ព័ត៌មានអន្ដរជាតិ

យកកាំបិតចាក់នាយកសាលា និងគ្រូរបួស៦នាក់ក្នុងវិទ្យាល័យមួយកន្លែងនៅកូរ៉េខាងត្បូង

បានផុស

១ year មុន

នៅ

ថ្ងៃចន្ទ ២៨ មេសា ២០២៥

ដោយ

Chheang

នៅថ្ងៃទី២៨ខែមេសាឆ្នាំ២០២៥នេះ វិទ្យាល័យមួយក្នុងទីក្រុង Cheongju ចម្ងាយប្រហែល ១១០គីឡូម៉ែត្រពីភាគខាងត្បូងរដ្ឋធានីសេអ៊ូល បានកើតមានហេតុការណ៍ចាក់របួសមនុស្ស ៦នាក់ ដែលបង្កឡើងដោយសិស្សសាលាវ័យ ១៨ឆ្នាំម្នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយសារព័ត៌មាន Independent ជនបង្កហេតុ គឺជាសិស្សដែលមានបញ្ហាផ្នែកបញ្ញាស្មារតី ហើយបានចុះឈ្មោះក្នុងកម្មវិធីអប់រំពិសេសរបស់សាលា។ ឧប្បត្តិហេតុនេះ កើតឡើងនៅវេលាម៉ោងប្រមាណ ៨ និង ៤០នាទីព្រឹកម៉ោងក្នុងស្រុក ខណៈអ្នករងគ្រោះគឺជាគ្រូបង្រៀន និងបុគ្គលនៅក្នុងសាលា។

ក្នុងចំណោមអ្នករងរបួសមាន នាយកសាលាម្នាក់ និងបុគ្គលិករដ្ឋាភិបាលម្នាក់ ដែលអ្នកទាំងពីររងរបួសធ្ងន់ត្រង់ពោះ និងទ្រូង។ ចំណែកឯជនរងគ្រោះដទៃទៀតមានរបួសនៅត្រង់មុខ ពោះ និងកន្លែងផ្សេងទៀត។ ជនរងគ្រោះទាំង៦នាក់ ត្រូវបានបញ្ជូនទៅកាន់មន្ទីរពេទ្យបង្អែកក្រុង ដើម្បីសម្រាកព្យាបាល។

ក្រោយការវាយប្រហារ សិស្សបង្កហេតុបានព្យាយាមរត់គេចខ្លួន ហើយលោតចូលទៅក្នុងស្រះទឹកដែលនៅក្បែរនោះ។ ក្រុមអ្នកសង្គ្រោះ បានជួយសិស្សម្នាក់នោះ ហើយបានបញ្ជូនរូបគេទៅកាន់មន្ទីរពេទ្យ។

សូមបញ្ជាក់ថា កាលពីខែកុម្ភៈកន្លងទៅ ក៏ធ្លាប់មានករណីចាក់សម្លាប់ម្ដងរួចមកហើយនៅក្នុងប្រទេសកូរ៉េខាងត្បូង ដោយគ្រូម្នាក់បានចាក់សម្លាប់សិស្សអាយុ ៨ឆ្នាំនៅសាលាបឋមសិក្សាមួយកន្លែង។ ទោះជាយ៉ាងណាក៏ដោយ កូរ៉េខាងត្បូងនៅតែជាប់ចំណាត់ថ្នាក់ជាប្រទេសដែលមានសុវត្ថិភាពបំផុតមួយ ជាមួយនឹងអត្រាឃាតកម្មមានត្រឹម ១,៣នាក់ក្នុងចំណោមមនុស្ស ១០ម៉ឺននាក់ក្នុងឆ្នាំ២០២១ប៉ុណ្ណោះ ទាបជាងមធ្យមភាគទូទៅនៅលើពិភពលោកនៃការធ្វើមនុស្សឃាតចំនួន ៦នាក់ក្នុងចំណោមមនុស្ស ១០ម៉ឺននាក់៕

ដោយ៖ ឈាង

Related Topics:ប្រទេសកូរ៉េខាងត្បូង