សិស្សវិទ្យាល័យសន្ធរម៉ុក បង្ខំចិត្តដើរលើគន្លង​យានជំនិះ ខណៈផ្លូវថ្មើរជើងជាប់របងសាលាក្លាយជាចំណតរថយន្ដ

សិស្សានុសិស្សនៃវិទ្យាល័យសន្ធរម៉ុក ក្នុងសង្កាត់ទឹកល្អក់ទី១ ខណ្ឌទួលគោក បានបង្ខំចិត្តចុះដើរលើគន្លងផ្លូវសម្រាប់យានជំនិះដែលអាចបង្កគ្រោះថ្នាក់គ្រប់ពេលវេលា ដោយសារផ្លូវថ្មើរជើងជាប់របងសាលាបានក្លាយជាចំណតរថយន្ដចតត្រៀបត្រាយ៉ាងអនាធិបតេយ្យ។ អាណាព្យាបាលសិស្សមួយចំនួនបានសំណូមពរដល់អាជ្ញាធរខណ្ឌជួយចុះពិនិត្យ និងចាត់វិធានការលើម្ចាស់រថយន្ដដែលយកមកចតគ្មានសណ្ដាប់ធ្នាប់បែបនេះ។

សិស្សវិទ្យាល័យសន្ធរម៉ុកម្នាក់សុំមិនបញ្ចេញឈ្មោះបានប្រាប់កម្ពុជាថ្មីថា ជារៀងរាល់ថ្ងៃនៅពេលចេញពីរៀនម្ដងៗសិស្សានុសិស្សទាំងអស់ត្រូវបង្ខំចិត្តដើរលើផ្លូវឡាន ម៉ូតូ ដែលអាចបង្កគ្រោះថ្នាក់គ្រប់ពេលវេលា ដោយសារផ្លូវថ្មើរជើងជាប់របងសាលាមានរថយន្តចតជាច្រើន។

ដោយឡែកអាណាព្យាបាលសិស្សម្នាក់ឈ្មោះ ហេង បានលើកឡើងដែរថា ចំពោះការចតរថយន្តនេះគាត់សង្កេតឃើញជាប្រចាំ ពេលលោកមកទទួលកូនចេញពីសាលាម្ដងៗលោកឃើញសិស្សានុសិស្សមួយចំនួនតែងតែដើរលើផ្លូវសម្រាប់រថយន្ត និងម៉ូតូធ្វើដំណើរ។ លោកក៏បានសំណូមពរដល់អាជ្ញាធរគួរយកចិត្តទុកដាក់ពីបញ្ហានេះ ដើម្បីបង្ការគ្រោះថ្នាក់ណាមួយកើតលើសិស្សានុសិស្ស។ ម្យ៉ាងវិញទៀត ការចតរថយន្តបែបនេះធើ្វអោយខូចការ៉ូឡា បាត់បង់សណ្តាប់ធ្នាប់ និងសោភ័ណភាពផងដែរ។

គួរបញ្ជាក់ថា កាលពីកន្លងទៅ លោក សុឹប សុផង់ អភិបាលរងខណ្ឌទួលគោកក៏ធ្លាប់ប្រាប់ កម្ពុជាថ្មី ថា រដ្ឋបាលខណ្ឌទួលគោក តែងតែចុះរៀបចំសណ្ដាប់ធ្នាប់ នៅលើចិញ្ចើមផ្លូវសម្រាប់អ្នកថ្មើរជើងជុំវិញសាលាវិទ្យាល័យសន្ធរម៉ុកជានិច្ច។ ប៉ុន្តែនៅពេលកម្លាំងចុះរៀបចំសណ្ដាប់ធ្នាប់ប្រជាពលរដ្ឋក៏បានយករថយន្តចេញទៅ ខណៈកម្លាំងចេញផុតបានបន្តិច ក៏នាំគ្នាយកមកចតវិញដដែល៕

អត្ថបទ៖ ម៉េង