អេស្ប៉ាញ និង​ព័រទុយហ្កាល់ ប្រកាស​ដាក់​ប្រទេស​ក្នុង​គ្រា​អាសន្ន ព្រោះ​តែ​ដាច់​ភ្លើង​ទ្រង់ទ្រាយ​ធំ

អេស្ប៉ាញ និងព័រទុយហ្គាល់ បានប្រកាស​ភាព​ដាក់​ប្រទេស​ក្នុង​គ្រា​អាសន្ន បន្ទាប់ពីមានការដាច់ចរន្តអគ្គិសនីភ្លាមៗ និង​ដ៏​ធំ​បំផុត ដែល​បានធ្វើ​ឲ្យ​មួយផ្នែកធំនៃប្រទេសទាំងពីរ​ធ្លាក់​ចូល​ទៅក្នុងភាពងងឹត រំខានដល់ការដឹកជញ្ជូន ការទំនាក់ទំនង និងសេវាកម្មសំខាន់ៗសម្រាប់មនុស្សរាប់លាននាក់នៅទូទាំងឧបទ្វីប Iberian។

យោង​តាម​ការ​ចុះផ្សាយ​នៅ​ថ្ងៃ​ទី​២៩ ខែ​មេសា ឆ្នាំ​២០២៥​នេះ​របស់​ទីភ្នាក់ងារ​ព័ត៌មាន AP ការដាច់ចរន្តអគ្គិសនីដ៏ធំ​នេះ បាន​ប៉ះពាល់ដល់ទីក្រុង Madrid, Barcelona, និង​​​​តំបន់​ជា​ច្រើន​ផ្សេង​ទៀត​នៃប្រទេសអេស្ប៉ាញ ព្រម​ទាំង​ទីក្រុង Lisbon និង Porto នៃ​ប្រទេស​ព័រទុយហ្កាល់។ បន្ថែម​ពី​នេះ វា​ក៏​ប៉ះពាល់​ដល់​ប្រទេស​អង់ដូរ៉ា និងផ្នែកខ្លះនៃភាគខាងត្បូងប្រទេសបារាំង​ផង​ដែរ។

នៅម៉ោង១២ និង​ ៣០​នាទី​យប់​ម៉ោង​ក្នុង​ស្រុក បណ្តាញអគ្គិសនីរបស់ប្រទេសអេស្ប៉ាញបានធ្លាក់ចុះភ្លាមៗពី ២៦​ជីហ្គាវ៉ាត់ មកត្រឹម ១២​ជីហ្គាវ៉ាត់។ ទីក្រុង​ជា​ច្រើន​នៅ​អេស្ប៉ាញ បានធ្លាក់ចូលទៅក្នុងភាពងងឹត រថភ្លើងលែង​ដំណើរការ ហើយមន្ទីរពេទ្យបានប្តូរទៅ​ថាមពល​បម្រុង​វិញ ខណៈ​សេវាទូរគមនាគមន៍ និងទូរសព្ទត្រូវបានរំខាន។ រដ្ឋាភិបាល​អេ​ស្ប៉ា​ញ​ ​បាន​ប្រកាស​ដាក់​​ប្រទេស​​ក្នុង​គ្រាអាសន្ន ដោយ​បាន​ពង្រាយ​ប៉ូលិស​ចំនួន​ ៣០ ០០០​នាក់​។

នាយករដ្ឋមន្រ្តី​អេស្ប៉ាញ​លោក Pedro Sánchez បានជំរុញ​ឲ្យ​ពលរដ្ឋ​ប្រើប្រាស់​ទូរសព្ទ​​ដោយ​ប្រុង​ប្រយ័ត្ន និង​សន្សំ​សំចៃ​​ថាមពល ហើយបាននិយាយថា មូលហេតុនៃការដាច់ភ្លើងនៅតែមិនទាន់ដឹងនៅឡើយ​ទេ ទោះបីជាមន្ត្រីអឺរ៉ុបបានច្រានចោលការវាយប្រហារតាមអ៊ីនធឺណិតក៏ដោយ។ លោក Sanchez ប្រកាស​ថា បណ្តាញអគ្គិសនីបានបាត់បង់ថាមពល ៦០% ក្នុងរយៈពេលត្រឹមតែ ៥​វិនាទីប៉ុណ្ណោះ។

គិតត្រឹមព្រឹកថ្ងៃអង្គារនេះ ជាង ៩៩% នៃតម្រូវការថាមពលរបស់ប្រទេសអេស្ប៉ាញ​ត្រូវបានស្ដារឡើងវិញ នេះបើយោងតាមក្រុមហ៊ុន Red Eléctrica ខណៈដែលព័រទុយហ្កាល់បានរាយការណ៍អំពីការស្ដារឡើងវិញស្ទើរតែពេញលេញនៃស្ថានីយរងរបស់ខ្លួន។

បច្ចុប្បន្ន អាជ្ញាធរអ៊ឺរ៉ុបកំពុង​ស៊ើបអង្កេតការដាច់ចរន្តអគ្គិសនីដ៏កម្រ និងដ៏ធំនេះ ដែលប៉ះពាល់ដល់មនុស្សជិត ៦០​លាននាក់៕

ដោយ៖ ឈាង