អ្នកស្លាប់នៅហ្គាហ្សា កើនយ៉ាង​គំហុក​ដល់ជាង​៥៣​០០០​នាក់​ក្នុងសង្គ្រាម​​​​១ឆ្នាំកន្លះ​

ការវាយប្រហារតាមអាកាសរបស់អ៊ីស្រាអែលបានសម្លាប់មនុស្សរាប់រយនាក់បន្ថែមទៀតនៅហ្គាហ្សាក្នុងរយៈពេលប៉ុន្មានថ្ងៃថ្មីៗនេះ ដែលនាំឲ្យចំនួនអ្នកស្លាប់កើនដល់៥៣០០០នាក់។​ នេះបើយោងតាមការចេញផ្សាយរបស់សារព័ត៌មាន ​Al Jazeera នៅថ្ងៃទី១៧ខែឧសភានេះ។

ទោះបីជារបាយការណ៍មានភាពខុសប្លែកគ្នាក៏ដោយ មន្ត្រីសុខាភិបាលនៅហ្គាហ្សា បានឲ្យដឹងថា យ៉ាងហោចណាស់មនុស្ស ១០០នាក់ ត្រូវបានសម្លាប់ដោយសារការវាយប្រហាររបស់អ៊ីស្រាអែលកាលពីថ្ងៃសុក្រនិងមានមនុស្សជាច្រើននាក់ទៀតបាត់ខ្លួននៅក្រោមគំនរបាក់បែក។

ចំនួននេះបានបន្ថែមទៅលើចំនួនអ្នកស្លាប់កាលពីថ្ងៃមុន១៤៣នាក់ ដែ​ល​បាន​បង្កើន​ចំនួនអ្នកស្លាប់សរុបនៅក្នុងទឹកដីប៉ាឡេស្ទីនកើនដល់ជាង ៥៣,០០០ចាប់តាំងពីអ៊ីស្រាអែលបានចាប់ផ្តើមការវាយលុករបស់ខ្លួនក្នុងខែតុលា ឆ្នាំ ២០២៣ បន្ទាប់​ពីការវាយប្រហាររបស់ពួកហាម៉ាសដែលបានសម្លាប់ជនជាតិអ៊ីស្រាអែលប្រហែល ១២០០ នាក់ និង​ចាប់​ជាចំណាប់ខ្មាំង​ចំនួន​២៥០នាក់។

សង្គ្រាមរបស់អ៊ីស្រាអែលលើតំបន់ហ្គាហ្សាបានសម្លាប់ជនជាតិប៉ាឡេស្ទីនយ៉ាងតិច ៥៣,០១០នាក់ និងរបួស ១១៩,៩១៩​នាក់ នេះបើយោងតាមក្រសួងសុខាភិបាលរបស់ហ្គាហ្សា។ ប៉ុន្តែបើតាមការិយាល័យប្រព័ន្ធផ្សព្វផ្សាយរបស់រដ្ឋាភិបាលក្នុងតំបន់បានធ្វើបច្ចុប្បន្នភាពចំនួនអ្នកស្លាប់របស់ខ្លួនដល់ជាង ៦១,៧០០ ខណៈមនុស្សរាប់ពាន់នាក់ផ្សេងទៀតដែលបាត់ខ្លួននៅក្រោមគំនរបាក់បែកត្រូវបានសន្មត់ថាបានបាត់បង់ជីវិត។

ចាប់តាំងពីថ្ងៃទី ០២ ខែមីនាអ៊ីស្រាអែលបានបញ្ឈប់ការនាំចូលស្បៀងអាហារ ថ្នាំពេទ្យ និងរបស់ចាំបាច់ផ្សេងទៀតចូលទៅក្នុងហ្គាហ្សា ក្នុងបំណងបង្ខំក្រុមហាម៉ាសឱ្យដោះលែងជនជាតិអ៊ីស្រាអែលដែលនៅសេសសល់។

ទោះបីជាយ៉ាងណាក៏ដោយ មន្ត្រីជាន់ខ្ពស់របស់ហាម៉ាស់ លោក Basem Naim បានរំលឹកឡើងវិញនៅថ្ងៃព្រហស្បតិ៍ពីគោលជំហររបស់ក្រុមហាម៉ាសថា ការបញ្ចូលជំនួយទៅកាន់តំបន់ហ្គាហ្សា គឺជាតម្រូវការចាំបាច់សម្រាប់កិច្ចពិភាក្សាណាមួយជាមួយអ៊ីស្រាអែល។

សហរដ្ឋអាមេរិក និងអ៊ីស្រាអែលកំពុងរៀបចំផែនការមួយដែលពួកគេនិយាយថានឹងអនុញ្ញាតឱ្យមានការផ្តល់ជំនួយឡើងវិញដោយអង្គការក្រៅរដ្ឋាភិបាលមួយនៅក្នុងខែនេះ ដើម្បីដកការផ្គត់ផ្គង់ចេញពីដៃរបស់ក្រុមហាម៉ាស។ ទោះជាយ៉ាងណាក៏ដោយ អង្គការសហប្រជាជាតិ និងអង្គការជំនួយផ្សេងទៀតបានច្រានចោលការជាប់ពាក់ព័ន្ធក្នុងគំនិតផ្តួចផ្តើមនេះ ដោយលើកឡើងពីភាពលំអៀង មិនអព្យាក្រឹតភាព និងមិនមានឯករាជ្យភាពក្នុងហប្រតិបត្តិការផ្ដល់ជំនួយ៕

អត្ថបទ៖ ប៊ុន សុភាព