ព័ត៌មានអន្ដរជាតិ

សង្ស័យស្លាប់រាប់រយនាក់ បន្ទាប់ពីគ្រោះរញ្ជួយដីកម្រិត៦.០រ៉ិចទ័រនៅអាហ្វហ្គានីស្ថាន

បានផុស

៨ ខែ មុន

នៅ

ថ្ងៃចន្ទ ១ កញ្ញា ២០២៥

ដោយ

Chheang

គ្រោះរញ្ជួយដីកម្រិត ៦.០រ៉ិចទ័រ បានវាយប្រហារភាគខាងកើតប្រទេសអាហ្វហ្គានីស្ថាន នៅជិតទីក្រុង Jalalabad ដោយក្រុមមន្ត្រីក្នុងតំបន់បានព្រមានថា មនុស្សរាប់រយនាក់អាចនឹងបាត់បង់ជីវិត។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters នាថ្ងៃទី១ខែកញ្ញាឆ្នាំ២០២៥។

ការរញ្ជួយដីនៅអាហ្វហ្គានីស្ថានឆ្នាំ២០២៣ (រូបថត៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមមជ្ឈមណ្ឌលស្រាវជ្រាវភូមិសាស្ត្រអាល្លឺម៉ង់ ចំណុចកណ្តាលនៃការរញ្ជួយដីនេះ គឺស្ថិតនៅក្នុងតំបន់ភ្នំមួយ ជិតព្រំដែនជាមួយប្រទេសប៉ាគីស្ថាន ក្នុងជម្រៅ១០គីឡូម៉ែត្រ។ ប្រតិបត្តិការជួយសង្គ្រោះកំពុងត្រូវបានរារាំងដោយស្ថានភាពលំបាក និងហេដ្ឋារចនាសម្ព័ន្ធមានកម្រិតក្នុងតំបន់រងគ្រោះ។

មិនទាន់មានតួលេខអ្នកស្លាប់ជាផ្លូវការនៅឡើយទេ ប៉ុន្តែបើតាមតួលេខចុះផ្សាយដោយ BBC នៅព្រឹកថ្ងៃចន្ទនេះ មានយ៉ាងហោចណាស់ ២០នាក់ដែលត្រូវបានបញ្ជាក់ជាផ្លូវការថាបាត់បង់ជីវិត។ យ៉ាងណា អាជ្ញាធរមូលដ្ឋានបាននិយាយថា ចំនួនអ្នកស្លាប់ត្រូវបានគេរំពឹងថានឹងកើនឡើងយ៉ាងខ្លាំង។

អាហ្វហ្គានីស្ថាន ងាយរងគ្រោះខ្លាំងចំពោះការរញ្ជួយដី ជាពិសេសនៅតំបន់ភ្នំ Hindu Kush ដែលបន្ទះប្លាកែតប៉ះគ្នា។ នៅក្នុងខែតុលាឆ្នាំ២០២៣ ការរញ្ជួយដីជាបន្តបន្ទាប់នៅក្នុងខេត្ត Herat បានសម្លាប់មនុស្សយ៉ាងហោចណាស់ ២ ៤០០នាក់។

ទីភ្នាក់ងារមនុស្សធម៌បានសម្តែងការព្រួយបារម្ភអំពីទំហំនៃគ្រោះមហន្តរាយចុងក្រោយនេះ ដោយព្រមានថា ប្រព័ន្ធថែទាំសុខភាពដ៏ផុយស្រួយរបស់ប្រទេសអាហ្វហ្គានីស្ថាន និងវិបត្តិសេដ្ឋកិច្ចដែលកំពុងបន្តនឹងធ្វើឲ្យមានភាពស្មុគស្មាញដល់កិច្ចខិតខំប្រឹងប្រែងសង្គ្រោះ៕