សម្តេចប៉ាប ហ្រ្វង់ស៊ីស យាងចូលទិវង្គត ក្នុង​ជន្មាយុ ៨៨ព្រះវស្សា 

បុរីវ៉ាទីកង់ ​បាន​ប្រកាសនៅថ្ងៃចន្ទទី២១ខែមេសាឆ្នាំ២០២៥​ថា សម្តេច​ប៉ាប ហ្វ្រង់ស៊ីស បានយាងចូលទិវង្គតហើយ ក្នុង​ជន្មាយុ ៨៨ព្រះវស្សាដោយរោគាពាធ នៅវិមាន Casa Santa Marta ខណៈការយាងចូលទិវង្គតរបស់សម្តេចប៉ាប បានបន្សល់ទុកនូវក្តីអាលោះអាល័យជាពន់ពេកនិងការអធិស្ឋាន ពីសំណាក់មនុស្សជុំវិញពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្មីៗនេះសម្តេចប៉ាប ទើបតែចាកចេញពីមន្ទីរពេទ្យ Gemelli នៅទីក្រុងរ៉ូមប៉ុណ្ណោះ បន្ទាប់ពីទទួលការព្យាបាលបញ្ហាផ្លូវដង្ហើម បណ្តាលមកពីរលាកសួតធ្ងន់ធ្ងរ ចាប់តាំងតែពីថ្ងៃទី១៤ខែកុម្ភៈមក។

ក្រោយបាន​ធូរស្បើយ​បន្តិច សម្តេចក៏​បង្ហាញព្រះកាយ​នៅ​ចំពោះ​មុខ​មនុស្ស​លើ​ទីលាន St Peter’s Square សម្រាប់​ពីធីបុណ្យ Easter Sunday ហើយ​ក៏​ជួប​អនុប្រធានាធិបតី​អាមេរិក JD Vance មុនពេលលាចាកលោក។

ហ្វ្រង់ស៊ីស គឺជាសម្តេចប៉ាប Jesuit ដំបូងបង្អស់, ជាសម្តេចប៉ាបទីមួយមកពីទ្វីបអាមេរិក, ជាសម្តេចប៉ាបទីមួយមកពីអឌ្ឍគោលខាងត្បូង និងជាសម្តេចប៉ាបដែលមិនមែនជាជនជាតិអឺរ៉ុបដំបូងគេបង្អស់ ចាប់តាំងពីសម្តេចប៉ាប Gregory ទី៣ កាលពីជាង១ ០០០ឆ្នាំមុន។

សម្តេចប៉ាបហ្វ្រង់ស៊ីស មានព្រះនាមកំណើតថា Jorge Mario Bergoglio ប្រសូតនៅថ្ងៃទី១៧ខែ​ធ្នូឆ្នាំ១៩៣៦ក្នុងទីក្រុង ប៊ុយណូស៊ែរ នៃប្រទេសអាហ្សង់ទីន។

សម្តេចប្រសូត​ក្នុងគ្រួសារជា​ជនអន្តោប្រវេសន៍​អ៊ីតាលីនៅ​ទីក្រុង ប៊ុយណូស៊ែរ។ ទ្រង់បានសិក្សាផ្នែកគីមីវិទ្យាកាលពីនៅក្មេង ហើយក្រោយមកបានជ្រើសរើសចូលរួមក្នុងសមាគមព្រះយេស៊ូវ (Jesuits) ក្នុងឆ្នាំ ១៩៥៨ រួចក៏ត្រូវតែងតាំងជាអាចារ្យនៅឆ្នាំ១៩៦៩។

សម្តេចប៉ាបហ្វ្រង់ស៊ីស បានដឹកនាំព្រះវិហារកាតូលិកអស់រយៈពេល១២ឆ្នាំ ក្រោយត្រូវបានបោះឆ្នោតជ្រើសរើសក្នុងខែមីនាឆ្នាំ២០១៣ បន្ទាប់ពីការលាលែងតំណែងជាប្រវត្តិសាស្ត្ររបស់សម្តេចប៉ាប Benedict ទី១៦៕

អត្ថបទ៖ សុខ សុវណ្ណ

ចុចអាន៖ សម្តេច​សង្ឃ​កាតូលិក Pope Francis ជិតសុគត ខណៈគ្រូ​ពេទ្យ​​សម្រេ​ចឈប់ព្យាបាល​