ផ្លូវថ្នល់ក្នុងប្រទេសកម្ពុជា បែងចែកកំណត់​ជា ៦ ប្រភេទ តាមស្ថានភាព​ប្រើប្រាស់

យោងតាមច្បាប់ស្ដីពីផ្លូវថ្នល់ ឆ្នាំ២០១៤ ផ្លូវថ្នល់នៅក្នុងប្រទេសកម្ពុជា ត្រូវបាន​កំណត់​បែងចែកជា ៦ប្រភេទ តាម​ស្ថានភាព​នៃ​ការ​ប្រើប្រាស់។ ក្នុង​នោះ​មាន ១. ផ្លូវល្បឿនលឿន ២. ផ្លូវជាតិ ៣. ផ្លូវខេត្ត ៤. ផ្លូវជនបទ ៥. ផ្លូវរាជធានី ផ្លូវក្រុង និងផ្លូវទីប្រជុំជននានាក្នុងខេត្ត ៦. ប្រភេទផ្លូវផ្សេងៗទៀត ដែលកំណត់ដោយរាជរដ្ឋាភិបាល។

១. ផ្លូវល្បឿនលឿន

ផ្លូវល្បឿនលឿន សំដៅដល់ផ្លូវសម្រាប់យានយន្តធ្វើចរាចរណ៍ មានបរិក្ខារ​ចែកទ្រូងផ្លូវជាពីរចំណែកខុសទិសគ្នា ឬចែកជាគន្លងផ្លូវ គ្មានកន្លែងផ្លូវប្រសព្វលើផ្ទៃរាបមួយ ឬ​ត្រូវ​មានផ្លូវប្រសព្វតិចបំផុតក្នុងករណីចាំបាច់ និងបំពាក់គ្រប់គ្រាន់នូវបរិក្ខារផ្លូវថ្នល់ ដើម្បីធានា​លំហូរ​ចរាចរណ៍អត់ឈប់ សុវត្ថិភាព និងដើម្បីបន្ថយពេលវេលាធ្វើដំណើរ និងមានកន្លែងកំណត់ សម្រាប់​ឱ្យយានយន្តចេញ និងចូលផ្លូវល្បឿនលឿន។

២. ផ្លូវជាតិ

ផ្លូវជាតិ សំដៅដល់ផ្លូវដែលមានចរាចរណ៍ច្រើន រួមមាន៖

ក. ផ្លូវភ្ជាប់ចេញពីរាជធានីភ្នំពេញ ឆ្ពោះ​ទៅកាន់​ក្រុងនៃខេត្តនីមួយៗ នៅទូទាំងប្រទេស។
ខ. ផ្លូវភ្ជាប់ចេញពីក្រុងនៃ​ខេត្តមួយ ឆ្ពោះទៅកាន់ក្រុងនៃខេត្តមួយទៀត។
គ. ផ្លូវភ្ជាប់ចេញពីផ្លូវជាតិ ឆ្ពោះទៅកាន់ផ្លូវជាតិ។
ឃ. ផ្លូវបែកចេញពីផ្លូវជាតិ ឆ្ពោះទៅកាន់ក្រុងនៃខេត្តមួយ។
ង. ផ្លូវបែកចេញពីផ្លូវជាតិ ឬផ្លូវភ្ជាប់ចេញពីក្រុងនៃខេត្តមួយឆ្ពោះទៅកាន់តំបន់សំខាន់ៗ ដូចជាកំពង់ផែ ស្ថានីយរថភ្លើង អាកាសយានដ្ឋាន តំបន់សេដ្ឋកិច្ចពិសេស រមណីយដ្ឋានទេសចរណ៍ ច្រកទ្វារព្រំដែន តំបន់មានសក្តានុពលសេដ្ឋកិច្ចសំខាន់ៗផ្សេងទៀត។ ច. ផ្លូវសំខាន់ៗរបស់ជាតិ មានចរាចរណ៍ច្រើនដែលកំណត់ដោយរាជរដ្ឋាភិបាលតាមសំណើរបស់ក្រសួងសាធារណការ និងដឹកជញ្ជូន។

