អ៊ីស្រាអែល​ដាក់​បន្ថែម​ឈ្មោះ​មេ​ដឹក​នាំ​ហាម៉ាស​៤នាក់​ទៀតក្នុង​បញ្ជី​ត្រូវ​ធ្វើ​ឃាត

អ៊ីស្រាអែល បានបង្កើនយុទ្ធនាការរបស់ខ្លួនប្រឆាំងនឹងក្រុមហាម៉ាស ដោយការគំរាមកំហែងធ្វើឃាតឥស្សរជនជាន់ខ្ពស់​៤​នាក់បន្ថែមទៀតនៅក្នុង​ក្រុម​សកម្ម​ប្រយុទ្ធ​​ប៉ាឡេស្ទីន​ ក្នុង​នោះ​មាន​ទាំងមេដឹកនាំដែលរស់នៅក្រៅតំបន់ហ្គាហ្សាស្ទ្រីប។

យោង​តាម​ការ​ចុះផ្សាយ​នា​ថ្ងៃ​ទី​៣​ខែ​មិថុនា​ឆ្នាំ​​២០២៥​របស់កាសែត​អារ៉ាប់​ Asharq Al-Awsat ចំណាត់ការនេះ​ធ្វើឡើងបន្ទាប់ពីមានការអះអាងពីការសម្លាប់លោក Mohammed Sinwar ប្រធានតំបន់ហ្គាហ្សារបស់ហាម៉ាស និងជាប្អូនប្រុសរបស់អតីតមេដឹកនាំ Yahya Sinwar នៅក្នុងការវាយប្រហារតាមអាកាសកាលពីថ្ងៃទី​១៣​ឧសភា សំដៅលើលេណដ្ឋានមួយ​កន្លែង​នៅក្រោមមន្ទីរពេទ្យ Gaza European ក្នុងទីក្រុង Khan Younis។

បុគ្គល​ ដែល​ត្រូវ​បាន​គេ​កំណត់​អត្តសញ្ញាណ​មាន​ដូចជា​៖

• Izz al-Din al-Haddad៖ លោក al-Haddad បច្ចុប្បន្ន​កំពុង​ដឹកនាំក្រុមយោធារបស់​ហាម៉ាសនៅតំបន់ហ្គាហ្សា។ លោក​បានរួចរស់ជីវិតពីការប៉ុនប៉ងធ្វើឃាតជាច្រើនលើករបស់អ៊ីស្រាអែល ហើយត្រូវបានចាត់ទុកថាជាតួអង្គសំខាន់ក្នុងការរៀបចំប្រតិបត្តិការយោធារបស់ក្រុមហាម៉ាស។
• Khalil al-Hayya៖ សមាជិកដ៏លេចធ្លោម្នាក់នៃការិយាល័យនយោបាយរបស់ក្រុមហាម៉ាស លោក al-Hayya ត្រូវបានគេរាយការណ៍ថាបានចូលរួម​​ក្នុង​ការចរចានៅបរទេស។
• Osama Hamdan៖ មានមូលដ្ឋាននៅប្រទេសលីបង់ លោក Hamdan គឺជាមន្ត្រីជាន់ខ្ពស់របស់ហាម៉ាសដែលពាក់ព័ន្ធនឹងទំនាក់ទំនងអន្តរជាតិរបស់ក្រុមនេះ។
• Sami Abu Zuhri ៖ ប្រតិបត្តិការពីប្រទេសអាល់ហ្សេរី លោក Abu Zuhri មានតួនាទីជាអ្នកនាំពាក្យជាន់ខ្ពស់ និងជាឥស្សរជននយោបាយនៅក្នុងក្រុមហាម៉ាស។

រដ្ឋមន្ត្រីការពារជាតិអ៊ីស្រាអែល លោក Israel Katz បានសង្កត់ធ្ងន់ថា ចំណាត់ការ​របស់​អ៊ីស្រាអែល​ត្រូវ​បាន​ធ្វើ​ជា​សកល ដោយ​បន្ថែម​ថា «ដៃ​ដ៏​វែងរបស់អ៊ីស្រាអែលនឹងចាប់​អ្នកទទួលខុសត្រូវទាំងអស់ចំពោះឃាតកម្ម និងអំពើឃោរឃៅនៅថ្ងៃទី​៧​ខែតុលា មិនថានៅទីណាក៏ដោយ នៅជិត ឬ​នៅ​ឆ្ងាយ ធ្វើ​រហូតដល់​មាន​ការ​កម្ចាត់​​ពួក​គេ​ចោល​ទាំង​ស្រុង»។

នេះគឺជាផ្នែក​មួយ​នៃយុទ្ធសាស្រ្ត​កាន់តែទូលំទូលាយ​របស់​អ៊ីស្រាអែល ក្នុងការរុះរើហេដ្ឋារចនាសម្ព័ន្ធដឹកនាំរបស់ក្រុមហាម៉ាស។ ក្នុងរយៈពេលប៉ុន្មានខែថ្មីៗនេះ អ៊ីស្រាអែលបានបញ្ជាក់ពីការធ្វើឃាតមន្ត្រីជាន់ខ្ពស់របស់ក្រុមហាម៉ាសជាច្រើននាក់ រួមទាំងលោក Marwan Issa ដែលជាមេបញ្ជាការរងនៃកងពលតូច Al-Qassam ផងដែរ។

សហគមន៍​អន្តរជាតិ​ បាន​សម្តែង​ការ​ព្រួយ​បារម្ភ​ចំពោះ​ការ​កើន​ឡើង​នៃ​អំពើ​ហិង្សា និង​ផល​ប៉ះពាល់​ដល់​ស្ថិរភាព​ក្នុង​តំបន់។ អង្គការមនុស្សធម៌បន្តរាយការណ៍ពីស្ថានភាពធ្ងន់ធ្ងរនៅតំបន់ហ្គាហ្សា ដោយអង្គការសហប្រជាជាតិបានពណ៌នាថាវាជា«កន្លែងស្រេកឃ្លានបំផុតនៅលើផែនដី» ដោយសារតែការបិទផ្លូវ​ជំនួយ និងការទទួលបានជំនួយមានកម្រិត៕

ដោយ៖ ឈាង