កម្ពុជា បដិសេធដាច់អហង្កាមិនទទួលស្គាល់ផែនទីថៃគូសស្រេចតែចិត្តឯង ឬ«ផែនទីចោរ» ដែលសម្ដេចតេជោ បានហៅ

នៅក្នុងកិច្ចប្រជុំគណៈកម្មការព្រំដែនចម្រុះ(JBC) កម្ពុជា​-ថៃភាគីកម្ពុជា តំណាងដោយលោក ឡាំ ជា រដ្ឋមន្ត្រីទទួលបន្ទុកកិច្ចការព្រំដែន បដិសេធដាច់អហង្កាមិនទទួលស្គាល់ចំពោះផែនទីដែលថៃគូសស្រេចចិត្តតែឯង គ្មានការទទួលស្គាល់ដោយកម្ពុជា ឬភាគីអន្តរជាតិ។

ជាការកត់សម្គាល់ ការបញ្ជាក់របស់លោក ឡាំ ជា យ៉ាងដូច្នេះ គឺដូចទៅនឹងការលើកឡើងរបស់សម្ដេចតេជោ ហ៊ុន សែន នៅក្នុងសមាជព្រឹទ្ធសភា រដ្ឋសភា កាលពីដើមខែមិថុនា កន្លងទៅ។ ក្នុងសមាជនាកាលណោះសម្ដេចតេជោ ហ៊ុន សែន ថ្លែងខ្លាំងៗ និងហៅ ផែនទីដែលថៃគូសស្រេចតែចិត្តឯងកាលពីឆ្នាំ២០០៨ ថាជាផែនទីចោរ និងចាត់ទុកទង្វើគូសផែនទីស្រេចតែចិត្តឯងរបស់ថៃ​ ថាជាការ​ប្រមាទ និងបោក​បញ្ឆោតដ៏ទុច្ចរិត​មកលើកម្ពុជា។ សម្ដេច​តេជោ​បញ្ជាក់ថាការដោះស្រាយ ការកាត់សេចក្ដីលើរឿងព្រំដែន​កម្ពុជា-ថៃ ត្រូវប្រើសន្និសញ្ញាបារាំង-សៀម​ឆ្នាំ ១៩០៤-១៩០៧។

សេចក្ដីប្រកាសព័ត៌មានស្ដីពីលទ្ធផលនៃកិច្ចប្រជុំឱ្យដឹងថា នៅក្នុងកិច្ចប្រជុំ ៖« ឯកឧត្តម ឡាំ ជា ក៏បានបញ្ជាក់អំពីគោលនយោបាយរបស់រាជរដ្ឋាភិបាលកម្ពុជាក្នុងការប្រកាន់យក នូវសន្តិភាពនិយម និងចង់បានព្រំដែនមួយប្រកបដោយសន្តិភាព មិត្តភាព និងកិច្ចសហប្រតិបត្តិការល្អ ជាមួយភាគីថៃ ដោយផ្អែកលើមូលដ្ឋានលិខិតបទដ្ឋានគតិយុត្ត និងផែនទីដែលបានឯកភាពគ្នា ដូចមាន ចែងក្នុងអនុស្សរណៈនៃការយោគយល់គ្នា (MOU) ឆ្នាំ ២០០០ ដែលភាគីទាំងពីរបានឯកភាពគ្នាប្រើប្រាស់ ផែនទីមាត្រដ្ឋាន១/២០០.០០០ ស្របតាមស្មារតីនៃអនុសញ្ញាបារាំង-សៀមឆ្នាំ១៩០៤ និងសន្ធិសញ្ញា បារាំង-សៀមឆ្នាំ១៩០៧ ដើម្បីអនុវត្តការងារខណ្ឌសីមានិងបោះបង្គោលព្រំដែន។ ក្នុងន័យនេះ ភាគីកម្ពុជា បានបដិសេធយ៉ាងដាច់ខាតមិនទទួលស្គាល់ផែនទីដែលភាគីថៃបានគូសជាឯកតោភាគីហើយយកមក ប្រើប្រាស់ជាសម្អាង ដែលជាប្រភពចម្បងនាំមកនូវជម្លោះព្រំដែនដ៏រ៉ាំរ៉ៃ នាពេលកន្លងមក ក៏ដូចជា ពេលបច្ចុប្បន្ន និងទៅអនាគត។ »។

នៅអំឡុងឆ្នាំ២០០៨ ក្រោយកម្ពុជាជោគជ័យដាក់បញ្ចូលប្រាសាទព្រះវិហារជាសម្បត្តិបេតិកភណ្ឌពិភពលោក ថៃបានគូសផែនទីឯកតោភាគីមួយស្រេចតែចិត្តឯង ប្រឆាំងទៅនឹងការចុះបញ្ជីសម្បត្តិបេតិកភណ្ឌពិភពលោករបស់អង្គការយូណេស្កូ ក្រោមហេតុផល ការចុះបញ្ជីប្រាសាទព្រះវិហារទៅជាសម្បត្តិបេតិកភណ្ឌពិភពលោក ជាការបំពានទៅលើអធិបតេយ្យភាពដែនដីរបស់ខ្លួន ពិសេសតំបន់ជុំវិញប្រាសាទព្រះវិហារ ដែលថៃអះអាង ក្នុងសេចក្តីសម្រេច ICJ ឆ្នាំ ១៩៦២ មិនបានកំណត់ច្បាស់ពីតំបន់ជុំវិញប្រាសាទព្រះវិហារនៅឡើយ។

ថ្លែង​ក្នុងប្រជុំសមាជរដ្ឋសភា ព្រឹទ្ធសភា នៅរសៀលថ្ងៃទី២ ខែមិថុនា ឆ្នាំ២០២៥ សម្ដេច​តេជោ ហ៊ុន សែន ​បាន​បញ្ជាក់ថា​ការ​ប្រើប្រាស់ផែនទីគូស​ដោយ​ចិត្តឯងរបស់​ថៃ ​គឺ​ជា​ការ​ប្រឆាំង​ឯករាជ្យ​របស់កម្ពុជា ហើយ«ផែន​ទី​ចោរ»នេះ​មិន​គួរ​ត្រូវ​ប្រើម្ដង​ទៀត​ទេ។

ដោយឡែក នៅក្នុងកិច្ចប្រជុំដដែល លោក ឡាំ ជា  រដ្ឋមន្ត្រីទទួលបន្ទុកកិច្ចការព្រំដែន ប្រាប់ទៅកាន់ភាគីថៃថា  ក្រៅពីតំបន់ទាំងបួនដែលស្ថិតក្នុងបណ្ដឹងទៅ តុលាការយុត្តិធម៌អន្តរជាតិ(ICJ) ភាគីកម្ពុជានៅតែប្រកាន់ជំហរនិងសុច្ឆន្ទៈក្នុងការបន្តសហការជាមួយភាគីថៃ ដើម្បីជំរុញការវាស់វែង ខណ្ឌសីមា និងបោះបង្គោលព្រំដែន ដោយប្រើប្រាស់យន្តការគណៈកម្មការចម្រុះ ព្រំដែន (JBC) កម្ពុជា-ថៃ។ ភាគីទាំងពីរឯកភាពគ្នាគ្រោងជួបប្រជុំគ្នាសាជាថ្មី នៅខែកញ្ញា ឆ្នាំ២០២៥ ខាងមុខ៕

ដោយ៖ ង៉ិល ណារ៉ាត់