ព័ត៌មានអន្ដរជាតិ

ផ្ទុះជំងឺកូវីដខ្លាំងពេក ខេត្ត Nakhon Pathom របស់ថៃ បិទសាលារៀនខ្លះបណ្តោះអាសន្ន

បានផុស

២ ខែ មុន

នៅ

ថ្ងៃពុធ ២៨ ឧសភា ២០២៥

ដោយ

យោងតាមការចេញផ្សាយរបស់សារព័ត៌មាន The Nation នៅថ្ងៃទី២៨ខែឧសភា សាលា Phrapathom Witthayalai ក្នុងខេត្ត Nakhon Pathom ប្រទេសថៃ បានប្រកាសបិទជាបណ្តោះអាសន្នចាប់ពីថ្ងៃពុធដល់ថ្ងៃសុក្រ (២៨-៣០ ឧសភា) ដោយសារការកើនឡើងនៃករណីឆ្លងកូវីដ១៩ ក្នុងចំណោមសិស្ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្រេចចិត្តនេះកើតឡើងបន្ទាប់ពីសិស្សមួយចំនួនធំត្រូវបានគេរាយការណ៍ថាបានឆ្លងកូវីដ១៩និងខ្លះមានទំនាក់ទំនងជាមួយអ្នកឆ្លង ដែលប៉ះពាល់យ៉ាងខ្លាំងដល់ការចូលរៀនក្នុងថ្នាក់ និងជំរុញឱ្យមានការព្រួយបារម្ភអំពីការឆ្លងបន្ថែមទៀត។

នៅក្នុងសេចក្តីថ្លែងការណ៍មួយដែលបានចេញផ្សាយនៅថ្ងៃពុធ សាលាបានសង្កត់ធ្ងន់ថា សុវត្ថិភាព និងសុខុមាលភាពរបស់សិស្ស និងបុគ្គលិកគឺជាអាទិភាពចម្បង ដូចនេះការបិទបណ្ដោះអាសន្ននេះ គឺស្របតាមការណែនាំរបស់ការិយាល័យ គណៈកម្មការអប់រំមូលដ្ឋាន (OBEC) ដែលបានចេញលិខិតបន្ទាន់មួយកាលពីថ្ងៃទី ២១ឧសភា ណែនាំដល់សាលាទាំងអស់ត្រូវចាត់វិធានការជាបន្ទាន់នៅពេលករណីកូវីដ១៩កើនឡើងខ្លាំង។

ដើម្បីធានាបានការបន្តការសិក្សា សាលាបានប្តូរទៅការរៀនតាមអនឡាញក្នុងអំឡុងពេលបិទបណ្ដោះអាសន្ននេះ។ សិស្សត្រូវបានតម្រូវឱ្យធ្វើតាមកាលវិភាគថ្នាក់ធម្មតារបស់ពួកគេស្ទើរតែទាំងស្រុង ខណៈដែលគ្រូបង្រៀននឹងបង្រៀនតាមអនឡាញ។

នាយកដ្ឋានរោគរាតត្បាតនៃនាយកដ្ឋានគ្រប់គ្រងជំងឺបានរាយការណ៍ពីករណីឆ្លងកូវីដ១៩ ថ្មីចំនួន ១៤,១៥៦ ករណី និងមានអ្នកស្លាប់ចំនួន ៤នាក់បន្ថែមទៀតនៅទូទាំងប្រទេសគិតត្រឹមថ្ងៃចន្ទ ទី២៦ ខែឧសភា។ តែបើរាប់ចាប់តាំងពីថ្ងៃទី ១ ខែមករាមក ប្រទេសថៃបានកត់ត្រាករណីឆ្លងសរុបចំនួន ២២០,០៩៣ នាក់ និងមានអ្នកស្លាប់ចំនួន ៥១នាក់។

ជាមួយនឹងករណីកំពុងបន្តកើនឡើងនៅទូទាំងប្រទេស អាជ្ញាធរសុខាភិបាល និងអប់រំថៃកំពុងតាមដានស្ថានការណ៍នៃការរីករាលដាលរបស់ជំងឺរាតត្បាតនេះ៕