ព័ត៌មានអន្ដរជាតិ

អ៊ីស្រាអែលគំរាមឲ្យទទួលយកបទឈប់បាញ់ បើមិនចង់វិនាសខ្លួន

បានផុស

១៤ វិនាទី មុន

នៅ

ថ្ងៃសៅរ៍ ៣១ ឧសភា ២០២៥

ដោយ

Chheang

អ៊ីស្រាអែល បានធ្វើការព្រមានយ៉ាងម៉ឺងម៉ាត់ទៅកាន់ហាម៉ាស ដោយទាមទារឲ្យក្រុមសកម្មប្រយុទ្ធប៉ាឡេស្ទីននេះទទួលយកកិច្ចព្រមព្រៀងឈប់បាញ់ដែលស្នើឡើងដោយសហរដ្ឋអាមេរិក ឬប្រឈមមុខនឹង «ការវិនាសខ្លួន»។ នេះជាសារដែលបានប្រកាសដោយរដ្ឋមន្ត្រីការពារជាតិអ៊ីស្រាអែល លោក Israel Katz កាលពីថ្ងៃសុក្រទី៣០ខែឧសភា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឱសានវាទនេះ ស្របនឹងការអះអាងរបស់ប្រធានាធិបតីអាមេរិក ដូណាល់ ត្រាំ ដែលថា កិច្ចព្រមព្រៀងឈប់បាញ់គ្នារវាងអ៊ីស្រាអែល និងក្រុមហាម៉ាសគឺជិតបានសម្រេចហើយ។

បទឈប់បាញ់ដែលបានស្នើឡើងដោយបេសកជនអាមេរិក Steve Witkoff រួមមាន ការបញ្ឈប់អរិភាពរយៈពេល ៦០ថ្ងៃ ការដោះលែងចំណាប់ខ្មាំងជនជាតិអ៊ីស្រាអែលចំនួន ១០នាក់ និងសាកសព ១៨នាក់ ជាថ្នូរនឹងការរំដោះអ្នកទោសប៉ាឡេស្ទីនចំនួន ១ ២៣៦នាក់ និងសាកសពចំនួន ១៨០នាក់។ លើសពីនេះទៀត ផែនការនេះរួមបញ្ចូលទាំងការផ្តល់ជំនួយមនុស្សធម៌ជាបន្ទាន់ដល់តំបន់ហ្គាហ្សា។

ខណៈដែលអ៊ីស្រាអែលបានយល់ព្រមលើសំណើនេះ ក្រុមហាម៉ាសកំពុងពិនិត្យមើលលក្ខខណ្ឌទាំងនោះ។ បើតាមសារព័ត៌មាន BBC មន្ត្រីក្រុមហាម៉ាស បានរិះគន់ផែនការនេះថាមិនបានដោះស្រាយការទាមទារសំខាន់ៗ ដូចជា បទឈប់បាញ់ជាអចិន្ត្រៃយ៍ និងការដកកងទ័ពអ៊ីស្រាអែលចេញពីតំបន់ហ្គាហ្សា ដោយបញ្ជាក់ថា ទម្រង់បច្ចុប្បន្ននឹងនាំទៅរក «ការបន្តនៃការសម្លាប់ និងទុរ្ភិក្ស» នៅក្នុងតំបន់។

ស្ថានការណ៍មនុស្សធម៌នៅហ្គាហ្សានៅតែអាក្រក់ ដោយអង្គការសហប្រជាជាតិបានព្រមានអំពីទុរ្ភិក្សរីករាលដាល និងកង្វះអាហារធ្ងន់ធ្ងរ។ ទោះបីជាមានការដកផ្នែកខ្លះនៃការបិទជំនួយក៏ដោយ កិច្ចខិតខំប្រឹងប្រែងចែកចាយនៅតែមានភាពវឹកវរ និងមិនគ្រប់គ្រាន់ដើម្បីបំពេញតម្រូវការរបស់ប្រជាជន។

យោងតាមក្រសួងសុខភាពដែលគ្រប់គ្រងដោយក្រុមហាម៉ាស មនុស្សជិត ៤ ០០០នាក់ត្រូវបានសម្លាប់នៅក្នុងតំបន់ហ្គាហ្សាក្នុងរយៈពេល ១០សប្តាហ៍កន្លងមកនេះ។ អង្គការសហប្រជាជាតិ និយាយថា មនុស្ស ៦០ម៉ឺននាក់ផ្សេងទៀតត្រូវបានផ្លាស់ទីលំនៅសាជាថ្មី ដោយប្រតិបត្តិការជើងគោកនិងបញ្ជាជម្លៀសរបស់អ៊ីស្រាអែល ហើយរបាយការណ៍របស់ IPC គាំទ្រដោយអង្គការសហប្រជាជាតិ បានព្រមានថា មនុស្សប្រហែល ៥០ម៉ឺននាក់ប្រឈមមុខនឹងកម្រិតនៃភាពអត់ឃ្លានដ៏មហន្តរាយ នាប៉ុន្មានខែខាងមុខនេះ៕