កីឡា

Nick Taylor ប្រាប់ថា អ្វីៗល្អប្រសើរនៅថៃ ដោយរូបគេផ្តោតលើការប្រកួតជាចម្បង

បានផុស

៨ ខែ មុន

នៅ

ថ្ងៃអង្គារ ១៩ សីហា ២០២៥

ដោយ

កីឡាករបាល់ទាត់ជម្រើសជាតិកម្ពុជា Nick Taylor បានក្លាយជាកីឡាករទី១សម្រាប់ការរកបានគ្រាប់បាល់ក្នុងលីគបាល់ទាត់កំពូលថៃ Thai League 1 រដូវកាលថ្មីដែលបានចាប់ផ្តើមកាលពីថ្ងៃទី១៥ ខែសីហា ឆ្នាំ ២០២៥។

កម្ពុជាមានកីឡាករជម្រើសជាតិ ២ នាក់ ដែលបានទៅប្រកបអាជីពបាល់ទាត់នៅប្រទេសថៃ គឺ Nick Taylor នៅក្លិប PT Prachuap និងកីឡាករ Takaki Ose នៅក្លិប BG Pathum United ខណៈកម្ពុជា និង ថៃ កំពុងមានជម្លោះព្រំដែន ដែលអ្នកគាំទ្រមានការព្រួយបារម្ភដល់កីឡាករទាំងពីរនាក់។ ទោះបីជាយ៉ាងណា លីគថៃបានចាប់ដំណើរការប្រកួត ហើយកីឡាករជម្រើសជាតិកម្ពុជាទាំងពីរសុទ្ធតែបានបង្ហាញខ្លួនក្នុងជម្រើស១១នាក់ដំបូងដូចគ្នា។

កីឡាករ Nick Taylor បានប្រាប់«កម្ពុជាថ្មី»ថា សម្រាប់ការប្រកបបាល់ទាត់របស់ខ្លួននៅថៃដំណើរការធម្មតា។ រូបគេមិនបានគិតអ្វីច្រើនក្រៅពីយកចិត្តទុកដាក់លើការហ្វឹកហាត់ និងការប្រកួតដើម្បីឲ្យទទួលបានលទ្ធផលល្អ។

Nick Taylor ជាមួយមិត្តរួមក្រុមក្រោយរកបានគ្រាប់បាល់

កីឡាករបាននិយាយថា ៖«អ្វីៗគ្រប់យ៉ាងនៅទីនេះល្អ ខ្ញុំផ្តោតតែលើការហ្វឹកហាត់ និងការប្រកួតលីគដែលទើបចាប់ផ្តើម។ លីគថៃពិតជាល្អ ប្រកួតប្រជែងខ្លាំង និងមានកីឡាករល្អៗច្រើន។ យើងទើបតែប្រកួតបាន១មួយលើក ប៉ុន្តែខ្ញុំពិតជារីករាយរាយ ហើយយើងនឹងប្រឹងប្រែងសម្រាប់ការប្រកួតបន្តបន្ទាប់ទៀត។ ខ្ញុំសង្ឃឹមថា យើងអាចបន្តទទួលបានលទ្ធផលវិជ្ជមាន»។

កីឡាករ Nick Taylor រកបានគ្រាប់បាល់ឲ្យក្លិប PT Prachuap នៅនាទី១៥ ដែលបញ្ចប់ទៅដោយលទ្ធផលស្មើគ្នា ២-២ ជាមួយក្លិប BG Pathum United ។ កីឡាករកម្ពុជារូបនេះបានជាប់ឈ្មោះជាកីឡាករដំបូងគេដែលរកបានគ្រាប់បាល់នៅលីគកំពូលថៃ រដូវកាលថ្មី។ ចុងបញ្ចប់នៃការប្រកួត កីឡាករកម្ពុជាទាំងពីររូបបានផ្លាស់ប្តូរអាវគ្នាថែមទៀត។

Nick Taylor ក្នុងនាមជាកីឡាករខ្មែរ-អាមេរិក បានចូលរួមជាមួយក្លិបព្រះខ័នរាជស្វាយរៀង ២រដូវកាលដោយបានឈ្នះជើងឯកលីគកំពូលកម្ពុជា ២ លើក និងពានរង្វាន់សម្តេចតេជោ ហ៊ុន សែន ១ លើក។ រូបគេបានជាប់ជម្រើសជាតិកម្ពុជាតាំងពីចុងឆ្នាំ ២០២២ ហើយតែងតែត្រូវបានកោះហៅចូលរួមក្រុមជម្រើសជាតិកម្ពុជារហូតដល់បច្ចុប្បន្ន៕