ទោះ​ជាប់​​វាយ​អ៊ីរ៉ង់ អ៊ីស្រាអែល​មិន​បន្ធូរដៃ​នៅ​ហ្គាហ្សា ដោយក្នុង​​២៤​ម៉ោង​សម្លាប់​ប៉ាឡេស្ទីន​១៤០​នាក់

អាជ្ញាធរសុខាភិបាលហ្គាហ្សា បានរាយការណ៍កាលពីថ្ងៃពុធ​ទី​១៨​ខែ​មិថុនា​ឆ្នាំ​២០២៥ថា ការវាយប្រហារដោយយោធាអ៊ីស្រាអែលបានសម្លាប់ជនជាតិប៉ាឡេស្ទីនយ៉ាងហោចណាស់ ១៤០​នាក់នៅតំបន់ហ្គាហ្សាស្ទ្រីប ក្នុងរយៈពេល ២៤​ម៉ោងកន្លងមកនេះ។ ប្រជាជន​ប៉ាឡេស្ទីន​មួយ​ចំនួន​ ​បាន​និយាយ​ថា ស្ថានភាព​​លំបាក​របស់​ពួកគេ​កំពុង​ត្រូវ​បាន​បំភ្លេច​ចោល ខណៈ​ដែល​ការ​យក​ចិត្ត​ទុក​ដាក់​បាន​ងាក​ទៅ​រក​សង្រ្គាម​ផ្លូវអាកាស​រវាង​អ៊ីស្រាអែល និង​អ៊ីរ៉ង់។

ជនរងគ្រោះភាគច្រើន ស្ថិត​​នៅភាគកណ្តាល និងភាគខាងត្បូងនៃតំបន់ហ្គាហ្សា រួមទាំងនៅក្នុងជុំរុំ​ជនភៀសខ្លួន Maghazi នៃ​សង្កាត់ Zeitoun និងតំបន់បោះតង់​ស្នាក់​នៅ​បណ្ដោះអាសន្ននៃ​ទីក្រុង Khan Younis។ សាក្សី​និយាយ​ថា អ្នក​ស្លាប់​មួយ​ចំនួន​ជា​ស្ត្រី និង​កុមារ​ ដែល​កំពុង​ស្វែង​រក​អាហារ និង​ទី​ជម្រក បន្ទាប់​ពី​ត្រូវ​បាន​ផ្លាស់​ទីលំនៅ​​ក្រោយ​ការ​វាយ​ប្រហារ​លើក​មុន។

កងកម្លាំងអ៊ីស្រាអែល តាមសេចក្តីរាយការណ៍បានបើកការបាញ់ប្រហារទៅលើក្រុមប៉ាឡេស្ទីនដែលកំពុងរង់ចាំអាហារ នៅលើផ្លូវ Salahuddin។ យ៉ាងហោចណាស់មនុស្ស ១៤​នាក់ត្រូវបានសម្លាប់​នៅ​ទីនោះ។ នេះបើតាមក្រសួងសុខាភិបាលហ្គាហ្សា។ យោធាអ៊ីស្រាអែលបានបញ្ជាក់ពីការប្រើប្រាស់កាំភ្លើង ប៉ុន្តែអះអាងថា ខ្លួនបានចេញការព្រមានជាមុន ដោយចោទប្រកាន់​ថា​ ​ក្រុម​មនុស្ស​ទាំង​នោះ​មិន​ស្ដាប់ ហើយ​បង្ក​​លក្ខណៈគំរាមកំហែង​ដល់ពួកគេ។

កាលពីខែមុនមានការកើនឡើងយ៉ាងខ្លាំងនៃអំពើហិង្សានៅក្នុងតំបន់ហ្គាហ្សា បើទោះបីជាមានការខិតខំប្រឹងប្រែងជាអន្តរជាតិដើម្បីសម្របសម្រួលបទឈប់បាញ់ក៏ដោយ។ មន្ត្រីសុខាភិបាល បាននិយាយថា ចាប់តាំងពីខែតុលាឆ្នាំ​២០២៣ ជនជាតិប៉ាឡេស្ទីនជាង ៥៥ ០០០​នាក់​​ត្រូវបានសម្លាប់នៅក្នុងប្រតិបត្តិការរបស់អ៊ីស្រាអែល ដោយមានរាប់ពាន់នាក់ទៀតរងរបួស។ ក្រុមមនុស្សធម៌រាយការណ៍ថា តំបន់នេះកំពុងប្រឈមមុខនឹងការដួលរលំស្ទើរតែទាំងស្រុងនៃហេដ្ឋារចនាសម្ព័ន្ធផ្នែកវេជ្ជសាស្ត្រ អាហារ និងទឹក។

