ព័ត៌មានជាតិ

ប្រធានសភាអារ៉ាប៊ីសាអូឌីតនឹងមកបំពេញទស្សនកិច្ចរយៈពេល៥ថ្ងៃនៅកម្ពុជា

បានផុស

១០ ខែ មុន

នៅ

ថ្ងៃចន្ទ ៣០ មិថុនា ២០២៥

ដោយ

ប្រធានសភាអារ៉ាប៊ីសាអូតឌីតលោក អាប់ឌុលឡា ប៊ីន ម៉ូហាម៉េដ ប៊ីន អ៊ីប្រាហ៊ីម អាល សេក្ខ (Abdullah Bin Mohammed Bin Ibrahim Al-Sheikh) នឹងមកបំពេញទស្សនកិច្ចនៅកម្ពុជាចាប់ពីថ្ងៃទី៣០ ខែមិថុនានេះរហូតដល់ថ្ងៃទី៤ ខែកក្កដា ឆ្នាំ២០២៥ ដើម្បីពង្រឹងកិច្ចសហប្រតិបត្តិការរដ្ឋសភានៃប្រទេសទាំងពីឱ្យកាន់តែរឹងមាំ និងស៊ីជម្រៅបន្ថែមទៀតទាំងក្នុងក្របខណ្ឌទ្វេភាគី និងពហុភាគី។

តាមការឱ្យដឹងពីអគ្គលេខាធិការដ្ឋានរដ្ឋសភាកម្ពុជាក្នុងដំណើរទស្សនកិច្ចនេះ លោក អាប់ឌុលឡា ប៊ីន ម៉ូហាម៉េដ ប៊ីន អ៊ីប្រាហ៊ីម អាល សេក្ខ នឹងជួបសម្ដែងការគួរសមជាមួយប្រធានព្រឹទ្ធសភា ប្រធានរដ្ឋសភា និងនាយករដ្ឋមន្ត្រីកម្ពុជា។

ក្រៅពីជំនួបជាមួយមេដឹកនាំកំពូលកម្ពុជាលោកក៏នឹងដឹកនាំប្រតិភូធ្វើទស្សនកិច្ចនៅតាមទីតាំងសំខាន់ៗមួយចំនួននៅរាជធានីភ្នំពេញផងដែរ។

ដំណើរទស្សនកិច្ចរបស់ប្រធានសភាអារ៉ាប៊ីសាអូឌីតនៅពេលនេះគឺ៦ខែបន្ទាប់ពីប្រធានព្រឹទ្ធសភាកម្ពុជា សម្ដេចតេជោ ហ៊ុន សែន បានធ្វើដំណើរទស្សនកិច្ចនៅព្រះរាជាណាចក្រអារ៉ាប៊ីសាអូឌីតកាលពីដើមខែធ្នូ ឆ្នាំ២០២៤។ ដែលក្នុងដំណើរទស្សនកិច្ចនោះប្រធានសភាអារ៉ាប៊ីសាអូតឌីតបានជម្រាបសម្ដេចតេជោថាប្រទេសនេះនឹងបើកទូតនៅកម្ពុជាក្នុងពេលខាងមុខ ព្រមទាំងបញ្ជាក់ថា អារ៉ាប៊ីសាអូឌីត យកចិត្តទុកដាក់ខ្លាំងលើការលើកកម្ពស់សេដ្ឋកិច្ច សាសនា និងការធ្វើកិច្ចសហប្រតិបត្តិការលើវិស័យផ្សេងៗទៀត ជាពិសេសវិស័យប្រេងដែលជាវិស័យសំខាន់បំផុតរបស់អារ៉ាប៊ីសាអូឌីត៕