ធ្លាក់យន្តហោះខ្នាតតូចក្នុងទីក្រុង Essex ប្រទេសអង់គ្លេសសម្លាប់មនុស្ស ៤​នាក់

យោងតាមការចេញផ្សាយរបស់សារព័ត៌មាន​ CNA សោកនាដកម្មធ្លាក់យន្តហោះខ្នាតតូចនៅអាកាសយានដ្ឋាន London Southend ក្នុងទីក្រុង Essex ប្រទេសអង់គ្លេសកាលពីថ្ងៃអាទិត្យ ទី១៤ ខែកក្កដា បានឆក់យកជីវិតមនុស្ស ៤នាក់។

យន្តហោះធុនតូចនេះ ជាប្រភេទយន្តហោះ Beechcraft B200 បានធ្លាក់ភ្លាមៗបន្ទាប់ពីបានហោះឡើងនៅម៉ោងប្រហែល ៤:០០ ល្ងាច(ម៉ោងក្នុងស្រុក) ពេលកំពុងធ្វើដំណើរទៅកាន់ប្រទេសហូឡង់។ បន្ទាប់ពីធ្លាក់ យន្តហោះបានឆាបឆេះយ៉ាងសន្ធោសន្ធៅ បញ្ចេញផ្សែងខ្មៅយ៉ាងក្រាស់​ទៅលើមេឃ។ ភ្នាក់ងារសង្គ្រោះបន្ទាន់បានឆ្លើយតបយ៉ាងរហ័ស ដោយប្រជាជននៅតំបន់ក្បែរៗនោះ ត្រូវបានជម្លៀសចេញជាការប្រុងប្រយ័ត្ន។

ប៉ូលិស​បាន​បញ្ជាក់​ថា មនុស្ស​ទាំង​៤​នាក់​ដែល​ជិះ​លើ​យន្តហោះ​បាន​ស្លាប់​ទាំងអស់ក្នុង​ហេតុការណ៍​នេះ ។ ខណៈពេលដែលអត្តសញ្ញាណរបស់ពួកគេមិនត្រូវបានបញ្ចេញជាផ្លូវការ ប៉ូលិសសន្និដ្ឋានថាជនរងគ្រោះទាំងអស់គឺជាជនជាតិបរទេស។ ឥឡូវនេះអ្នកស៊ើបអង្កេតកំពុងធ្វើការដើម្បីផ្ទៀងផ្ទាត់អត្តសញ្ញាណរបស់ពួកគេ។

អាកាសយានដ្ឋាន London Southend មានទីតាំងប្រហែល ៦៥ គីឡូម៉ែត្រភាគខាងកើតទីក្រុងឡុងដ៍ និងត្រូវបានគេស្គាល់ថាជាព្រលានយន្តហោះធំជាងគេទី៦នៅក្នុងតំបន់នៃទីក្រុងឡុងដ៍ត្រូវបានបិទរហូតដល់មានការជូនដំណឹងបន្ថែម។ សាក្សីរាប់សិបនាក់កំពុងត្រូវបានសម្ភាស ហើយក្រុមធ្វើកោសល្យវិច្ច័យនិងប៉ូលិសកំពុងប្រមូលភស្តុតាងដើម្បីរកមូលហេតុនាំឱ្យមានសោកនាដកម្មដ៏សាហាវនេះ៕

អត្ថបទ៖ ប៊ុន សុភាព