ការវាយប្រហារចុងក្រោយនេះ ក៏កើតមានឡើងផងដែរ នៅពេលដែលការយកចិត្តទុកដាក់ជាសកលកាន់តែផ្លាស់ប្តូរឆ្ពោះទៅរកជម្លោះដែនអាកាសដែលកំពុងកើតឡើងរវាងអ៊ីស្រាអែល និងអ៊ីរ៉ង់។ ក្នុងរយៈពេលប៉ុន្មានថ្ងៃថ្មីៗនេះ អ៊ីស្រាអែលបានបើកការវាយប្រហារយ៉ាងជ្រៅទៅក្នុងទឹកដីអ៊ីរ៉ង់ ដោយសំដៅលើអ្វីដែលខ្លួនអះអាងថាជាកន្លែងយោធា និងនុយក្លេអ៊ែរ។ អ៊ីរ៉ង់​បាន​ប្តេជ្ញា​សងសឹក ហើយ​មេដឹកនាំ​ពិភពលោក​បារម្ភ​ពី​ការកើនឡើង​​ភាព​តានតឹង​កាន់​តែ​ខ្លាំង​នៅ​ក្នុង​តំបន់។

លោក Shaban Abed ជា​ប្រជាជន​ហ្គាហ្សា បានរៀបរាប់​ថា «យើងប្រហែលជាសប្បាយចិត្តដែលឃើញអ៊ីស្រាអែលរងទុក្ខដោយសារគ្រាប់រ៉ុកកែត​របស់អ៊ីរ៉ង់ ប៉ុន្តែនៅ​ចុង​បញ្ចប់ មួយថ្ងៃទៀតនៅក្នុងសង្រ្គាម(ហ្គាហ្សា)នេះ បានធ្វើ​ឲ្យ​បាត់បង់ជីវិតមនុស្សស្លូតត្រង់រាប់សិបនាក់… យើងកំពុងត្រូវបានគេ​បំភ្លេចចោល​ហើយ»។

អង្គការ​ជំនួយ​លើក​ឡើង​​ថា ស្ថានការណ៍​នៅ​តំបន់​ហ្គាហ្សា​កាន់តែ​អាក្រក់​ទៅ​ៗ​យ៉ាង​ឆាប់​រហ័ស។ ទីភ្នាក់ងារជំនួយ និងការងាររបស់អង្គការសហប្រជាជាតិ (UNRWA) បានពណ៌នាយន្តការជំនួយមនុស្សធម៌ដែលកំពុងដំណើរការក្រោមការត្រួតពិនិត្យរបស់អ៊ីស្រាអែលថាជា «ភាពអាម៉ាស»។ លោក Philippe Lazzarini ប្រធាន​អង្គការ UNRWA បាននិយាយថា ប្រព័ន្ធបច្ចុប្បន្ន ប្រៀប​ដូចជា «ស្នាមប្រឡាក់នៅលើមនសិការរួមរបស់យើង» ដោយកត់សម្គាល់ថា មនុស្សកំពុងត្រូវបានសម្លាប់ខណៈ​គ្រាន់​តែ​កំពុងស្វែងរក​អាហារ​ទទួល​ទាន​ប៉ុណ្ណោះ។

យោងតាមកម្មវិធីស្បៀងអាហារពិភពលោក មាន​តម្រូវការស្បៀងអាហារមូលដ្ឋាន​តិចជាង ២០ភាគរយ​ប៉ុណ្ណោះ ដែល​អាច​ទៅ​ដល់​ដៃ​ប្រជាជន​តំបន់ហ្គាហ្សា។ ទោះបីជាមានការអំពាវនាវជាអន្តរជាតិម្តងហើយម្តងទៀតសម្រាប់​ការ​បើក​ឲ្យ​មាន​ច្រករបៀងមនុស្សធម៌ និងបទឈប់បាញ់ក៏ដោយ ប្រតិបត្តិការរបស់អ៊ីស្រាអែល​នៅ​តែ​បានបន្ត ក្រោមហេតុផល​​បោសសម្អាត​ឲ្យ​បាន​​ទាំង​ស្រុង​នូវ​ក្រុម​សកម្ម​ប្រយុទ្ធ​ហាម៉ាស៕

ដោយ៖ ឈាង