កីឡា

គ្រូព្រះខ័នរាជស្វាយរៀង ចង់ឃើញការប្រកួតរបស់យុវជនកាន់តែច្រើននៅកម្ពុជា

បានផុស

១២ ខែ មុន

នៅ

ថ្ងៃពុធ ២៣ កក្កដា ២០២៥

ដោយ

លោក Matthew McConkey គ្រូបង្គោលក្លិបព្រះខ័នរាជស្វាយរៀងបានភ្ញាក់ផ្អើលចំពោះការត្រៀមខ្លួនកាន់តែល្អរបស់ក្លិបជាច្រើនត្រៀមរដូវកាលថ្មី ប៉ុន្តែលោកចង់ឃើញមានការអភិវឌ្ឍថ្នាលយុវជន និងប្រកួតប្រជែងរបស់យុវជនឲ្យបានច្រើន ទើបវិស័យបាល់ទាត់កម្ពុជាកាន់តែល្អប្រសើរ។

ក្នុងបទសម្ភាសជាមួយសារព័ត៌មាន«កម្ពុជាថ្មី» លោក Matthew McConkey បានលើកឡើងថា ចាប់តាំងពីលោកបានមកនៅកម្ពុជា អស់រយៈពេល ៤ ឆ្នាំ លោកមិនធ្លាប់ឃើញមានការត្រៀមខ្លួនធំបែបនេះទេនៅក្នុងចំណោមក្រុមលំដាប់កំពូលទាំង៦។ ប្រហែលជាមានអ្វីកាន់តែល្អ និងគួរឲ្យចាប់អារម្មណ៍ថែមទៀតនៅពេលខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកប្រាប់ថា ៖«ឃើញហើយ វិសាខា បានតែងតាំងគ្រូបង្វឹកថ្មី ក្រុមការងារថ្មីក៏ច្រើន កីឡាករថ្មីក៏ច្រើន។ ណាហ្គាវើលដ៍ ខ្ញុំគិតថា ពួកគេបានផ្លាស់ប្តូរកីឡាករបីបួននាក់ មានទាំងចុះកុងត្រាកីឡាករក្នុងស្រុកថែមទៀត។ ភ្នំពេញក្រោនដូចគ្នា បានផ្លាស់ប្តូរកីឡាករច្រើន។ បឹងកេត ក៏ផ្លាស់ប្តូរច្រើន ប្រហែលជាបីបួននាក់»។

នៅពេលសួរថា តើលោកចាប់អារម្មណ៍យ៉ាងណាចំពោះវិស័យបាល់ទាត់កម្ពុជានាពេលបច្ចុប្បន្ន? លោកបានឆ្លើយថា អ្នកគ្រប់គ្នាអាចឃើញហើយពីម្ចាស់ក្លិបនីមួយៗបានកំពុងយកចិត្តទុកដាក់អភិវឌ្ឍក្លិបទាំងធនធានមនុស្ស កីឡាករ កីឡាការិនី ថ្នាលយុវជន និងហេដ្ឋារចនាសម្ព័ន្ធ។ ក្លិបជាច្រើនមានទីលានហ្វឹកហាត់ មានកីឡដ្ឋាន។ មូលដ្ឋានគ្រឹះទាំងកំពុងតែធ្វើឲ្យវិស័យបាល់ទាត់កម្ពុជាកាន់តែល្អប្រសើរ។

ទោះជាយ៉ាងណា លោកបានមើលឃើញថា ឱកាសនៃការប្រកួតប្រជែងរបស់ក្រុមយុវជនគឺនៅមានកម្រិតដែលគួរយកចិត្តទុកដាក់ ពីព្រោះក្លិបជាច្រើនបានកំពុងបណ្តុះបណ្តាលថ្នាលយុវជនយ៉ាងល្អ។

លោកបានលើកឡើងថា ៖«យើងបានធ្វើខ្លះហើយ ដូចកាលកីឡាស៊ីហ្គេម ឆ្នាំ ២០២៣ កម្ពុជាមានគោលការណ៍ដាក់កីឡាករអាយុក្រោម ២២ ឆ្នាំលេងក្នុងលីគ ប៉ុន្តែយើងគួរអភិវឌ្ឍថ្នាលយុវជនឲ្យបានច្រើនបន្ថែមទៀតដើម្បីក្រុមជម្រើសជាតិ។ សម្រាប់ខ្ញុំ គឺចាប់ផ្តើមអភិវឌ្ឍចាប់ពីកម្រិតអាយុ ១០ឆ្នាំ ១១ឆ្នាំ ១២ឆ្នាំ ១៣ ឆ្នាំ និងត្រូវមានកម្មវិធីប្រកួតឲ្យបានច្បាស់លាស់ ជាមួយបរិយាកាសនៃការអភិវឌ្ឍល្អ»។

ជាការពិតណាស់ បច្ចុប្បន្ន ក្លិបបាល់ទាត់កម្ពុជាមានគុណភាពមិនចាញ់ក្លិបនៅក្នុងតំបន់ប៉ុន្មានឡើយ ប៉ុន្តែបើនិយាយពីក្រុមជម្រើសជាតិ ទាំងកម្រិតយុវជន ក្រុមធំ និងក្រុមនារី គឺ កម្ពុជាធ្វើមិនបានល្អទេសម្រាប់ការប្រកួតអន្តរជាតិប៉ុន្មានឆ្នាំចុងក្រោយ៕