ខ្មាន់កាំភ្លើងបាញ់សម្លាប់មនុស្ស ១១នាក់ក្នុងរដ្ឋ Guanajuato​ ដែលសម្បូរហិង្សា​​នៅ​​ម៉ិកស៊ិក

យោងតាមការចេញផ្សាយរបសប់សារព័ត៌មាន​ Al Jazeera នៅថ្ងៃទី២៦ខែមិថុនានេះ ការវាយប្រហារដោយកាំភ្លើងដ៏សាហាវមួយក្នុងពិធីបុណ្យសាសនាមួយនៅក្នុងទីក្រុង Irapuato រដ្ឋ Guanajuato បានបណ្តាលឲ្យមនុស្ស ១១នាក់ស្លាប់ និងជាង ២០នាក់រងរបួស។

ការបាញ់ប្រហារបានកើតឡើងក្នុងអំឡុងពេលប្រារព្ធពិធីបុណ្យសាសនាមួយ ដោយ​​បណ្តាល​​ឲ្យ​ហ្វូងមនុស្ស​​ធ្លាក់​​ចូល​ទៅ​ក្នុង​​ភាព​ចលាចល ដោយ​អ្នក​ខ្លះរត់គេចខ្លួន ​អ្នកខ្លះប្រញាប់ប្រញាល់បញ្ជូនអ្នករបួសទៅកាន់មន្ទីរពេទ្យ។

ក្នុង​ចំណោម​ជន​រង​គ្រោះ ​មានប្រុស​៨​នាក់និង​​ស្រី​២​នាក់ ដែល​ពួក​គេ​​មាន​​អាយុ​១៧​ឆ្នាំ​។ អាជ្ញាធរក្នុងតំបន់បានថ្កោលទោស​ការវាយប្រហារនេះ ដោយ​ហៅ​​​ថា ជា​«ទង្វើដ៏កំសាក» ហើយកងកម្លាំងសន្តិសុខកំពុងស្វែងរកយ៉ាងសកម្មចំពោះអ្នកវាយប្រហារ។ ប្រធានាធិបតី ប្រទេសម៉ិកស៉ិក លោកស្រី Claudia Sheinbaum បានថ្កោលទោសនិងសន្យា​រក​យុត្តិធម៌។

រដ្ឋ Guanajuato ទោះបីជាមានសារៈសំខាន់ផ្នែកសេដ្ឋកិច្ច និងទេសចរណ៍ក៏ដោយ ប៉ុន្តែវាបានក្លាយជារដ្ឋ​មាន​​ហិង្សា​ច្រើន​បំផុតរបស់ប្រទេសម៉ិកស៊ិក ដែលភាគច្រើនបណ្តាល​មក​ពី​ជម្លោះរវាងក្រុម​​អ្នកលេង Santa Rosa de Lima និងក្រុម Jalisco New Generation។ កាលពីឆ្នាំមុនមានការសម្លាប់មនុស្សជាង ៣០០០ត្រូវបានកត់ត្រានៅក្នុងរដ្ឋនេះ។ ចាប់តាំងពីសង្រ្គាមគ្រឿងញៀនឆ្នាំ ២០០៦ របស់ម៉ិកស៊ិកបានចាប់ផ្តើម មនុស្សជាង ៤៨ម៉ឺននាក់ត្រូវបានសម្លាប់ និង ១២ម៉ឺន នាក់នៅតែបាត់ខ្លួន៕

អត្ថបទ៖ ប៊ុន សុភាព