ក្រោយចប់បុណ្យចូលឆ្នាំ ពលករខ្មែរជាង១មុឺននាក់ សម្រុកទៅធ្វើការនៅប្រទេសថៃវិញតាមច្រកប៉ោយប៉ែត

ពលករខ្មែរជាង១ម៉ឺននាក់បាននាំគ្នាសម្រុកចេញទៅធ្វើការនៅប្រទេសថៃវិញតាមច្រកទ្វារអន្តរជាតិប៉ោយប៉ែត បន្ទាប់ពីមកស្រុកកំណើតនាពិធីបុណ្យចូលឆ្នាំថ្មីប្រពៃណីជាតិខ្មែរបានបញ្ចប់។

លោក វណ្ណ ដារ៉ាន់ ប្រធានគណៈកម្មការច្រកទ្វារអន្តរជាតិប៉ោយប៉ែតបានឲ្យដឹងកាលពីថ្ងៃទី២០ ខែមេសា ឆ្នាំ២០២៥ ថា គិតចាប់ពីថ្ងៃទី១៧ ខែមេសា ឆ្នាំ២០២៥ មកដល់ថ្ងៃទី២០ ខែមេសា ឆ្នាំ២០២៥ ក្រោយបុណ្យចូលឆ្នាំថ្មីប្រពៃណីជាតិបានបញ្ចប់ មានពលករខ្មែរដែលធ្វើដំណើរចេញទៅប្រទេសថៃវិញសរុបទាំងបួនថ្ងៃមានចំនួន១០២៥៨នាក់ ក្នុងនោះស្រី៨០៩នាក់។ ដែលចំនួននេះក្នុងចំណោមពលរដ្ឋកម្ពុជាចេញទៅប្រទេសថៃឆ្លងកាត់ច្រកអន្តរជាតិប៉ោយប៉ែតមានសរុប១៤៣៤៩នាក់ ក្នុងនោះស្រី៦៩៧៧នាក់។

លោក វណ្ណ ដារ៉ាន់ បានបន្តឲ្យដឹងទៀតថា ពលករដែលធ្វើដំណើរចេញទៅប្រទេសថៃវិញតាមច្រកទ្វារអន្តរជាតិប៉ោយប៉ែត គឺត្រូវបានយកចិត្តទុកដាក់សម្របសម្រួលការធ្វើដំណើររបស់ពួកគាត់ធ្វើយ៉ាងណាឲ្យបានឆាប់រហ័ស និងមិនមានការកាក់យកសាហ៊ុយថ្លៃសេវាអ្វីឡើយ ពិសេសទៅទៀតនោះ គឺសមត្ថកិច្ចនគរបាលនៅតែឧបត្ថម្ភទឹកបរិសុទ្ធជូនពួកគាត់ម្នាក់មួយដបក្នុងការធ្វើដំណើរវិលត្រឡប់ទៅធ្វើការវិញ៕

អត្ថបទ៖ អពៅ