ហ្សេលេនស្គី ប្រកាសមិនទទួលស្គាល់ថា គ្រីមៀ ជារបស់រុស្ស៊ី ដាច់ខាត

ក្រោយមានសេចក្តីរាយការណ៍ថា សហរដ្ឋអាមេរិកនឹងទទួលស្គាល់តំបន់គ្រីមៀថាជារបស់រុស្ស៊ីជាផ្លូវការនៅក្នុងផែនការសន្តិភាពដែលត្រៀមបង្ហាញអំឡុងកិច្ចប្រជុំទីក្រុងឡុងដ៍ នៅថ្ងៃពុធនេះនោះ ស្រាប់តែប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី បានប្រកាសប្រឆាំងយ៉ាងដាច់អហង្ការថា ខ្លួនមិនទទួលស្គាល់ថាគ្រីមៀជារបស់រុស្ស៊ី ដាច់ខាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT កាលពីថ្ងៃអង្គារទី២២ខែមេសាឆ្នាំ២០២៥, លោកហ្សេលេនស្គី ប្រាប់ទៅអ្នកសារព័ត៌មានថា «គ្រីមៀ គឺជាទឹកដីរបស់យើង ទឹកដីរបស់ប្រជាជនអ៊ុយក្រែន ហើយយើងគ្មានអ្វីត្រូវនិយាយអំពីប្រធានបទនេះទេ ព្រោះវានៅក្រៅរដ្ឋធម្មនុញ្ញរបស់យើង»។

មិនត្រឹមប៉ុណ្ណឹង លោកថែមទាំងព្រមានទៀតថា «ការពិភាក្សាបញ្ហាអធិបតេយ្យភាពគ្រីមៀនេះ មានតែនាំទៅរកការប្រយុទ្ធគ្នាកាន់តែខ្លាំងប៉ុណ្ណោះ។ ពេលណា យើងចាប់ផ្តើមនិយាយអំពីគ្រីមៀ អំពីទឹកដីអធិបតេយ្យរបស់យើង នោះយើងនឹងឈានចូលទម្រង់នៃការអូសបន្លាយសង្រ្គាម! នេះជាអ្វីដែលរុស្ស៊ីចង់បាន»។

ការទទួលស្គាល់តំបន់គ្រីមៀនេះនិងទឹកដី៤ទៀត ដែលរុស្ស៊ីកាត់យកពីអ៊ុយក្រែន គឺស្ថិតក្នុងលក្ខខណ្ឌ៣ចំណុចដែលរុស្ស៊ី ដាក់ទៅអាមេរិក បើពិតជាចង់ឲ្យខ្លួនឈប់បាញ់ជាមួយទីក្រុងកៀវ ឈានឆ្ពោះទៅរកសន្តិភាពមែន។ 

ក្រៅពីលក្ខខណ្ឌនេះ លក្ខខណ្ឌ២ទៀតមានដូចជាគ្មានសមាជិកភាពណាតូសម្រាប់អ៊ុយក្រែនឡើយ និងត្រូវតែមានកិច្ចព្រមព្រៀងដើម្បីធានាថា គ្មានការដាក់ទ័ពបរទេសលើដីអ៊ុយក្រែន។

សូមជម្រាបថា គ្រីមៀ បានរៀបចំធ្វើប្រជាមតិដើម្បីចូលរួមជាមួយរុស្ស៊ីក្នុងឆ្នាំ២០១៤ បន្ទាប់ពីរដ្ឋប្រហារប្រដាប់អាវុធដែលគាំទ្រដោយលោកខាងលិចនៅទីក្រុងកៀវ។

ទោះបីជាយ៉ាងណាក៏ដោយ រដ្ឋាភិបាលអ៊ុយក្រែនថ្មី រួមជាមួយអ្នកគាំទ្រលោកខាងលិចរបស់ខ្លួន មិនដែលទទួលស្គាល់លទ្ធផលនៃការធ្វើប្រជាមតិនោះទេ៕

អត្ថបទ៖ សុខ សុវណ្ណ

ចុចអាន៖ ហ្សេលេនស្គី៖ អ៊ុយក្រែន​ត្រៀម​ជំនួប​​ផ្ទាល់​ជាមួយ​រុស្ស៊ី តែ​ក្រោយ​មាន​បទ​ឈប់​បាញ់​ពេញ​លេញ​សិន