បួគីណាហ្វាសូ បង្ហាញបំណងចង់ពង្រឹងកិច្ចសហប្រតិបត្តិការលើវិស័យរ៉ែជាមួយកម្ពុជា

បួគីណាហ្វាសូ​ដែលជាប្រទេសមួយនៅទ្វីបអាហ្វ្រិកបានបង្ហាញបំណងចង់ពង្រឹងកិច្ចសហប្រតិបត្តិការលើវិស័យរ៉ែជាមួយប្រទេសកម្ពុជា។ បំណងនេះ ត្រូវបានលើកឡើងដោយឯកអគ្គរដ្ឋទូតបួគីណាហ្វាសូប្រចាំកម្ពុជា ក្នុងពេលលោកចូលជួប និងប្រគល់សារតាំងជូនប្រមុខរដ្ឋស្ដីទីកម្ពុជា សម្ដេចតេជោ ហ៊ុន សែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងអំពីទំនាក់ទំនងរវាងប្រទេសកម្ពុជា និងបួគីណាហ្វាសូ លោកឯកអគ្គរដ្ឋទូត Daouda Bitie បានបញ្ជាក់ពីបំណងដែលចង់ឱ្យភាគីទាំងពីរត្រូវតែពង្រឹងជាមួយគ្នានោះ គឺទាក់ទងទៅនឹងវិស័យសេដ្ឋកិច្ច និងពាណិជ្ជកម្ម។ ន័យនេះលោក បានជម្រាបសម្ដេចតេជោ ហ៊ុន សែន ថា ចំណុចខ្លាំងរបស់ប្រទេសបួគីណាហ្វាសូ គឺផ្នែកធនធានរ៉ែ ដែលជាផ្នែកមួយអាចពង្រឹងកិច្ចសហប្រតិបត្តិការបានជាមួយកម្ពុជា។

ជាមួយនឹងការពង្រឹងលើផ្នែនធនធានរ៉ែនេះ លោកឯកអគ្គរដ្ឋទូតបួគីណាហ្វាសូ ក៏ចង់មានកិច្ចសហប្រតិបត្តិការលើផ្នែកយោធាពាក់ព័ន្ធនឹងការដោះមីន ព្រមទាំងការពង្រីកនូវកិច្ចសហប្រតិបត្តិការសំខាន់ៗជាច្រើនទៀត ជាពិសេសការគាំទ្រគ្នាទៅវិញទៅមកលើឆាកអន្តរជាតិ។

ចំពោះការលើកឡើងរបស់លោកឯកអគ្គរដ្ឋទូតក្នុងការពង្រឹងលើចំណុចសំខាន់ទាំងបីខាងលើ សម្ដេចតេជោប្រមុខរដ្ឋស្ដីទី បានសម្ដែងការស្វាគមន៍ ប៉ុន្តែយ៉ាងណាសម្ដេចតេជោ បានជំរុញលើកទឹកចិត្តឱ្យភាគីទាំងពីរ គួរតែបង្កើតឱ្យមានកិច្ចព្រមព្រៀង ឬអនុស្សារណៈនៃការយោគយល់គ្នាមួយ ដើម្បីពិនិត្យទៅលើចំណុចដែលត្រូវកិច្ចសហប្រតិបត្តិការក្នុងទំនាក់ទំនងរវាងប្រទេសទាំងពីរក្នុងទិសដៅជាក់លាក់។

តាមរយៈជំនួបនៅវិមានព្រឹទ្ធសភា នាព្រឹកថ្ងៃទី៤ ខែកញ្ញា ឆ្នាំ២០២៥នេះ សម្ដេចតេជោ ហ៊ុន សែន ក៏សង្ឃឹមថា វត្តមានរបស់លោក Daouda Bitie ជាឯកអគ្គរដ្ឋទូតនៅពេលនេះ នឹងធ្វើឱ្យទំនាក់ទំនងរវាងកម្ពុជា និងបួគីណាហ្វាសូ កាន់តែរីកចម្រើនបន្ថែមទៀត បន្ទាប់ពីប្រទេសទាំងពីរបានបង្កើតទំនាក់ទំនងការទូតផ្លូវការជាមួយគ្នារយៈពេល១៥ឆ្នាំមកហើយ៕