ព័ត៌មានជាតិ

លោក ហេង សួរ លើកទឹកចិត្តក្រុមហ៊ុនបច្ចេកវិទ្យាទំនើបចិនផ្ដោតការបណ្ដុះបណ្ដាលជំនាញលើវិស័យឧស្សាហកម្មកាត់ដេរ រថយន្តអគ្គិសនី និងបញ្ញាសិប្បនិម្មិត (AI)

បានផុស

៨ ខែ មុន

នៅ

ថ្ងៃសុក្រ ៥ កញ្ញា ២០២៥

ដោយ

លោក ហេង សួរ លើកទឹកចិត្តឲ្យក្រុមហ៊ុនបច្ចេកវិទ្យាទំនើបរបស់ចិន ផ្តោតលើការបណ្តុះបណ្តាលជំនាញលើវិស័យឧស្សាហកម្មកាត់ដេរ វិស័យរថយន្តអគ្គិសនី និងបញ្ញាសិប្បនិម្មិត (AI)។

ការលើកទឹកចិត្តនេះ ក្នុងឱកាស លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានទទួលជួបសម្តែងការគួរសម និងពិភាក្សាការងារជាមួយលោកសាស្ត្រាចារ្យបណ្ឌិត ដេវីន លូ តាន់ (Devin Lu Dan) ប្រធាន និងជានាយកប្រតិបត្តិក្រុមហ៊ុន Geely Talent Development Group និងប្រតិភូ នៅទីស្ដីការក្រសួង កាលពីព្រឹកថ្ងៃទី ៤ ខែកញ្ញា ឆ្នាំ ២០២៥ ម្សិលមិញ។

នាឱកាសនោះ លោក ហេង សួរ បានស្នើឲ្យក្រុមហ៊ុន Geely Talent Development Group ជាក្រុមហ៊ុនបច្ចេកវិទ្យាទំនើបរបស់ចិន ផ្ដោតលើការបណ្ដុះបណ្ដាលជំនាញនៅក្នុងវិស័យឧស្សាហកម្មកាត់ដេរ បច្ចេកទេសរថយន្តអគ្គិសនី និងបញ្ញាសិប្បនិម្មិត (AI) ដែលក្រុមហ៊ុនអាចសហការជាមួយគ្រឹះស្ថានបណ្ដុះបណ្ដាលបច្ចេកទេស និងវិជ្ជាជីវៈរបស់ក្រសួង។

ទន្ទឹមនោះ លោក ហេង សួរ បានគូសបញ្ជាក់ពីសារៈសំខាន់ នៃកិច្ចសហការរវាងក្រុមហ៊ុន និងគ្រឹះស្ថានបណ្ដុះបណ្ដាលបច្ចេកទេសរបស់ក្រសួង ខណៈកម្ពុជាមានកម្មករ-និយោជិត ជាង ១ លាននាក់ កំពុងបម្រើក្នុងវិស័យឧស្សាហកម្មកាត់ដេរ ដែលត្រូវការជំនាញបន្ថែមសម្រាប់ពង្រឹងផលិតភាព។ បន្ថែមពីនេះ វិស័យរថយន្តអគ្គិសនី និងបញ្ញាសិប្បនិម្មិត បាននិងកំពុងដើរតួនាទីយ៉ាងសំខាន់នៅកម្ពុជាផងដែរ។

ជាមួយនេះ លោកសាស្ត្រាចារ្យបណ្ឌិត ដេវីន លូ តាន់ បានថ្លែងអំណរគុណដល់លោករដ្ឋមន្ត្រីចំពោះការផ្តល់អនុសាសន៍សម្រាប់កិច្ចសហការបណ្ដុះបណ្ដាលលើវិស័យដ៏មានសារៈសំខាន់នេះឲ្យជោគជ័យនាពេលអនាគត។

លោកសាស្ត្រាចារ្យបណ្ឌិត ដេវីន លូ តាន់ ក៏បានបញ្ជាក់ពីការគ្រោងបណ្ដុះបណ្ដាលដែលអាចធ្វើឡើងក្នុងទម្រង់ទំនើបតាមរយៈការសិក្សាដោយផ្ទាល់ និងតាមរយៈអនឡាញ ដើម្បីចូលរួមចំណែកក្នុងការលើកកម្ពស់វិស័យបណ្ដុះបណ្ដាលវិជ្ជាជីវៈឲ្យកាន់តែប្រសើរឡើង មានភាពបត់បែន និងអំណោយផលសម្រាប់កម្មករ-និយោជិត ក្នុងការសិក្សាពីចម្ងាយ និងសិក្សាពីកន្លែងការងារ ចំណេញទាំងពេលវេលា និងកាត់បន្ថយការចំណាយផងដែរ៕