ព័ត៌មានអន្ដរជាតិ

រដ្ឋាភិបាលបណ្តោះអាសន្នបង់ក្លាដែស បើកសវនាការកាត់ទោសអតីតនាយករដ្ឋមន្ត្រី

បានផុស

១ year មុន

នៅ

ថ្ងៃចន្ទ ២ មិថុនា ២០២៥

ដោយ

យោងតាមកាចេញផ្សាយរបស់សារព័ត៌មាន CNA ដែលមានមូលដ្ឋាននៅសិង្ហបុរី កាលពីថ្ងៃទី១ខែមិថុនា ប្រទេសបង់ក្លាដែស បានបើកការកាត់ក្តីសំណុំរឿងដ៏ល្បីមួយប្រឆាំងនឹងអតីតនាយករដ្ឋមន្ត្រី Sheikh Hasina ដោយចោទប្រកាន់លោកស្រីពីបទរៀបចំ «ការវាយប្រហារជាប្រព័ន្ធ» ក្នុងអំឡុងពេលការបង្រ្កាបដ៏សាហាវលើការតវ៉ាប្រឆាំងរដ្ឋាភិបាលក្នុងខែកក្កដាដល់ខែសីហាឆ្នាំ២០២៤ ដែលបណ្ដាលឲ្យមនុស្សរហូតដល់ ១៤០០ នាក់ស្លាប់ក្នុងអំឡុងពេលនោះ។ នេះបើយោងតាមអង្គការសហប្រជាជាតិ។

អតីតនាយករដ្ឋមន្ត្រី Sheikh Hasina។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អតីតនាយករដ្ឋមន្ត្រី លោកស្រី Hasina អាយុ ៧៧ឆ្នាំ បានភៀសខ្លួនទៅប្រទេសឥណ្ឌា បន្ទាប់ពីការតវ៉ាដែលដឹកនាំដោយនិស្សិតបានបញ្ចប់ការគ្រប់គ្រងរយៈពេល ១៥ឆ្នាំរបស់លោកស្រី ហើយបានបដិសេធមិនត្រលប់មកវិញដោយច្រានចោលការចោទប្រកាន់នោះថាជា«ហេតុផលនយោបាយ»។

លោកស្រីនិងអតីតមន្ត្រីពីរនាក់ត្រូវបានចោទប្រកាន់ពីបទរំលោភបំពាន ការសមគំនិត និងឧក្រិដ្ឋកម្មប្រឆាំងមនុស្សជាតិ។ ការកាត់ក្តីនេះកំពុងធ្វើឡើងដោយតុលាការឧក្រិដ្ឋកម្មអន្តរជាតិ (ICT) ដែល លោកស្រី Hasina បង្កើតឡើងដំបូងក្នុងឆ្នាំ ២០០៩។

ប្រជាជនបង់ក្លាដែសតវ៉ាប្រឆាំងអតីតនាយករដ្ឋមន្ត្រី Sheikh Hasina។ រូបភាព៖ Reuters

រដ្ឋអាជ្ញា បានអះអាងថា លោកស្រីបានប្រើ អ្នកអនុវត្តច្បាប់ និងសមាជិកបក្សប្រដាប់អាវុធដើម្បីគាបសង្កត់អ្នកប្រឆាំង។ សាលាក្តីបានប្រមូលវីដេអូ សំឡេង កំណត់ត្រាហោះហើរ និងសក្ខីកម្មពីសំណាក់សាក្សីធ្វើជាភស្តុតាងរួចរាល់ហើយ។ ទន្ទឹមនឹងនេះ គណបក្ស Awami League ដែលលោកស្រីដឹកនាំ ក៏នៅតែស្ថិតក្រោមការត្រួតពិនិត្យតាមផ្លូវច្បាប់ដែរ។

រដ្ឋាភិបាលបណ្តោះអាសន្នរបស់ប្រទេសបង់ក្លាដែស បានសន្យាផ្ដល់យុត្តិធម៌មិនលំអៀង និងបានសន្យាថា នឹងមានការបោះឆ្នោតនៅខែមិថុនា ឆ្នាំ ២០២៦។ ទោះយ៉ាងណាក៏ដោយ ក្រុមអ្នករិះគន់ បានព្រមានថា ការកាត់ក្តីនេះអាចធ្វើឱ្យការបែកបាក់ផ្នែកនយោបាយកាន់តែធ្ងន់ធ្ងរ នៅក្នុងទិដ្ឋភាពដែលកំពុងប្រែប្រួលរួចទៅហើយ៕