អូស្ត្រាលី ​នឹង​ទិញ​នាវា​ចម្បាំង​ជប៉ុន​១១​គ្រឿង​ក្នុង​តម្លៃ​៦​ពាន់​លាន​ដុល្លារ

អូស្ត្រាលីនឹងទិញនាវាចម្បាំងបំបាំងកាយ Mogami-class ចំនួន ១១ គ្រឿងពីក្រុមហ៊ុន Mitsubishi Heavy Industries របស់ប្រទេសជប៉ុន ដែលជាការកត់សម្គាល់ថាជាកិច្ចព្រមព្រៀងឧស្សាហកម្មការពារជាតិដ៏ធំបំផុតរវាងប្រទេសទាំងពីរ។ នេះបើយោងតាមការចេញផ្សាយរបស់សារព័ត៌មាន ​CNA នៅថ្ងៃទី០៥ខែសីហា។

គម្រោងទិញនាវានេះប្រកាសដោយរដ្ឋមន្ត្រីការពារជាតិលោក Richard Marles ក្នុងកិច្ចព្រមព្រៀងតម្លៃ៦ ពាន់លានដុល្លារគឺជាផ្នែកមួយនៃការរៀបចំរចនាសម្ព័ន្ធយោធារបស់អូស្ត្រាលី ដើម្បីបង្កើនសមត្ថភាពវាយប្រហាររយៈចម្ងាយឆ្ងាយ ឆ្លើយតបទៅនឹងការកើនឡើងនៃកម្លាំងទ័ពជើងទឹករបស់ចិន។

នាវាចម្បាំងទំនើបៗទាំងនេះនឹងមានសមត្ថភាពបាញ់បង្ហោះរយៈចម្ងាយឆ្ងាយ និងជំនួសកងនាវា Anzac-class ដ៏ចាស់របស់ប្រទេសអូស្ត្រាលី។ នាវាចម្បាំងបីគ្រឿងដំបូងនឹងត្រូវសាងសង់នៅក្នុងប្រទេសជប៉ុន ហើយនាវាផ្សេងទៀតនឹងត្រូវផលិតនៅភាគខាងលិចប្រទេសអូស្ត្រាលី។ នាវាទីមួយនឹងធ្វើហើយនិងអាចប្រើប្រាស់នៅឆ្នាំ ២០៣០។

គួរបញ្ជាក់ថាកិច្ចព្រមព្រៀងនេះគឺជាផ្នែកមួយនៃផែនការធំជាងនេះរបស់អូស្ត្រាលីក្នុងការពង្រឹងយោធារបស់ខ្លួន ដែលរួមបញ្ចូលទាំងការទិញនាវាមុជទឹកនុយក្លេអ៊ែរពីសហរដ្ឋអាមេរិក និងចក្រភពអង់គ្លេសតាមរយៈកិច្ចព្រមព្រៀង AUKUS (កតិកាសញ្ញាសន្តិសុខបីផ្លូវ រវាងប្រទេសអូស្ត្រាលី ចក្រភពអង់គ្លេស និងសហរដ្ឋអាមេរិក) ផងដែរ។

លើសពីនេះប្រទេសអូស្ត្រាលីគ្រោងនឹងចំណាយបន្ថែមទៀតលើវិស័យការពារជាតិ រហូតដល់ ២.៤% នៃសេដ្ឋកិច្ចរបស់ខ្លួន ទោះបីជាមនុស្សមួយចំនួនបារម្ភថា វាអាចចំណាយច្រើនពេក ឬចំណាយពេលយូរក៏ដោយ៕

អត្ថបទ៖ ប៊ុន សុភាព