការរំសាយអាវុធនុយក្លេអ៊ែររបស់ក្រុងព្យុងយ៉ាង ដោយលើកឡើងថា អាមេរិក និងសម្ព័ន្ធមិត្តរបស់ខ្លួន «កុំដេកស្រមៃទាំងថ្ងៃ» ថាកូរ៉េខាងជើងបោះបង់ចោលកម្មវិធីអាវុធនុយក្លេអ៊ែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់លោកស្រី គីម យ៉ូជុង នៅថ្ងៃពុធទី៩ខែមេសានេះ ធ្វើឡើងដើម្បីឆ្លើយតបទៅនឹងកិច្ចប្រជុំនាពេលថ្មីៗនេះ រវាងរដ្ឋមន្ត្រីការបរទេសសហរដ្ឋអាមេរិក កូរ៉េខាងត្បូង និងជប៉ុន ដែលពួកគេបានបញ្ជាក់ជាថ្មីពីការប្តេជ្ញាចិត្តចំពោះការរំសាយអាវុធនុយក្លេអ៊ែរទាំងស្រុងរបស់កូរ៉េខាងជើង។

ប្អូនស្រីរបស់មេដឹកនាំកូរ៉េខាងជើង បានសង្កត់ធ្ងន់ថា កម្មវិធីអាវុធនុយក្លេអ៊ែររបស់ខ្លួន ត្រូវបានការពារដោយរដ្ឋធម្មនុញ្ញ និងមិនអាចចរចារបានឡើយ ដោយបញ្ជាក់ថា ការពិភាក្សានៅបរទេសណាមួយអំពីការរំសាយអាវុធនុយក្លេអ៊ែរ ត្រូវបានចាត់ទុកជាសកម្មភាពអរិភាព និងប៉ះពាល់ដល់អធិបតេយ្យភាពរបស់ក្រុងព្យុងយ៉ាង។ លោកស្រីបានព្រមានថា ការបន្តសម្ពាធពីខាងក្រៅមានតែជួយពង្រឹងការតាំងចិត្តរបស់កូរ៉េខាងជើងក្នុងការពង្រឹងសមត្ថភាពនុយក្លេអ៊ែររបស់ខ្លួនកាន់តែខ្លាំងឡើងថែមទៀតប៉ុណ្ណោះ។

ភាពតានតឹងក្នុងតំបន់បានកើនឡើង ខណៈដែលលោក គីម ជុងអ៊ុន បន្តបង្អួតពីសមត្ថភាពនុយក្លេអ៊ែរយោធារបស់កូរ៉េខាងជើង និងសហការជាមួយរុស្ស៊ីជុំវិញសង្រ្គាមលុកលុយអ៊ុយក្រែន។ មេដឹកនាំកូរ៉េខាងជើង មិនបានអើពើនឹងការអំពាវនាវរបស់ក្រុងសេអ៊ូល និងក្រុងវ៉ាស៊ីនតោន ពាក់ព័ន្ធនឹងបំណងបន្តការចរចាស្តីពីការរំសាយអាវុធនុយក្លេអ៊ែរនោះទេ។

ប្រធានាធិបតីអាមេរិក លោក ដូណាល់ ត្រាំ ធ្លាប់បាននិយាយថា លោកនឹងទាក់ទងទៅលោក គីម ម្តងទៀត ដើម្បីស្តារទំនាក់ទំនងការទូតឡើងវិញ ប៉ុន្តែកូរ៉េខាងជើងមិនបានឆ្លើយតបទៅនឹងការផ្តល់ជូននោះឡើយ៕