សន្តិសុខសង្គម

អភិបាលរាជធានីឱ្យដាក់ផែនការទៅមេភូមិនិងពលរដ្ឋសហការបង្ក្រាបការជក់ VAP របស់សិស្សសាលា

បានផុស

១ year មុន

នៅ

ថ្ងៃសៅរ៍ ៥ កក្កដា ២០២៥

ដោយ

អភិបាលរាជធានីភ្នំពេញលោក ឃួង ស្រេង បានបញ្ជាទៅរដ្ឋបាលខណ្ឌទាំង១៤ ត្រូវប្រជុំដាក់ផែនការទៅឱ្យមេភូមិ និងប្រជាពលរដ្ឋ ដើម្បីឱ្យពួកគាត់សហការពិនិត្យតាមដាន និងបង្ក្រាបការជក់ ស៊ីហ្សា (VAP) របស់សិស្សនៅតាមសាលារៀន និងកន្លែងសប្បាយឱ្យអស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ ជាមួយកម្លាំងមានសមត្ថកិច្ចទាំង២ប្រភេទ មកពីមន្ទីរពាក់ព័ន្ធ និងអាជ្ញាធរខណ្ឌទាំង១៤ នាព្រឹកថ្ងៃសុក្រ ទី០៤ ខែកក្កដា ឆ្នាំ២០២៥ នៅសាលារាជធានីភ្នំពេញ លោក ឃួង ស្រេង បានលើកឡើងថា សិស្សានុសិស្សជាទំពាំងស្នងឬស្សី ដែលត្រូវការមើលថែទាំឱ្យបានល្អដើម្បីជាធនធានមនុស្សក្នុងការអភិវឌ្ឍប្រទេសជាតិ។

លោកបន្ថែមថា៖ «បើពួកគាត់កំពុងពេញកម្លាំង បែរជាឈឺ តើយើងមានកម្លាំងឯណាដើម្បីជួយជាតិ រឿងនេះមន្ទីរអប់រំ យុវជន និងកីឡា ត្រូវមើលការងារនេះឱ្យបានល្អ»។

លោកអភិបាលក៏បញ្ជាទៅអាជ្ញាធរខណ្ឌទាំង១៤ ត្រូវចុះពិនិត្យជាប្រចាំ ត្រូវយកស្លាកសញ្ញាហាមជក់បារីអេឡិចត្រូនិច ឬស៊ីហ្សា (VAP) នៅតាមហាងនានា ជាពិសេសនៅហាងបារាំង។ លោកថា បើចង់ធ្វើអភិបាលខណ្ឌត្រូវតែនៅជាមួយប្រជាពលរដ្ឋជានិច្ចគ្មានគិតថ្ងៃសៅរ៌ និងអាទិត្យនោះទេ៕