ព័ត៌មានអន្ដរជាតិ

រថក្រោះអ៊ីស្រាអែល បាញ់សម្លាប់មនុស្សជិត៦០នាក់ ដែលកំពុងរង់ចាំបើកជំនួយនៅហ្គាហ្សា

បានផុស

១ year មុន

នៅ

ថ្ងៃពុធ ១៨ មិថុនា ២០២៥

ដោយ

Chheang

ការបាញ់ផ្លោងដ៏សាហាវដោយរថក្រោះអ៊ីស្រាអែល បានកំណត់គោលដៅលើប្រជាជនប៉ាឡេស្ទីននៅទីក្រុង Khan Younis នៃតំបន់ហ្គាហ្សា កាលពីថ្ងៃអង្គារទី១៧ខែមិថុនា ដោយសម្លាប់មនុស្សយ៉ាងហោចណាស់ ៥៩នាក់ និង ២២១នាក់ផ្សេងទៀតរងរបួស ខណៈដែលពួកគេប្រមូលផ្តុំគ្នារង់ចាំទទួលជំនួយស្បៀងអាហារ។ នេះបើយោងតាមក្រសួងសុខាភិបាលនៃតំបន់ហ្គាហ្សា និងក្រុមគ្រូពេទ្យក្នុងតំបន់។

ពលរដ្ឋប៉ាឡេស្ទីនកំពុងប្រមូលផ្ដុំគ្នានៅជិតមន្ទីរពេទ្យ Nasser (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សាក្សីដែលបានឃើញផ្ទាល់ភ្នែក បានរៀបរាប់ពីរបៀបដែលរថក្រោះបានបាញ់ផ្លោងជាច្រើនគ្រាប់ចូលទៅក្នុងហ្វូងមនុស្ស។ Alaa អ្នករស់រានមានជីវិតម្នាក់ពីការបាញ់ប្រហារ បាននិយាយនៅឯមន្ទីរពេទ្យ Nasser ថា «ភ្លាមៗនោះ… គ្រាប់ផ្លោងចាប់ផ្តើមធ្លាក់ចុះ នោះជាគ្រាប់រថក្រោះ… មនុស្សកំពុងស្លាប់ ខ្លួនរបស់ពួកគេត្រូវបានហែកចេញពីគ្នា គឺគ្រាន់តែចាំយកអាហារសម្រាប់កូនរបស់ពួកគេប៉ុណ្ណោះ»។

បុគ្គលិកមន្ទីរពេទ្យ Nasser បានឲ្យដឹងថា យ៉ាងហោចណាស់អ្នករបួស ២០នាក់កំពុងស្ថិតក្នុងស្ថានភាពធ្ងន់ធ្ងរ។

យោធាអ៊ីស្រាអែល បានបញ្ជាក់ថា ពួកគេពិតជាប្រើប្រាស់រថក្រោះដើម្បីបាញ់ប្រហារមែន ដោយព្យាយាមកាត់បន្ថយផងដែរនូវគ្រោះថ្នាក់ដល់ជនស៊ីវិល ខណៈពេលដែលអះអាងសិទ្ធិរបស់កងទ័ពក្នុងការការពារខ្លួននៅពេលដែលស្ថិតនៅក្រោមការគំរាមកំហែង។

នៅថ្ងៃដដែលនោះក្នុងតំបន់ហ្គាហ្សា មនុស្សយ៉ាងហោចណាស់ ១៤នាក់ផ្សេងទៀតត្រូវបានគេរាយការណ៍ថាបានស្លាប់ ដោយការបាញ់កាំភ្លើងនិងការវាយប្រហារតាមអាកាសដាច់ដោយឡែកមួយរបស់អ៊ីស្រាអែល ដែលនាំឲ្យចំនួនអ្នកស្លាប់សរុបកើនឡើងដល់ប្រហែល ៧៣នាក់ក្នុងមួយថ្ងៃ។

នេះគឺជាការសម្លាប់ដ៏អាក្រក់បំផុត គិតចាប់តាំងពីការបើកការផ្ដល់ជំនួយឡើងវិញនៅក្នុងខែឧសភា។ អាជ្ញាធរហ្គាហ្សា បាននិយាយថា មនុស្សសរុបចំនួន ៣៩៧នាក់បានស្លាប់ ហើយជាង ៣ ០០០នាក់បានរងរបួស ខណៈពេលដែលព្យាយាមទទួលបានជំនួយស្បៀងអាហារ៕