សេដ្ឋកិច្ច

ការដោះដូរទំនិញកម្ពុជា-ថៃ មានទំហំទឹកប្រាក់ជាង ២,១៩ ពាន់លានដុល្លារ នៅក្នុងឆមាសទី១

បានផុស

១ year មុន

នៅ

ថ្ងៃព្រហស្បតិ៍ ១០ កក្កដា ២០២៥

ដោយ

នៅឆមាសទី១ ឆ្នាំ ២០២៥ ការដោះដូរទំនិញរវាងកម្ពុជា-ថៃ មានទំហំទឹកប្រាក់ជាង ២,១៩ ពាន់លានដុល្លារ កើនឡើង ៦,៦% ធៀបនឹងរយៈពេលដូច្នាកាលពីឆ្នាំមុន ក្នុងនោះកម្ពុជានាំចេញទៅថៃជាង ៤៤៨ លានដុល្លារ កើន ១,៩% ចំណែកឯថៃនាំទំនិញចូលមកវិញ មានទំហំទឹកប្រាក់ ១,៧៤ ពាន់លានដុល្លារ កើន ៧,៩%។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនុប្រធានសភាពាណិជ្ជកម្មកម្ពុជា អ្នកឧកញ៉ា លឹម ហេង បានលើកឡើងថា ការបិទព្រំដែនរវាងថៃ និងកម្ពុជា ខាតបង់ផលប្រយោជន៍ទាំងសងខាង ដូចប្រមុខរដ្ឋាភិបាលបានអំពាវនាវថា ការប៉ះទង្គិចគ្នាតាមព្រំដែន សុំកុំពង្រីកទំនាស់ឱ្យរាលដាលធំដល់សេដ្ឋកិច្ច ពាណិជ្ជកម្ម និងវិស័យផ្សេងៗ។

លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានលើកឡើងថា ការបិទព្រំដែនគោកទាំងអស់ជាមួយកម្ពុជា ជាឯកតោភាគីរបស់ភាគីថៃ បច្ចុប្បន្ននេះ សភាពការពាណិជ្ជកម្ម ក៏ដូចជាភាគីថៃ ជាពិសេសអ្នករកស៊ី បានបង្វែរទិសការនាំចូលទំនិញគ្រឿងឧបភោគបរិភោគដទៃទៀតមកកម្ពុជាទៅតាមផ្លូវទឹកវិញ លើកលែងតែប្រភេទទំនិញដែលកម្ពុជាបិទការនាំចូលពីថៃប៉ុណ្ណោះ។

លោក ប៉ែន សុវិជាតិ បានបញ្ជាក់ថា៖ «សភាពការពាណិជ្ជកម្មនាពេលបច្ចុប្បន្ននេះ ទាំងភាគីថៃ ជាពិសេសអ្នករកស៊ីបានបង្វែរការនាំចូលទៅតាមផ្លូវទឹកវិញ ពីព្រោះកម្ពុជាបិទការនាំចូលពីថៃទាំងស្រុងទៅលើប្រភេទ ប្រេងឥន្ធនៈ ឧស្ម័ន អគ្គិសនី និងបន្លែ ផ្លែឈើប៉ុណ្ណោះ ហើយគ្រឿងឧបភោគបរិភោគដទៃទៀត នៅដំណើរការជាធម្មតា គឺដឹកជញ្ជូនតាមផ្លូវទឹកឆ្ពោះមកកម្ពុជាតាមកំពង់ផែក្រុងព្រះសីហនុ»។

កម្ពុជានាំចេញផលិតផលកសិម្មទៅប្រទេសថៃដូចជា ដំឡូងមី ពោត ម្រេច សណ្ដែក និងស្វាយ ខណៈថៃនាំមកវិញនូវសម្ភារៈសំណង់ គ្រឿងអេឡិកត្រូនិក គ្រឿងយន្តកសិកម្ម ភេសជ្ជៈ បន្លែ ផ្លែឈើ។

យោងក្រសួងពាណិជ្ជកម្ម នៅក្នុងឆ្នាំ ២០២៤ ពាណិជ្ជកម្មទ្វេភាគីកម្ពុជា-ថៃ សម្រេចបានជាង ៤,២៨ ពាន់លានដុល្លារ កើនឡើង ១៥,៥% ក្នុងនោះកម្ពុជានាំចេញទៅថៃបានជិត ៨៤៥ លានដុល្លារ ចំណែកថៃនាំចូលមកវិញ ៣,៤៤ ពាន់លានដុល្លារ កើន ១៨,៩ ភាគរយ៕

អត្ថបទ៖ ឡេង ដេត

Related Topics:ពាណិជ្ជកម្មកម្ពុជា-ថៃ ការនាំចេញ