៣. ផ្លូវខេត្ត

ផ្លូវខេត្ត សំដៅដល់ផ្លូវដែលមានចរាចរណ៍មធ្យម រួមមាន៖

ក. ផ្លូវភ្ជាប់ចេញពីក្រុងនៃខេត្តមួយ ឆ្ពោះទៅកាន់ទីរួមស្រុក ខណ្ឌ។
ខ. ផ្លូវបែកចេញពីផ្លូវជាតិ ឆ្ពោះទៅកាន់ផ្លូវខេត្ត។
គ. ផ្លូវបែកចេញពីផ្លូវខេត្ត ឬផ្លូវក្រុង ឆ្ពោះទៅកាន់ទីរួមស្រុក ខណ្ឌ។
ឃ. ផ្លូវភ្ជាប់ចេញពីក្រុងនៃខេត្តមួយ ឆ្ពោះទៅកាន់ផ្លូវខេត្ត។
ង. ផ្លូវបែកចេញពីផ្លូវខេត្ត ឆ្ពោះទៅកាន់ផ្លូវខេត្ត។
ច. ផ្លូវបែកចេញពីផ្លូវខេត្ត ឬផ្លូវក្រុង ឬផ្លូវទីប្រជុំជននានាក្នុងខេត្តទៅកាន់តំបន់សំខាន់ៗដូចជា កំពង់ផែ ស្ថានីយរថភ្លើង អាកាសយានដ្ឋាន តំបន់សេដ្ឋកិច្ចពិសេស រមណីយដ្ឋានទេសចរណ៍ ច្រកទ្វារព្រំដែនទ្វេភាគី តំបន់មានសក្តានុពលសេដ្ឋកិច្ចមធ្យមផ្សេងទៀត។

៤. ផ្លូវជនបទ ផ្លូវជនបទ សំដៅដល់៖

ក. ផ្លូវដែលភ្ជាប់ពីផ្លូវជាតិ ផ្លូវខេត្ត ឆ្ពោះទៅកាន់ក្រុង ទីរួមស្រុក ខណ្ឌ ទីប្រជុំជនឃុំសង្កាត់ និ​ងទៅភូមិ។
ខ. ផ្លូវដែលភ្ជាប់ពីក្រុងទីរួមស្រុក ខណ្ឌ ឆ្ពោះទៅកាន់ក្រុង ទីរួមស្រុក ខណ្ឌ។
គ. ផ្លូវដែលភ្ជាប់ពីក្រុង ទីរួមស្រុក ខណ្ឌ ទៅទីប្រជុំជន ឃុំ សង្កាត់។
ឃ. ផ្លូវដែលភ្ជាប់ពីទីប្រជុំជនឃុំសង្កាត់ ទៅទីប្រជុំជនឃុំ សង្កាត់។
ង. ផ្លូវដែលភ្ជាប់ពីទីប្រជុំជនឃុំ សង្កាត់ ទៅភូមិ។
ច. ផ្លូវដែលភ្ជាប់ពីភូមិទៅភូមិ។ ឆ. ផ្លូវក្នុងភូមិ។

៥. ផ្លូវរាជធានី ផ្លូវក្រុង និងផ្លូវទីប្រជុំជននានាក្នុងខេត្ត

ផ្លូវនេះ សំដៅ​ដល់​ផ្លូវ​ថ្នល់​ដែល​ស្ថិត​នៅ​ក្នុងបរិវេណភូមិសាស្រ្តរដ្ឋបាលរាជធានី-ខេត្ត ដោយរួមមានទ្រូងផ្លូវ ចិញ្ចើមផ្លូវ និងផ្លូវថ្មើរជើង។

៦. ប្រភេទផ្លូវផ្សេងៗទៀត ដែលកំណត់ដោយរាជរដ្ឋាភិបាល។

កន្លងទៅ ក្រសួងសាធារណការ និងដឹកជញ្ជូន បាន​ដាក់ឱ្យប្រើប្រាស់រួចរាល់នូវកម្មវិធីទូរសព្ទដៃមួយដែលមានឈ្មោះថា “កម្មវិធីថែទាំផ្លូវ (ROAD CARE Mobile App)” ដែលកម្មវិធី​នេះនឹង​ផ្ដល់លទ្ធភាព​ដល់​ប្រជាពលរដ្ឋអាច​ធ្វើការ​រាយការណ៍​ពីបញ្ហាផ្លូវថ្នល់ ពិសេសផ្លូវជង្ហុកសំបុកមាន់ ដើម្បីឱ្យ​សមត្ថកិច្ច​ជំនាញ​ចុះធ្វើការ​ត្រួតពិនិត្យ និង​ជួសជុលបាន​ទាន់​ពេល​វេលា៕