ក្រុមហ៊ុនអាកាសចរណ៍ជប៉ុនរងការព្រមានជាលើកទី២ ដោយសារអ្នកបើកយន្តហោះស្រវឹងស្រា

យោងតាមការចេញផ្សាយរបស់សារព័ត៌មាន CNA នៅថ្ងៃទី១១ខែកញ្ញា ក្រុមហ៊ុនអាកាសចរណ៍ Japan Airlines (JAL) បានរងការព្រមានជាថ្មីម្តងទៀត បន្ទាប់ពីអ្នកបើកបរយន្តហោះម្នាក់ស្រវឹងស្រា បង្កការរំខានដល់ការហោះហើរដ៏ធំ ជំរុញឱ្យក្រសួងដឹកជញ្ជូនរបស់ប្រទេសជប៉ុន ចេញការព្រមានជាលើកទីពីរក្នុងរយៈពេលមួយឆ្នាំទៅលើក្រុមហ៊ុននេះ។

ឧបទ្ទវហេតុនេះបានកើតឡើងកាលពីថ្ងៃទី ២៨ ខែសីហា ដោយអ្នកបើកយន្តហោះរបស់ JAL ម្នាក់បានផឹកស្រាច្រើនហួសប្រមាណពេលកំពុងបំពេញកាតព្វកិច្ចនៅរដ្ឋHawaii សហរដ្ឋអាមេរិក បណ្តាលឱ្យមានការពន្យារពេលជើងហោះហើរចំនួន៣ រួមទាំងជើងហោះហើរមួយបានពន្យារពេលរហូតដល់ ១៨ ម៉ោង។

ក្រុមហ៊ុនបានចេញសុំទោសនៅក្នុងសន្និសីទសារព័ត៌មានមួយកាលពីថ្ងៃទី ១០ ខែកញ្ញា ដោយប្រធាន JAL លោក Mitsuko Tottori បាននិយាយថា ក្រុមហ៊ុនអាកាសចរណ៍នឹងយកចិត្តទុកដាក់លើបញ្ហានេះ និងទទួលស្គាល់បញ្ហានេះបានកើតឡើងពិតមែន បើទោះបីជាមានច្បាប់តឹងរ៉ឹងលើគ្រឿងស្រវឹងកាលពីខែធ្នូឆ្នាំមុនក៏ដោយ។ ច្បាប់​ទាំង​នោះ​ត្រូវ​បាន​ដាក់​ចេញ​បន្ទាប់​ពី​អ្នក​បើក​យន្តហោះ​ពីរ​នាក់​បាន​ផឹក​ស្រា​មុន​ការ​ហោះ​ហើរ​ពី​ទីក្រុង Melbourne ប្រទេសអូស្រ្តាលី ទៅ Narita ប្រទេសជប៉ុន បង្កឲ្យមានការ​ពន្យារ​ពេល​បី​ម៉ោង។

ក្រសួងដឹកជញ្ជូនរបស់ប្រទេសជប៉ុនឥឡូវនេះបានចេញការព្រមានជាលើកទីពីរទៅដល់JAL និងបានរិះគន់ក្រុមហ៊ុនចំពោះការខកខានមិនបានអប់រំបុគ្គលិករបស់ខ្លួនឱ្យបានត្រឹមត្រូវអំពីសុវត្ថិភាព។

គួរបញ្ជាក់ថា Japan Airlines ក៏បានប្រឈមនឹងរឿងអាស្រូវស្រដៀងគ្នាពីមុនមកដែរ ដោយក្នុងឆ្នាំ២០១៨ អ្នកបើកយន្តហោះម្នាក់នៅចក្រភពអង់គ្លេសត្រូវបានចាប់ខ្លួនដោយសារមានជាតិអាល់កុលជិត ១០ ដងលើសកម្រិតច្បាប់នៅមុនពេលហោះហើរ។ ករណីចុងក្រោយនេះបានធ្វើឱ្យមានការព្រួយបារម្ភជាថ្មីអំពីថាតើ JAL មានវិធានការយ៉ាងណាដើម្បីរក្សាសុវត្ថិភាពអ្នកដំណើររបស់ខ្លួនដែរឬទេ៕

អត្ថបទ៖ ប៊ុន សុភាព